ନୂଆଦିଲ୍ଲୀ ,୬ା୮(ପି.ଟି.): ଜମ୍ମୁ-କଶ୍ମୀରରୁ ଭାରତ ସରକାର ସମ୍ବିଧାନର ୩୭୦ ଓ ୩୫ଏ ଧାରା ଉଚ୍ଛେଦ କରିବା ପରେ ଏହାକୁ ନେଇ ପାକିସ୍ତାନ ପକ୍ଷରୁ ତୀବ୍ର ପ୍ରତିକ୍ରିୟା ପ୍ରକାଶ କରାଯାଇଛି। ନୂଆଦିଲ୍ଲୀର ଏକଚାଟିଆ ପଦକ୍ଷେପ କଶ୍ମୀର ବିବାଦର ମୋଡ଼ ବଦଳାଇ ପାରିବ ନାହିଁ ବୋଲି ପାକିସ୍ତାନ କହିଛି। ଏନେଇ ଇସ୍ଲାମାବାଦ୍ ପାଖରେ ସମସ୍ତ ଆଇନଗତ ଦ୍ୱାର ଖୋଲା ରହିଥିବା ପାକ୍ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଭାରତ ଅଧିକୃତ ଜମ୍ମୁ- କଶ୍ମୀରକୁ ଏକ ଅନ୍ତର୍ଜାତୀୟସ୍ତରର ବିବାଦୀୟ ମାମଲା ବୋଲି ପାକିସ୍ତାନ କହିଛି। ଭାରତ ଏହା ଉପରେ ଏକପାଖିଆ ନିଷ୍ପତ୍ତି ନେଇ ବିବାଦକୁ ଏଡ଼ାଇଯାଇ ପାରିବନି ବୋଲି କୁହାଯାଇଛି। ଏହି ବିବାଦର ଏକ ପକ୍ଷ ଭାବେ ପାକିସ୍ତାନ ଭାରତର ବେଆଇନ କାର୍ଯ୍ୟ ବିରୋଧରେ ଚ୍ୟାଲେଞ୍ଜ କରିବ ବୋଲି ବିବୃତିରେ କୁହାଯାଇଛି। ରାଜନୈତିକ ବିଶେଷଜ୍ଞଙ୍କ କହିବା ଅନୁଯାୟୀ ଆଗାମୀ ସେପ୍ଟେମ୍ବରରେ ହେବାକୁ ଥିବା ଜାତିସଂଘର ସାଧାରଣ ପରିଷଦ ବୈଠକରେ ପାକିସ୍ତାନ ଏହି ପ୍ରସଙ୍ଗ ଉଠାଇପାରେ। ସେପ୍ଟେମ୍ବର ୨୮ରେ ପ୍ରଧାନମନ୍ତ୍ରୀ ମୋଦି ଜାତିସଂଘର ସାଧାରଣ ପରିଷଦରେ ଉଦ୍ବୋଧନ ଦେବା କାର୍ଯ୍ୟକ୍ରମ ରହିଛି।
