ନୂଆଦିଲ୍ଲୀ, ୭ା୬: ବିଶ୍ୱ ଏବେ ମହାମାରୀ କରୋନାକୁ ନେଇ ଚିନ୍ତିତ। ଚାଇନାର ଉହାନ୍ ସହରରୁ ବ୍ୟାପି ସାରା ବିଶ୍ୱକୁ ଏହି ଭୂତାଣୁ ଥରହର କରିପକାଇଛି। ଆମେରିକା ସମେତ ୟୁରୋପର କେତେକ ଦେଶ ଏଥିଲାଗି ଚାଇନାକୁ ଦୋଷ ଦେଉଛନ୍ତି। ସେପଟେ କିନ୍ତୁ ଅନ୍ତର୍ଜାତୀୟ ସଙ୍ଗଠନଗୁଡ଼ିକୁ ଚାଇନା ଖୁବ୍ଶୀଘ୍ର କରାୟତ୍ତ କରିବାରେ ସଫଳ ହୋଇଛି। ଗତ ସପ୍ତାହରେ ଆମେରିକା ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) ସହ ସମ୍ପର୍କ ଛିନ୍ନ କରିଛି। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, କରୋନା ବ୍ୟାପିବା ନେଇ ବେଜିଂକୁ ଦାୟୀ କରିବାରେ ବିଶ୍ୱ ସ୍ବାସ୍ଥ୍ୟ ସଙ୍ଗଠନ ବିଫଳ ହୋଇଛି। ଏହି ବିଶ୍ୱସ୍ତରୀୟ ସଙ୍ଗଠନକୁ ଚାଇନା କବ୍ଜାକରି ରଖିଛି। ତେଣୁ ଏହି ସଙ୍ଗଠନକୁ ଆମେରିକା ପାଣ୍ଠି ପ୍ରଦାନ କରିବା ସମ୍ପର୍କରେ ପୁନଃବିଚାର କରିବ। ବିଶ୍ୱ ସ୍ବାସ୍ଥ୍ୟ ସଙ୍ଗଠନରେ ଯଦି ମାସକ ମଧ୍ୟରେ ସୁଧାର ନ ଆସେ, ତେବେ ଆମେରିକା ବାଧ୍ୟହୋଇ କଠୋର ନିଷ୍ପତ୍ତି ନେବ ବୋଲି ଟ୍ରମ୍ପ କହିଥିଲେ। ଏଭଳି ନିଷ୍ପତ୍ତି ୟୁରୋପୀୟ ସଂଘରେ ତୀବ୍ର ପ୍ରତିକ୍ରିୟା ସୃଷ୍ଟି କରିଛି। ମହାମାରୀ ବିପତ୍ତି ସମୟରେ ଏଭଳି ନିଷ୍ପତ୍ତିର ପୁନଃସମୀକ୍ଷା କରିବା ଲାଗି ୟୁରୋପୀୟ ସଂଘ ଟ୍ରମ୍ପଙ୍କୁ ଅନୁରୋଧ କରିଛି।
ଭାରତର ପୂର୍ବତନ ବୈଦେଶିକ ସଚିବ ବିଜୟ ଗୋଖଲେ ନ୍ୟୁୟର୍କ ଟାଇମ୍ସ ଆର୍ଟିକିଲରେ ଦର୍ଶାଇଛନ୍ତି, ଆମେରିକା ବିଶ୍ୱ ସ୍ବାସ୍ଥ୍ୟ ସଙ୍ଗଠନରୁ ନିଜକୁ ଦୂରେଇ ଦେବାର ଅର୍ଥ ଚାଇନା ହାତରେ ଖେଳିବା ସଦୃଶ। ଏହା ଚାଇନା ରାଷ୍ଟ୍ରପତି ଜି’ଙ୍କୁ ବେଶ୍ ସୁହାଇବ। ଆମେରିକା ଭାଙ୍ଗିଯାଇ ମୁହଁ ଫେରାଇ ନେଲେ ବିଶ୍ୱକୁ ବିପତ୍ତି ମାଡ଼ିଆସିବ ଓ ଚାଇନା ସୁଯୋଗ ପାଇ ବିଶ୍ୱ ସ୍ବାସ୍ଥ୍ୟ ସଙ୍ଗଠନ, ଜାତିସଂଘ ଭଳି ବିଶ୍ୱସ୍ତରୀୟ ସଙ୍ଗଠନଗୁଡ଼ିକୁ କବ୍ଜା କରିନେବ। ଏହି ଭୟଙ୍କର ଖେଳରେ ଚାଇନା ନିଜ ପ୍ରତିଷ୍ଠାକୁ ବଜାୟ ରଖି ଆଗକୁ ବଢ଼ିବା ସହ ହଂକଂକୁ ନିୟନ୍ତ୍ରଣକୁ ନେବାରେ ସଫଳ ହେବ। ସେମାନଙ୍କ ଭିନ୍ନ ଦୁଇ ଉଦ୍ଦେଶ୍ୟ ସଫଳ ହୋଇଯିବ। ସେଗୁଡ଼ିକ ହେଲା କରୋନାକୁ ନେଇ ହୋଇଥିବା ପ୍ରାରମ୍ଭିକ ତ୍ରୁଟିକୁ ସୁଧାରିବା ଓ ଦେଶର ଛବି ଖରାପ କରିବାକୁ ଉଦ୍ୟମ କରୁଥିବା ଦେଶ ଉପରେ ଆକ୍ରମଣ କରିବା। ଗୋଖଲେ ଉଲ୍ଲେଖ କରିଛନ୍ତି ଯେ, ବିଶ୍ୱ ବ୍ୟବସ୍ଥାକୁ ବଦଳାଇବାରେ ଚାଇନା କେବେ ବି ସଫଳ ହେବନାହିଁ। ଆମେରିକା ପୂର୍ବଭଳି ବିଶ୍ୱର ନେତୃତ୍ୱ ନେବା ଉଚିତ। ବିଶ୍ୱକୁ ଆମେରିକାର ନେତୃତ୍ୱ ଦରକାର। ମାନବୀୟ ସ୍ବାଧୀନତା ଓ ବ୍ୟକ୍ତିତ୍ୱକୁ ଅକ୍ଷୁଣ୍ଣ ରଖିବାରେ ପ୍ରମୁଖ ଭୂମିକା ଗ୍ରହଣ କରିଥିବା ଏହି ଗଣତାନ୍ତ୍ରିକ ଦେଶ ଆଗକୁ ଆସିବା ଦରକାର। ଏକଚ୍ଛତ୍ରବାଦୀ ବେଜିଂ ମଡେଲ ଆର୍ଥତ୍କ ଉତ୍କୃଷ୍ଟତା ଆଣିଦେବ ସତ, ହେଲେ ବ୍ୟାପକଭାବେ ଅନୁକରଣୀୟ ନୁହେଁ। ଗଣତନ୍ତ୍ର ରାଷ୍ଟ୍ର ହିଁ ସାର୍ବଜନୀନ ସିଦ୍ଧାନ୍ତ ଦେଇପାରିବ ଓ ସମସ୍ତେ ଏହାକୁ ସହଜରେ ଗ୍ରହଣ କରିପାରିବେ। ଯଦି ପାଶ୍ଚାତ୍ୟ ଦେଶ ଗଣତନ୍ତ୍ରର ସାର୍ବଜନିନ ଶକ୍ତି ଉପରେ ବିଶ୍ୱାସ ତୁଟାଇବ, ତେବେ ଚାଇନା କେବଳ ଭାରତ, ଇଣ୍ଡୋନେସିଆ, ଘାନା କି ଉରୁଗୁଏ ନୁହେଁ ବିଶ୍ୱକୁ କରାୟତ୍ତ କରିବାରେ ସଫଳ ହୋଇଯିବ ବୋଲି ଗୋଖଲେ ଦର୍ଶାଇଛନ୍ତି।
