ବେଲଗାଭି(କର୍ନାଟକ): କଳା ଏବଂ ଶିକ୍ଷା ଦୁଇଟି ବିଷୟରେ ସ୍ନାତକ ଡିଗ୍ରୀ ହାସଲ କରିଛନ୍ତି। ଭଲ ଶିକ୍ଷକଟିଏ ହେବା ପାଇଁ ଲକ୍ଷ୍ୟ ରହିଥିଲା। ଚାହିଁଥିଲେ ଚାକିରିଟିଏ ମଧ୍ୟ ନିଶ୍ଚୟ ପାଇଯାଇଥାନ୍ତେ। ହେଲେ ଚାକିରିକୁ ଏଡ଼ାଇ ଦେଇଥିଲେ। ମାସିକ ୧୬ ହଜାର ଟଙ୍କା ଦରମାରେ ମିଳିବାକୁ ଥିବା ଚାକିରି ପାଇଁ ଯେଉଁ ସର୍ତ୍ତ ରହିଥିଲା, ତାହା ମଞ୍ଜୁର ନ ଥିଲା। ତେଣୁ ନିଜ ଲକ୍ଷ୍ୟ ଏବଂ ଭବିଷ୍ୟତର ରାସ୍ତାକୁ ବଦଳାଇ ଦେଇଥିଲେ। ସେ ଭଲ ଶିକ୍ଷକଟିଏ ହେବାର ସ୍ବପ୍ନ ଅଧୁରା ରହିଗଲା ନିଶ୍ଚୟ। ମାତ୍ର ଏବେ ଜଣେ ସଫଳ ଚାଷୀଭାବେ ଲୋକପ୍ରିୟ ହୋଇପାରିଛନ୍ତି। ସେ ହେଉଛନ୍ତି କର୍ନାଟକ ବେଲାଗାଭି ଜିଲା ଅନ୍ତର୍ଗତ ଶିରୁର୍ ଗ୍ରାମର ୩୮ ବର୍ଷୀୟ ସତୀଶ ଶିଦଗୌଦର। ତାଙ୍କ କହିବା ହେଲା ଚାକିରିଟିଏ ମିଳିଥିଲା। ହେଲେ ମାସକୁ ୧୬ ହଜାର ଟଙ୍କା ଦରମାରେ ମିଳୁଥିବା ଚାକିରି ପାଇଁ ୧୬ ଲକ୍ଷ ଟଙ୍କା ଲାଞ୍ଚ ମାଗିଥିଲେ। ଚାକିରି ମିଳିଯାଉ ବୋଲି ବାପା ନାଗାପ୍ପା ମଧ୍ୟ ଋଣ କରି ଟଙ୍କା ଯୋଗାଡ଼ କରିବାକୁ ଚିନ୍ତା କରୁଥିଲେ। ମାତ୍ର ସତୀଶ ଏହାକୁ ମନା କରିଦେଇଥିଲେ। ଚାକିରି ପଛରେ ନ ଗୋଡ଼ାଇ ବାପାଙ୍କୁ ଚାଷ କାର୍ଯ୍ୟରେ ସାହାଯ୍ୟ କରିବାକୁ ନିଷ୍ପତ୍ତି ନେଇଥିଲେ। ୬୯ ବର୍ଷୀୟ ବାପା ଏବଂ ଦାଦା ପାରମ୍ପରିକ ପ୍ରଣାଳୀରେ ୧୫ ବର୍ଷ ଧରି ବିଭିନ୍ନ ପନିପରିବା ଚାଷ କରୁଥିଲେ। ହେଲେ ଅଧିକ ଲାଭବାନ୍ ହୋଇପାରୁ ନ ଥିଲେ। ସତୀଶ କୃଷି କାର୍ଯ୍ୟରେ ଯୋଗଦେବା ପରେ ଅତ୍ୟାଧୁନିକ ଜ୍ଞାନକୌଶଳ ପ୍ରୟୋଗକରି କୀଟ ପରିଚାଳନା ଏବଂ ଡ୍ରିପ୍ ଇରିଗେଶନ ଦ୍ୱାରା ଚାଷ କ୍ଷେତ୍ର ପାଇଁ ଜଳସେଚନର ସୁବିଧା କରିଥିଲେ; ଯଦ୍ଦ୍ବାରା ସେ ପନିପରିବାର ଗୁଣବତ୍ତା ଏବଂ ଆଦାୟର ପରିମାଣ ବୃଦ୍ଧି କରିବାରେ ସଫଳ ହୋଇପାରିଛନ୍ତି। ଦିନକୁ ଦିନ କଲରାର ଚାହିଦା ବୃଦ୍ଧିକୁ ନଜରରେ ରଖି ସେ ଏହି ଚାଷ କରିବାକୁ ଚିନ୍ତା କରିଥିଲେ। ନିଜର ୫ ଏକର ଜମିରୁ ଦେଢ଼ ଏକରରେ ଗୋଟିଏ ଋତୁରେ ସେ ପ୍ରାୟ ୫୦ ଟନ୍ କଲରା ଉତ୍ପାଦନ କରିପାରୁଛନ୍ତି। ଗତ ବର୍ଷ ସେ ଟନ୍ ପିଛା ୪୮ହଜାର ଟଙ୍କାରେ ବିକ୍ରି କରିଥିବାବେଳେ ଏ ବର୍ଷ ୩୫ହଜାର ଟଙ୍କାରେ ବିକ୍ରି କରିଛନ୍ତି। ଚଳିତ ଋତୁରେ ଏଥିରୁ ସେ ଦିନକୁ ୨୫ହଜାରରୁ ୩୫ହଜାର ଟଙ୍କା ଆଦାୟ କରୁଥିବା କୁହନ୍ତି। ପ୍ରାୟ ଦେଢ଼ଲକ୍ଷ ଟଙ୍କା ବିନିଯୋଗ କରି ବହୁ ଗୁଣ ଲାଭ ପାଉଥିବାବେଳେ ଏହା ସେ କୌଣସି ଚାକିରିରୁ ଆଦାୟ କରିପାରି ନ ଥାନ୍ତେ ବୋଲି ସତୀଶ କୁହନ୍ତି। ଗଛଗୁଡ଼ିକର ସେ ଶିଶୁଙ୍କ ଭଳି ଯତ୍ନ ନେଇଥାନ୍ତି। କଠିନ ପରିଶ୍ରମ ଦ୍ୱାରା ହିଁ ସେ ଏହି ସଫଳତା ପାଇଛନ୍ତି। ଏବେ ତାଙ୍କଠାରୁ ସଫଳ ଚାଷ ପ୍ରଣାଳୀ ଜାଣିବାକୁ ବିଭିନ୍ନ ଜିଲାରୁ ଲୋକେ ସତୀଶଙ୍କ କ୍ଷେତ ନିକଟରେ ପହଞ୍ଚୁଥିବା ସେ କହିଛନ୍ତି। ତେଣୁ କେବଳ ଚାକିରି ପଛରେ ଗୋଡ଼ାଉଥିବା ଯୁବଗୋଷ୍ଠୀଙ୍କ ପାଇଁ ସତୀଶ ପ୍ରେରଣା ନିଶ୍ଚୟ।
