ସୁନ୍ଦରଗଡ଼,୧୩।୧୧(ଡି.ଏନ୍.ଏ.): ସୁନ୍ଦରଗଡ଼ ଜିଲା ନୂଆଗାଁ ସ୍ବାସ୍ଥ୍ୟକେନ୍ଦ୍ରରେ ଚାକିରି କରୁଥିବା ଡା. ପଦ୍ମନାଭ ମୁଖୀ ବାରୁଆ ଏବେ ପୋଲିସ କବ୍ଜାରେ। ତାଙ୍କ ନାମରେ ହୋଇଥିବା ଡାକ୍ତରୀ ସାର୍ଟିଫିକେଟ୍ ଜାଲିଆତି ଅଭିଯୋଗ ଉପରେ ତଦନ୍ତ କରାଯିବାପରେ ତାଙ୍କ କାରନାମା ପଦାକୁ ଆସିଛି। ସୂଚନା ଅଧିକାର ଆଇନରେ ମିଳିଥିବା ତଥ୍ୟ ଆଧାରରେ ଏନେଇ ଅଭିଯୋଗ ହେବା ପରେ ସମ୍ପୃକ୍ତ ଡାକ୍ତରଙ୍କ ସାର୍ଟିଫିକେଟର ବୈଧତା ନେଇ ଜିଲାମୁଖ୍ୟ ଚିକିତ୍ସାଧିକାରୀ ସମ୍ବଲପୁର ବିଶ୍ୱବିଦ୍ୟାଳୟ କର୍ତ୍ତୃପକ୍ଷଙ୍କଠାରୁ ମତାମତ ଲୋଡ଼ିଥିଲେ। ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ଗତ ୨୦୦୨ରେ ଏହି ନାମଧାରୀ କୌଣସି ଛାତ୍ର ଏମ୍ବିବିଏସ୍ ପାସ୍ କରି ନ ଥିବା ରିପୋର୍ଟ ପ୍ରଦାନ କରିବା ପରେ ମଙ୍ଗଳବାର ରାତିରେ ସିଡିଏମ୍ଓ ଟାଉନ ଥାନାରେ ଠକେଇ ରିପୋର୍ଟ ନେଇ ଅଭିଯୋଗ କରିଥିଲେ। ବୁଧବାର ଅତିରିକ୍ତ ଏସ୍ପି ରବିନାରାୟଣ ବାରିକ ଏବଂ ଅନ୍ୟାନ୍ୟ ବରିଷ୍ଠ ପୋଲିସ ଅଧିକାରୀମାନେ ଟାଉନ ଥାନାରେ ଡାକ୍ତରଙ୍କୁ ଅଟକ ରଖି ମାରାଥନ ଜେରା ଚଳାଇଥିବା ସୂଚନା ମିଳିଛି।
ସୂଚନାଯୋଗ୍ୟ, ପଦ୍ମନାଭ ଜାଲ ସାର୍ଟିଫିକେଟ ଦେଇ ୩ ବର୍ଷ ଧରି ସରକାରୀ ଡାକ୍ତର ଭାବେ ଚାକିରି ପାଇ ରୋଗୀସେବା କରୁଥିଲେ। ଏନେଇ ନୂଆଗାଁ ଅଞ୍ଚଳବାସୀଙ୍କ ତରଫରୁ ସୁନ୍ଦରଗଡ଼ ଜିଲାପାଳଙ୍କଠାରେ ଅଭିଯୋଗ ହୋଇଥିଲା। ସମ୍ପୃକ୍ତ ବ୍ୟକ୍ତିଙ୍କ ଡାକ୍ତରୀ ସାର୍ଟିଫିକେଟ ଜାଲ୍ ବୋଲି ସୂଚନା ଅଧିକାର ଆଇନ ବଳରେ ମିଳିଥିବା ତଥ୍ୟରୁ ସ୍ପଷ୍ଟ ହୋଇଛି। ୨୦୧୬ରେ ଏହି ଡାକ୍ତରଙ୍କୁ ନିଯୁକ୍ତି ଦିଆଯାଇଥିବା ବେଳେ କିଭଳି ତାଙ୍କ ସାର୍ଟିଫିକେଟ ଠିକ୍ ଭାବେ ଯାଞ୍ଚ କରାଯାଇନାହିଁ ସେ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏନେଇ ଅଭିଯୋଗ ହେବା ପରେ ଧରିତ୍ରୀରେ ସେପ୍ଟେମ୍ବର ୨୭ ତାରିଖରେ ଖବର ପ୍ରକାଶ ପାଇବା ପରେ ତତ୍ପରତା ପ୍ରକାଶ ପାଇଥିଲା।
