ଭୁବନେଶ୍ୱର, ୨୯।୯(ବ୍ୟୁରୋ): ମହାନଦୀ ଟ୍ରିବ୍ୟୁନାଲର ନବମ ବୈଠକ ଓ ଶୁଣାଣି ହୋଇଛି। ଏଥିରେ ଉଭୟ ରାଜ୍ୟ ତରଫରୁ ବିଶେଷଜ୍ଞ ଦଳ ପରସ୍ପର ରାଜ୍ୟକୁ ଗସ୍ତକରି ରିପୋର୍ଟ ପ୍ରଦାନ କରିବା ବ୍ୟତୀତ ଅନ୍ୟକିଛି ବିଷୟରେ ଶୁଣାଣି ହୋଇନାହିଁ। ଟ୍ରିବ୍ୟୁନାଲର କଚ୍ଛପ ଗତି ସମସ୍ତଙ୍କୁ ମର୍ମାହତ କରିଥିବାବେଳେ ଓଡ଼ିଶାର ମୂଳ ଆବେଦନ ଉପରେ କୌଣସି ଅଗ୍ରଗତି ନ ହେବା ଦୁଃଖଦାୟକ। ଛତିଶଗଡ଼ ମହାନଦୀ ଉପରେ ନିର୍ମାଣ କରିଥିବା ବେଆଇନ ପ୍ରକଳ୍ପଗୁଡ଼ିକୁ ସ୍ଥଗିତ ରଖିବା ପାଇଁ ହୋଇଥିବା ଆବେଦନକୁ ଟ୍ରିବ୍ୟୁନାଲ ଏବେ ପର୍ଯ୍ୟନ୍ତ ବିଚାରକୁ ନ ନେବା ଦୁଃଖର ବିଷୟ। ଟ୍ରିବ୍ୟୁନାଲ ଦ୍ୱାରା କାବେରୀ ପରି ମହାନଦୀ ଅବସ୍ଥା ନ ହେଉ ବୋଲି ମହାନଦୀ ବଞ୍ଚାଓ ଆନ୍ଦୋଳନ ସଂଗଠନ କହିଛି। ଶନିବାର ରେଡ଼କ୍ରସ ଭବନରେ ସଂଗଠନ ପକ୍ଷରୁ ମହାନଦୀ ‘ଜଳ ବିବାଦର ସମାଧାନ କ୍ଷେତ୍ରରେ ବିକଳ୍ପ ରାସ୍ତା’ ଉପରେ ଅନୁଷ୍ଠିତ କର୍ମଶାଳାରେ ଏ ନେଇ ଆଲୋଚନା କରାଯାଇଥିଲା। ପୁଣେସ୍ଥିତ ୱାଟର କନ୍ଫ୍ଲିଟ ଫୋରମ ପକ୍ଷରୁ ବିଶିଷ୍ଟ ନଦୀ ଗବେଷକ ଡ. ଟି.କେ. ଜୟ ଏକ ଚିଠା ପ୍ରସ୍ତାବ ଉପସ୍ଥାପନ କରି ସମସ୍ୟା ସମାଧାନର ବିଭିନ୍ନ ଦିଗ ଉପରେ ଗୁରୁତ୍ୱାରୋପ କରିଥିଲେ। ଆମେରିକାର ଇନ୍ଷ୍ଟିଚ୍ୟୁଟ ଫର୍ ୱାଟର କଲଚରର ନିର୍ଦ୍ଦେଶକ ଡ. ଡ଼େଭିଡ଼ ଗ୍ରୋନଫିଟ୍, ଡ. ଆବ୍ରାହମ ସାମୁଏଲ୍, ଡ. ନେହା ଭଡ଼ଭଡ଼େ ପ୍ରମୁଖ ଏହି ଚିଠା ପ୍ରସ୍ତାବ ଉପରେ ଆଲୋଚନା କରିଥିଲେ।
