ନୂଆଦିଲ୍ଲୀ,୫।୧୨: ଆଇଏନ୍ଏକ୍ସ୍ ମିଡ଼ିଆ ମାମଲାରେ ପୂର୍ବତନ ଅର୍ଥମନ୍ତ୍ରୀ ପି. ଚିଦାମ୍ବରମ୍ଙ୍କୁ ଜାମିନ୍ ମିଳିବାର ଗୋଟିଏ ଦିନ ପରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଘେରିଛନ୍ତି। ଦେଶର ଅର୍ଥବ୍ୟବସ୍ଥା ନେଇ ସେ ସରକାରଙ୍କୁ କଡ଼ା ସମାଲୋଚନା କରିଛନ୍ତି। ଜିଡ଼ିପି ନେଇ ସରକାର ଲୋକଙ୍କୁ ଭୁଆଁ ବୁଲାଉଥିବା ଚିଦାମ୍ବରମ୍ ଅଭିଯୋଗ କରିଛନ୍ତି। ଦେଶର ଜିଡ଼ିପି ୧.୫ ପ୍ରତିଶତ ରହିଥିବାବେଳେ ସରକାର ଏହାକୁ ବଢ଼ାଇ ଚଢ଼ାଇ ୪.୫ ପ୍ରତିଶତ କହୁଥିବା ଚିଦାମ୍ବରମ୍ କହିଛନ୍ତି। ମୋଦି ସରକାର ଲୋକଙ୍କ ପ୍ରତିବାଦକୁ ବାହୁବଳ ଦ୍ୱାରା ଚପାଇ ଦେବାକୁ ଉଦ୍ୟମ କରୁଛନ୍ତି। ଫଳରେ ବହୁ ଲୋକଙ୍କ ମନର କଥା ଲୋକଲୋଚନକୁ ଆସିପାରୁ ନାହିଁ। ଏବେ ଦେଶରେ ଅତ୍ୟାବଶ୍ୟକ ସାମଗ୍ରୀ ମହଙ୍ଗା ହେବାରେ ଲାଗିଛି। ଫଳରେ ଲୋକଙ୍କ ଜୀବନଧାରଣ ଅତିଶୟ କଷ୍ଟକର ହୋଇପଡ଼ିିଥିବା ସେ କହିଛନ୍ତି। କଂଗ୍ରେସ ନେତୃତ୍ୱାଧୀନ ୟୁପିଏ ସରକାର ୧୪ କୋଟି ଲୋକଙ୍କୁ ଦାରିଦ୍ର୍ୟରୁ ବାହାର କରିଥିବାବେଳେ ଭାଜପା ସରକାର କୋଟିକୋଟି ଲୋକଙ୍କୁ ପୁଣି ଗରିବ କରିଛନ୍ତି। ଲୋକଙ୍କ ପାଖରେ କିଣିବା କ୍ଷମତା ହ୍ରାସ ପାଉଥିବା ଚିଦାମ୍ବରମ୍ ଅଭିଯୋଗ କରିଛନ୍ତି। ସରକାରଙ୍କ ଅଦୂରଦର୍ଶୀ ଯୋଜନା ଯୋଗୁ ବହୁ ଶିଳ୍ପ ସଂସ୍ଥାରେ ଛଟେଇ ଲାଗି ରହିଥିବା ସେ କହିଛନ୍ତି।
