ଭୁବନେଶ୍ୱର,୯।୫: ରିଲାଏନ୍ସ ଇଣ୍ଡଷ୍ଟ୍ରିଜର ଜିଓ ପ୍ଲାଟ୍ଫର୍ମରେ ଭିଷ୍ଟା ଇକ୍ୱିଟି ପାର୍ଟନର ୧୧,୩୬୭ କୋଟି ଟଙ୍କା ନିବେଶ କରିବ। ଏହି ନିବେଶ ଦ୍ୱାରା ଉକ୍ତ କମ୍ପାନୀ ୨.୩୨% ଅଂଶଧନ ହାସଲ କରିବ। ରିଲାଏନ୍ସ ଇଣ୍ଡଷ୍ଟ୍ରିଜ ଏବଂ ଫେସ୍ବୁକ ପରେ ଭିଷ୍ଟା ଜିଓରେ ଅନ୍ୟ ଏକ ପ୍ରମୁଖ ଅଂଶୀଦାର ହେବ। ନୂଆ ନିବେଶ ଦ୍ୱାରା ଗତ ୩ ସପ୍ତାହ ମଧ୍ୟରେ ଜିଓ ୬୦,୫୯୬ କୋଟି ଟଙ୍କାର ନିବେଶ ଆକୃଷ୍ଟ କରିବାକୁ ସକ୍ଷମ ହୋଇଛି ବୋଲି ସୂଚନା ରହିଛି। ଭିଷ୍ଟାର ନିବେଶକୁ ରିଲାଏନ୍ସ ଅଧ୍ୟକ୍ଷ ମୁକେଶ ଅମ୍ବାନୀ ସ୍ବାଗତ କରିଛନ୍ତି। ସେ କହିଛନ୍ତି, ଏଭଳି ପଦକ୍ଷେପ ଦେଶର ଡିଜିଟାଲ ଇକୋସିଷ୍ଟମରେ ଅଭିବୃଦ୍ଧି ଏବଂ ସଂସ୍କାର ଆଣିବା ଦିଗରେ ସହାୟକ ହେବ। ଜିଓ ସହ ମିଳିତ ହୋଇ ଏକ ଡିଜିଟାଲ ସୋସାଇଟି ଗଠନ ଦିଗରେ କାର୍ଯ୍ୟକ୍ରମ ଜାରି ରହିବ ବୋଲି ଭିଷ୍ଟାର ସିଇଓ ଏବଂ ଅଧ୍ୟକ୍ଷ ରବର୍ଟ ଏଫ୍ ସ୍ମିଥ କହିଛନ୍ତି।
