ଦେବଗଡ, ୨୫-୯(ଡି.ଏନ.ଏ.):ଚୋରାଚାଲାଣ ବେଳେ ଦେବଗଡ ଜିଲା ବନ ବିଭାଗ ସୋମବାର ଏକ କଲରାପତରିଆ ବାଘ ଛାଲ ଜବତ କରିଛି। ଚାଲାଣରେ ବ୍ୟବହୃତ ବୋଲେରୋ ଓ ବାଇକ ଜବତ ହୋଇଛି। ଏଥିରେ ସମ୍ପୃକ୍ତ ୬ଜଣଙ୍କୁ ଗିରଫ କରାଯାଇଛି। ସେମାନେ ହେଲେ ସୁନ୍ଦରଗଡ ଜିଲା ବଣାଇ ଅଞ୍ଚଳର ସତ୍ୟରଞ୍ଜନ କିସାନ(୧୯), ଦେବଗଡ ଜିଲା ବାରକୋଟ ଥାନା ଅଞ୍ଚଳର ସନାତନ ଲୁହୁରା(୧୯), ତିଲେଇବଣୀ ବ୍ଲକ ପାଳକୁଦର ଗ୍ରାମର ଦେବେନ୍ଦ୍ର ରଣଚୁଳିଆ(୨୭), ଦେବଗଡ ଥାନା ପଳସାକୁଦର ଗ୍ରାମର ବିମ୍ବାଧର ଉଦାବର(୪୦) ଓ ରାଜେଶ ବେହେରା(୩୦), ଦେବଗଡ ପୌରାଞ୍ଚଳ ରଜାମୁଣ୍ଡା ସାହିର ନୀତେଶ ଇନ୍ଦୁଆର(୨୭)। ଏହି ଘଟଣାରେ କିସିଣ୍ଡା ଅଞ୍ଚଳର ସୁରେନ୍ଦ୍ର ପ୍ରଧାନ, ଦେବଗଡ ଥାନା ଅଧୀନ ବଳମ ଗ୍ରାମର ସୁଶାନ୍ତ କୁଲୁ(୩୦), ସୁନ୍ଦରଗଡ ଜିଲା ବଣାଇ ଅଞ୍ଚଳର ରାନୁ ବେହେରାଙ୍କୁ ବନ ବିଭାଗ ଅଟକ ରଖି ପଚରାଉଚରା କରୁଛି।
ସୁନ୍ଦରଗଡ ଜିଲା ଟିକାୟତପାଲି ଥାନା ଅଞ୍ଚଳରୁ ଏକ ବୋଲେରୋରେ ଗୋଟିଏ କଲରାପତରିଆ ବାଘଛାଲ ସମ୍ବଲପୁରକୁ ଚୋରାରେ ଚାଲାଣ ହେଉଥିବା ସୂଚନା ପାଇ ଦେବଗଡ ବନ ବିଭାଗ ଚଢ଼ଉ କରିଥିଲା।
