ସମଗ୍ର ଭାରତରେ ଶୁକବ୍ରାର ଭଗବାନ୍ ଶ୍ରୀକୃଷ୍ଣଙ୍କ ଜନ୍ମାଷ୍ଟମୀ ବହୁ ଧୁମଧାମରେ ପାଳିତ ହେଉଛି। ରାଜ୍ୟର ବିଭିନ୍ନ ମନ୍ଦିର, ଅନୁଷ୍ଠାନ ଓ ସ୍କୁଲରେ ଜନ୍ମାଷ୍ଟମୀ ଉତ୍ସବ ଅନୁଷ୍ଠିତ ହୋଇଥିବା ବେଳେ କୁନି କୁନି ପିଲାଙ୍କୁ ଶ୍ରୀକୃଷ୍ଣ ଓ ରାଧା ବେଶରେ ଦେଖିବାକୁ ମିଳିଛି। ଏହି ଅବସରରେ ବିଭିନ୍ନ ସ୍ଥାନରେ ଭାବନାତ୍ମକ ପରିବେଶ ସୃଷ୍ଟି ହୋଇଛି। ପ୍ରତିବର୍ଷ ବୃନ୍ଦାବନ ଓ ମଥୁରାରେ ବହୁ ଆଡ଼ମ୍ବରରେ ଜନ୍ମାଷ୍ଟମୀ ପାଳନ ହୋଇଥାଏ। ବୃନ୍ଦାବନରେ କୃଷ୍ଣଙ୍କ ଜନ୍ମଦିନ ପାଳନ କରାଯାଉଥିବା ବେଳେ ମଥୁରାରେ ତାଙ୍କର ଜନ୍ମୋତ୍ସବ ମନାଯାଇଥାଏ। ମାସକ ଆଗରୁ ମନ୍ଦିରର ସାଜସଜ୍ଜା, ଦୋଳିମାନ ପ୍ରସ୍ତୁତ ହୋଇଥାଏ। ସବୁଠାରୁ ମୁଖ୍ୟ ଆକର୍ଷଣୀୟ ଥାଏ ଶ୍ରୀକୃଷ୍ଣଙ୍କଠାରେ ଲାଗୁଥିବା ଛପନ ଭୋଗ। ଚଳିତ ଥର ଇଷ୍ଟ ଅଫ୍ କୈଲାଶ ଇସ୍କନ ମନ୍ଦିରରେ ଛପନ ଭୋଗ ସହ ପ୍ରଥମ ଥର ୧୦୦୮ ପ୍ରସାଦର ଭୋଗ କରାଯିବ। ଏଥିରେ ଭାରତର ବିଭିନ୍ନ ରାଜ୍ୟର ଖାଦ୍ୟପେୟ ସଂସ୍କୃତିର ଝଲକ ଦେଖାଯିବ। ୧୦୦୮ ଭୋଗରେ ଗୁଜରାଟ, ମହାରାଷ୍ଟ୍ର, ଓଡ଼ିଶା, ରାଜସ୍ଥାନ ସମେତ ସବୁ ରାଜ୍ୟର ଭୋଗ ଏଥିରେ ସାମିଲ ହେବ। ଛପନ ଭୋଗ କଲେ ଭଗବାନ୍ ପ୍ରସନ୍ନ ହେବା ସହ ଲୋକଙ୍କ ମନସ୍କାମନା ପୂରଣ ହୋଇଥାଏ ବୋଲି ବିଶ୍ୱାସ ରହିଛି। ତେବେ ସମସ୍ତଙ୍କ ମନରେ ପ୍ରଶ୍ନ ଉଙ୍କି ମାରେ ଠାକୁରଙ୍କୁ କାହିଁକି ଲଗାଯାଏ ଛପନ ଭୋଗ। ଏହା ପଛରେ ମଧ୍ୟ ଏକ ପାରମ୍ପରିକ କାରଣ ରହିଛି। ମା’ ଯଶୋଦା କୃଷ୍ଣଙ୍କୁ ଆଠ ପ୍ରହର ବା ଆଠ ଥର ଖାଦ୍ୟ ଖୁଆନ୍ତି। ଦିନେ ଗୋକୁଳରେ ଭାରି ବର୍ଷା ହୋଇଥିବା ବେଳେ ଗୋବର୍ଦ୍ଧନ ପର୍ବତକୁ କୃଷ୍ଣ ନିଜ କାଣି ଆଙ୍ଗୁଠିରେ ଧରି ଗଁାଲୋକଙ୍କୁ ସେଥିରେ ଆଶ୍ରୟ ଦେଇଥିଲେ। ସେହି ସମୟରେ କୃଷ୍ଣ ୭ ଦିନ ପର୍ଯ୍ୟନ୍ତ କିଛି ଖାଇ ନ ଥିଲେ। ବର୍ଷା ଛାଡିବା ପରେ ଯଶୋଦା ଓ ଗୋକୁଳବାସୀ ଆଠ ପ୍ରହର ହିସାବରେ ୭ଦିନକୁ ମିଶାଇ ଛପନ ପ୍ରକାରର ସ୍ବାଦିଷ୍ଟ ବ୍ୟଞ୍ଜନ ତିଆରି କରିଥିଲେ। ସେହି ଦିନରୁ ଛପନ ଭୋଗରେ କୃଷ୍ଣଙ୍କ ମନପସନ୍ଦର ବ୍ୟଞ୍ଜନ ରହିଥାଏ। ଏଥିପାଇଁ କାହିଁ କେତେ ବର୍ଷରୁ ଭଗବାନ୍ ଶ୍ରୀକୃଷ୍ଣଙ୍କୁ ଛପନ ଭୋଗ ଲାଗି କରାଯିବାର ପରମ୍ପରା ରହିଛି।
