ନୂଆଦିଲ୍ଲୀ, ୩୦।୫: ଦେଶର ପ୍ରଧାନମନ୍ତ୍ରୀ ଭାବେ ପୁଣି ଥରେ ଶପଥ ନେବାକୁ ଯାଉଛନ୍ତି ନରେନ୍ଦ୍ର ମୋଦି। ତାଙ୍କ ସହ ଅନ୍ୟ ମନ୍ତ୍ରୀମାନଙ୍କୁ ମଧ୍ୟ ରାଷ୍ଟ୍ରପତି ରାମନାଥ କୋବିନ୍ଦ ପଦ ଏବଂ ଗୋପନୀୟତାର ଶପଥ ପାଠ କରାଇବେ। ରାଷ୍ଟ୍ରପତି ଭବନରେ ଅନୁଷ୍ଠିତ ହେବାକୁ ଥିବା ଏହି ଶପଥ ଗ୍ରହଣ ଉତ୍ସବରେ ଦେଶ ବିଦେଶରୁ ବହୁ ଅତିଥି ଯୋଗଦେବେ। ଭାରତୀୟ ଗଣତନ୍ତ୍ର ବ୍ୟବସ୍ଥାରେ ବହୁମତ ହାସଲ କରିଥିବା ଦଳର ନେତା ହିଁ ଦେଶର ପ୍ରଧାନମନ୍ତ୍ରୀ ଭାବେ ଶପଥ ନେଇଥାନ୍ତି। ଭାତତରେ ରାଷ୍ଟ୍ରପତି, ପ୍ରଧାନମନ୍ତ୍ରୀ, ମନ୍ତ୍ରୀ, ମୁଖ୍ୟମନ୍ତ୍ରୀ, ଜଷ୍ଟିସ୍ କିମ୍ବା କୌଣସି ବ୍ୟକ୍ତି ପଦ ସମ୍ଭାଳିବା ପୂର୍ବରୁ ସେ ଶପଥ ନେଇଥାନ୍ତି। ଏହି ଶପଥ ନେବା ପରମ୍ପରା କେବେ ଆରମ୍ଭ ହୋଇଥିଲା ଆସନ୍ତୁ ଜାଣିବା।
ଇଶ୍ୱର ହିଁ ସଂସାରରେ ସର୍ବୋତ୍ତମ ବୋଲି ଧରାଯାଏ। ପୁରାତନ କାଳରେ ନିଜକୁ ସଠିକ୍ ଦାବି କରିବା ପାଇଁ ଲୋକେ ଇଶ୍ୱରଙ୍କ ରାଣ ନେଉଥିଲେ। ସମୟ କ୍ରମେ ଏହି ପରମ୍ପରା ଆଗକୁ ମଧ୍ୟ ଜାରି ରହିଥିଲା। କୁହାଯାଏ ଇହୁଦି ଧର୍ମରେ ଶପଥ ନେବା କଥା ଉଲ୍ଲେଖ ଥିଲା। ବାଇବେଲ ପରମ୍ପରାରେ ଶପଥ ନେଇଥିବା ପ୍ରଥମ ବ୍ୟକ୍ତି ଥିଲେ ଆବ୍ରାହମ। ଭାରତରେ ମଧ୍ୟ ଏହି ପରମ୍ପରାକୁ ବଜାୟ ରଖି ରାଷ୍ଟ୍ରପତି, ପ୍ରଧାନମନ୍ତ୍ରୀ, ମନ୍ତ୍ରୀ, ମୁଖ୍ୟମନ୍ତ୍ରୀ, ଜଷ୍ଟିସ ପଦ ସମ୍ଭାଳିବା ପୂର୍ବରୁ ଇଶ୍ୱରଙ୍କ ନାମରେ ଶପଥ ନେଇଥାନ୍ତି।
