ପାଲଲହଡ଼ା, ୨୫ା୮(ଡି.ଏନ.ଏ.) – ଜରାଜୀର୍ଣ୍ଣ ଅବସ୍ଥାରେ ଶ୍ରେଣୀ ଗୃହ। କେଉଁଠି କାନ୍ଥ ଫାଟି ଆଁ କରିଛି ତ କେଉଁଠି ବର୍ଷା ହେଲେ କୋଠରିରେ ପାଣି ଜମୁଛି। ଭିତ୍ତିଭୂମି ନ ଥିବା ସାଙ୍ଗକୁ ଶିକ୍ଷକ ଅଭାବ ଆଉ ଏକ ବଡ ସମସ୍ୟା ଅନୁଗୋଳ ଜିଲା ପାଲଲହଡ଼ା ବ୍ଲକ ମୁଣ୍ଡୁରିବେଡା ପଞ୍ଚାୟତର ପ୍ରାଥମିକ ବିଦ୍ୟାଳୟରେ ଲାଗିରହିଛି। ଏବେ ବିଦ୍ୟାଳୟକୁ ଶହେ ବର୍ଷ ପୁରି ସାରିଥିଲେ ମଧ୍ୟ ଏଠାରେ ଆନୁସଙ୍ଗିକ ବ୍ୟବସ୍ଥା କରି ସମସ୍ୟା ସମାଧାନ ଦିଗରେ ବିଭାଗ ଧ୍ୟାନ ନ ଦେବା ନେଇ ଅଭିଭାବକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ଅଭିଭାବକଙ୍କ ଅଭିଯୋଗ ମୁତାବକ, ୧୯୧୮ରେ ସ୍ଥାପିତ ହୋଇଥିବା ଏହି ବିଦ୍ୟାଳୟରେ ପ୍ରଥମରୁ ପଞ୍ଚମ ପର୍ଯ୍ୟନ୍ତ ପାଠ ପଢା ଯାଉଛି। ବର୍ତ୍ତମାନ ସେଠାରେ ୪୪ ଜଣ ଛାତ୍ରୀଛାତ୍ର ପାଠ ପଢୁଥିବାବେଳେ ମାତ୍ର ୩ ଜଣ ଶିକ୍ଷୟିତ୍ରୀ ଶିକ୍ଷକ ନିଯୁକ୍ତ ହୋଇଛନ୍ତି। ଏଥିସହ ୫ଟି ଶ୍ରେଣୀ ପାଇଁ ମାତ୍ର ୩ଟି ଶ୍ରେଣୀଗୃହ ଥିବାବେଳେ ସେଗୁଡିକ ମଧ୍ୟ ଜରାଜୀର୍ଣ୍ଣ ଅବସ୍ଥାରେ ରହିଛି। ବର୍ଷା ହେଲେ ଗୃହରେ ପାଣି ଜମିଯାଉଥିବାରୁ ପାଠପଢାରେ ବାଧାସୃଷ୍ଟି ହେଉଛି। ସେହିପରି ଶ୍ରେଣୀଗୃହ ଝରକା, କବାଟ ମଧ୍ୟ ଭାଙ୍ଗିରୁଜି ଯାଇଥିଲେ ମଧ୍ୟ ଏ ଦିଗରେ ବିଭାଗ କିମ୍ବା ପ୍ରଶାସନ ପକ୍ଷରୁ ଆଦୌ ଦୃଷ୍ଟି ଦିଆଯାଉ ନାହିଁ। ଏଥିଯୋଗୁ ପାଖ ଅଞ୍ଚଳର ଛାତ୍ରୀଛାତ୍ର ଏହି ବିଦ୍ୟାଳୟରୁ ମୁହଁ ଫେରାଉଥିବା ପ୍ରଧାନ ଶିକ୍ଷକ କୁମୁଦ ରଞ୍ଜନ ରଥ କହିଛନ୍ତି I ଏ ସମ୍ପର୍କରେ ପାଲଲହଡ଼ା ବ୍ଲକ ଶିକ୍ଷା ଅଧିକାରୀ ଚିତ୍ତରଞ୍ଜନ ପରିଡାଙ୍କୁ ଯୋଗାଯୋଗ କରିବାରେ କହିଛନ୍ତି, ବିଦ୍ୟାଳୟର ମରାମତି ପୂର୍ବରୁ ଏହା ଜିଲା ପ୍ରକଳ୍ପ ଅଧିକାରୀଙ୍କ ଅଧୀନରେ ଥିଲା। ସେହି ଅନୁସାରେ ଆମ ରିପୋର୍ଟ ଆଧାରରେ କାର୍ଯ୍ୟ ହେଉଥିଲା। କିନ୍ତୁ ଏବେ ଏହା ପଞ୍ଚାୟତ ଅଧୀନକୁ ଚାଲି ଯାଇଛି । ତେବେ ଏହି ବିଦ୍ୟାଳୟର ସମସ୍ୟା ସମ୍ପର୍କରେ ଅବଗତ ଅଛି । ଶୀଘ୍ର ପଞ୍ଚାୟତ କର୍ତ୍ତୃପକ୍ଷ ଏବଂ ବିଡିଓଙ୍କ ସହ ଆଲୋଚନା କରି ସମସ୍ୟାର ସମାଧାନ କରାଯିବ ବୋଲି କହିଛନ୍ତି I
