ବାରିପଦା ଅଫିସ,୩ା୧୨- ମୟୂରଭଞ୍ଜ ଜିଲା ବାରିପଦା ପୌରାଞ୍ଚଳ ପଟ୍ଟାବିହୀନ ବାସିନ୍ଦା ସଂଘର ଏକ ପ୍ରତିନିଧି ଦଳ ସୋମବାର ଜିଲାପାଳ ବିନୀତ ଭରଦ୍ୱାଜଙ୍କୁ ସାକ୍ଷାତ କରି ସଂଘର ବିଭିନ୍ନ ଦାବି ସମ୍ପର୍କରେ ଆଲୋଚନା କରିଛନ୍ତି। ଏନେଇ ଏକ ଦାବିପତ୍ର ମଧ୍ୟ ପ୍ରଦାନ କରିଛନ୍ତି। ପୌରାଞ୍ଚଳର ପଟ୍ଟା ବିହୀନ ବାସିନ୍ଦାମାନେ ଗ୍ରାମ୍ୟ ଜଙ୍ଗଲ, ଜଳପୁଟ ଓ ଭୂଦାନ ଜମିରେ ବସବାସ କରୁଛନ୍ତି, ସେମାନଙ୍କୁ ଜମି ଅଧିକାର ପ୍ରମାଣପତ୍ର ପ୍ରଦାନ ତୁରନ୍ତ ପ୍ରଦାନ କରାଯାଉ। ଜମି ଅଧିକାର ପ୍ରମାଣପତ୍ର ପ୍ରଦାନ ପାଇଁ ସର୍ଭେ ପ୍ରକ୍ରିୟାକୁ ଗୁରୁତ୍ୱ ଦିଆଯାଉ ବୋଲି ଦାବି କରିଛନ୍ତି। ଜିଲାପାଳ ଭରଦ୍ୱାଜ ସେମାନଙ୍କ ସହିତ ଆଲୋଚନା କରି ନିୟମ ଅନୁଯାୟୀ ସମସ୍ତ କାର୍ଯ୍ୟ ତ୍ୱରାନ୍ବିତ କରାଯିବ ଏବଂ ଜମି ହୀନମାନେ ବସବାସ କରୁଥିବା ସ୍ଥାନରୁ ସେମାନଙ୍କୁ ଉଚ୍ଛେଦ କରାଯିବ ନାହିଁ ବୋଲି ପ୍ରତିଶ୍ରୁତି ଦେଇଥିଲେ। ଏହି ପ୍ରତିନିଧି ଦଳରେ ସଂଘର ସଭାପତି ନନ୍ଦ କୁମାର ମହାପାତ୍ରଙ୍କ ନେତୃତ୍ୱରେ ସଂଘର ସାଧାରଣ ସମ୍ପାଦକ କାହ୍ନୁଚରଣ ବେହେରା, ଉପଦେଷ୍ଟା ପ୍ରାଧ୍ୟାପକ ଗୋପବନ୍ଧୁ, କୋଷାଧ୍ୟକ୍ଷ ଭାରତୀ ପାତ୍ର ଓ ସମ୍ପାଦକ କାଶୀନାଥ ମାହାନା ପ୍ରମୁଖ ସାମିଲ ଥିଲେ।