ବାରିପଦା ଅଫିସ,୨୪ା୫-ମୟୂରଭଞ୍ଜ ଜିଲା ବାରିପଦା ସହରର ବାଲେଶ୍ୱର ଗୋଲେଇସ୍ଥିତ ଜୀବନଦୀପ ହସ୍ପିଟାଲରେ ଚିକିତ୍ସା ଅବହେଳାରୁ ନବଜାତ ଶିଶୁକନ୍ୟାଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ଶିଶୁକନ୍ୟାଙ୍କ ପିତା ବାରିପଦା ତକତପୁର ୱାର୍ଡ଼ ନଂ. ୨୪ର ବାସିନ୍ଦା ରମେଶ ଚନ୍ଦ୍ର ସିଂହ ଏନେଇ ଟାଉନ ଥାନାରେ ଅଭିଯୋଗ କରିଛନ୍ତି।
ଅଭିଯୋଗ ଅନୁସାରେ ଗତ ୧୬ ତାରିଖ ସନ୍ଧ୍ୟାରେ ରମେଶ ତାଙ୍କ ସ୍ତ୍ରୀ ସୁନିତା ଗିଭେଲଙ୍କୁ ପ୍ରସବ ପାଇଁ ହସ୍ପିଟାଲ୍ରେ ଭର୍ତ୍ତି କରିଥିଲେ। ରାତିରେ ତାଙ୍କର ଅସ୍ତ୍ରୋପଚାର ଦ୍ୱାରା ଏକ ଶିଶୁକନ୍ୟା ଜନ୍ମ ହୋଇଥିଲା। ପରେ ଶିଶୁଟି ହଳଦିଆ ଦେଖାଯିବାରୁ ପରିବାର ଲୋକେ ହସ୍ପିଟାଲ୍ କର୍ତ୍ତୃପକ୍ଷଙ୍କୁ ଦେଖାଇବାରୁ ଶିଶୁଟି ସୁସ୍ଥ ଥିବା ସେମାନେ କହିଥିଲେ। ୧୭ ତାରିଖ ସକାଳେ ରମେଶ ଶିଶୁ କନ୍ୟାଙ୍କୁ ବାରିପଦା ପିଆରଏମ୍ ମେଡ଼ିକାଲକୁ ନେଇ ଦେଖାଇଥିଲେ। ସେଠାରେ ଡାକ୍ତର ତାଙ୍କୁ ଏସ୍ଏନ୍ସିୟୁରେ ଭର୍ତ୍ତି କରାଇ ଚିକିତ୍ସା କରାଇଥିଲେ। ଚିକିତ୍ସାର କିଛି ସମୟ ପରେ ଶିଶୁଟି ଗୁରୁତର ହୋଇପଡ଼ିଥିବା ନେଇ ଡାକ୍ତରଖାନା କର୍ତ୍ତୃପକ୍ଷ କହିବା ସହିତ କଟକ ସ୍ଥାନାନ୍ତର କରିଥିଲେ। କଟକ ଶିଶୁ ଭବନରେ ରାତିରେ ପହଞ୍ଚିବା ପରେ ଡାକ୍ତର ସେଠାରେ ଚିକିତ୍ସା କରାଇଥିଲେ। ଅସ୍ତ୍ରୋପଚାର ସମୟରେ ମୁଣ୍ଡରେ ଆଘାତ ହୋଇଥିବାରୁ ଶିଶୁଟିର ମୃତ୍ୟୁ ହୋଇଥିବା ନେଇ ଶିଶୁଭବନ ପକ୍ଷରୁ ରମେଶଙ୍କୁ କୁହାଯାଇଥିଲା। ପରେ ରମେଶ ଶିଶୁ କନ୍ୟାଙ୍କୁ କଟକସ୍ଥିତ ଏକ ଘରୋଇ କ୍ଲିନିକ୍କୁ ନେଇଥିଲେ। ୧୮ ତାରିଖ ସକାଳେ ଶିଶୁକନ୍ୟାକୁ ମୃତ ଘୋଷଣା କରାଯାଇଥିଲା। ଶନିବାର ସକାଳେ ରମେଶଙ୍କ ସ୍ତ୍ରୀ ସୁନିତା ଜୀବନଦୀପ ହସ୍ପିଟାଲ୍ରୁ ଡିସଚାର୍ଜ ହୋଇଥିଲେ। ଏହା ପରେ ରମେଶ ଓ ତାଙ୍କର କେତେଜଣ ସମ୍ପର୍କୀୟ ଜୀବନଦୀପ ହସ୍ପିଟାଲରେ ପହଞ୍ଚି ଡାକ୍ତରଙ୍କ ଚିକିତ୍ସା ଅବହେଳାରୁ ତାଙ୍କ ଶିଶୁ କନ୍ୟାର ମୃତ୍ୟୁ ହୋଇଥିବା ଅଭିଯୋଗ କରି ହୋହଲ୍ଲା କରିଥିଲେ। ହସ୍ପିଟାଲ୍ରେ ଉତ୍ତେଜନା ଦେଖାଦେଇଥିଲା। ପରେ ଏ ସମ୍ପର୍କରେ ରମେଶ ଟାଉନ ଥାନାରେ ଅଭିଯୋଗ କରିଥିଲେ। ଜୀବନଦୀପ ହସ୍ପିଟାଲର ଡାକ୍ତର କେ.ସି ମହାନ୍ତିଙ୍କୁ ପଚାରିବାରୁ ଶିଶୁରୋଗ ବିଶେଷଜ୍ଞ ଚିକିତ୍ସା କରିଥିବା ବେଳେ ଚିକିତ୍ସାରେ କୌଣସି ଅବହେଳା ହୋଇନାହିଁ ବୋଲି କହିଛନ୍ତି। ଏ ନେଇ ଥାନାରେ ଏକ ମାମଲା(ନଂ.୩୩୦/୨୦)ରୁଜୁ ହୋଇ ତଦନ୍ତ କରାଯାଉଥିବା ଟାଉନ ଥାନା ଅଧିକାରୀ ବୀରେନ୍ଦ୍ର ସେନାପତି ପ୍ରକାଶ କରିଛନ୍ତି।
