କଟକ ଅଫିସ,୫।୫: ମେ’ ୪ ଠାରୁ ମଦ ଦୋକାନ ଖୋଲିବ ବୋଲି ଘୋଷଣା ହେବା ସତ୍ତ୍ବେ କଟକ ଜିଲାରେ ଏହା ସମ୍ଭବ ହୋଇପାରିନାହିଁ। ବିଭିନ୍ନ ଠିପି ବନ୍ଦ ବିଦେଶୀ ମଦ ଦୋକାନ ସମ୍ମୁଖରେ ସାମାଜିକ ଦୂରତା ରକ୍ଷା କରାଯିବା ଉଦ୍ଦେଶ୍ୟରେ ଗୋଲେଇ ଟଣାଯିବା ସହ ବାଉଁଶ ବନ୍ଧା ଯାଇଥିଲା। ତଥାପି ବିଭିନ୍ନ ଦ୍ୱନ୍ଦ୍ୱ ଯୋଗୁ କଟକରେ ମଦ ଦୋକାନ ଖୋଲାଯାଇନି। ଏ ପର୍ଯ୍ୟନ୍ତ ରାଜ୍ୟ ଅବକାରୀ ବିଭାଗର ପ୍ରମୁଖ ସଚିବଙ୍କ ନିକଟରୁ ମଦ ଦୋକାନ ଖୋଲିବା ନେଇ କୌଣସି ଚିଠି ଆସିନି ବୋଲି କଟକ ଜିଲା ଅବକାରୀ ବିଭାଗର ସୁପରିଣ୍ଟେଣ୍ଡେଣ୍ଟ ଅଶୋକ କୁମାର ଶତପଥୀ କହିଛନ୍ତି।
କଟକ ଜିଲାକୁ ଗ୍ରୀନ୍ ଜୋନ୍ ଭାବେ ଘୋଷଣା କରାଯିବା ପରେ କରୋନା କଟକଣାକୁ କୋହଳ କରାଯିବ ବୋଲି ଘୋଷଣା ହୋଇଥିଲା। ଏହା ମଧ୍ୟରେ ରହିଥିଲା ମଦ ଦୋକାନ ଖୋଲାଯିବା ପ୍ରସଙ୍ଗ। କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ଏହି ଘୋଷଣା କରାଯାଇଥିବାବେଳେ କଟକ ମହାନଗର ନିଗମ(ସିଏମ୍ସି) ମଧ୍ୟ ମଦ ଦୋକାନ ଖୋଲିବା ନେଇ ଅନୁମତି ଦେଇଥିଲା। କେବଳ ଠିପି ବନ୍ଦ ବିଦେଶୀ ମଦ ଦୋକାନ ଖୋଲିବା ପାଇଁ ନିର୍ଦ୍ଦେଶ ରହିଥିଲା। ଜିଲାରେ ୫୦ଟି ଠିପି ଖୋଲା ବିଦେଶୀ ମଦ ଦୋକାନ ଓ ୧୧୭ ଠିପି ବନ୍ଦ ବିଦେଶୀ ମଦ ଦୋକାନ ରହିଛି। ଗ୍ରୀନ୍ ଜୋନରେ ମଦ ଦୋକାନ ଖୋଲିବା ନେଇ ଘୋଷଣା ହେବା ସତ୍ତ୍ବେ ରାଜ୍ୟ ସରକାରଙ୍କ ପକ୍ଷରୁ ଚିଠି ହୋଇ ନ ଥିବା ଯୋଗୁ ଏଭଳି ଦ୍ୱନ୍ଦ୍ୱ ଉପୁଜିଛି। ସରକାରଙ୍କ ପକ୍ଷରୁ ନିର୍ଦ୍ଦେଶ ମିଳିବା ପରେ ମଦ ଦୋକାନ ଖୋଲାଯିବ ବୋଲି ଶତପଥୀ କହିଛନ୍ତି।
