ନୂଆଦିଲ୍ଲୀ, ୬।୬: ଭାରତ-ଚାଇନା ସୀମାରେ ଉତ୍ତେଜନା ବୃଦ୍ଧି ପାଇଥିବାବେଳେ ଏବେ ଯୋଗଗୁରୁ ବାବା ରାମଦେବଙ୍କ ମନ୍ତବ୍ୟ ନେଇ ଚର୍ଚ୍ଚା ଆରମ୍ଭ ହୋଇଛି। ରାମଦେବ କହିଛନ୍ତି ଯେ, ଚାଇନାକୁ ବୁଦ୍ଧି ଶିଖାଇବା ପାଇଁ ଅସ୍ତ୍ରଶସ୍ତ୍ରର ଆବଶ୍ୟକତା ନାହିଁ। ଭାରତର ଲୋକେ ଚାଇନା ସାମଗ୍ରୀ ବହିଷ୍କାର କଲେ ଏହା ସମ୍ଭବ ହୋଇପାରିବ ବୋଲି ରାମଦେବ କହିଛନ୍ତି। ଚାଇନା ଭାରତରେ ୧୫ରୁ ୨୦ ଲକ୍ଷ କୋଟି ଟଙ୍କାର କାରବାର କରିଥାଏ। ଭାରତରେ ଟଏଲେଟ୍ ସିଟ୍ଠାରୁ ଆରମ୍ଭ କରି କଣ୍ଢେଇ ପର୍ଯ୍ୟନ୍ତ ସମସ୍ତ ସାମଗ୍ରୀ ଚାଇନାରୁ ହିଁ ଆସିଥାଏ। ଏହାର ବ୍ୟବହାର ବନ୍ଦ କରିବା ଲାଗି ଭାରତୀୟଙ୍କୁ ସଂକଳ୍ପ ନୋବକୁ ପଡ଼ିବ ବୋଲି ରାମଦେବ ଆହ୍ବାନ ଦେଇଛନ୍ତି। କରୋନା ସଙ୍କଟରେ ଆର୍ଥିକ ସୁଧାର ପାଇଁ ରାମଦେବ ସରକାରଙ୍କୁ ୩ଟି ପରାମର୍ଶ ଦେଇଛନ୍ତି। ଏକ ସ୍ବତନ୍ତ୍ର ଆର୍ଥିକ କ୍ଷେତ୍ର ନିର୍ମାଣ କରି ଚାଇନା ସାମଗ୍ରୀର ବିକଳ୍ପ ଉପଲବ୍ଧ କରାଇବା ଲାଗି ପ୍ରୟାସ କରୁଥିବା କମ୍ପାନୀଙ୍କୁ ପ୍ରୋତ୍ସାହନ ଦେବାକୁ ସେ କହିଛନ୍ତି। ଏହା ସହିତ ଚାଇନାରୁ ଆସୁଥିବା ସାମଗ୍ରୀ ଉପରେ ଶୁଳ୍କ ବଢ଼ାଇବାକୁ ସେ କହିଛନ୍ତି। ସେହିପରି ଦେଶରେ ଶିଳ୍ପ ବିକାଶ ଉପଯୋଗୀ ପରିବେଶ ସୃଷ୍ଟି ଉପରେ ସରକାର ଗୁରୁତ୍ୱଦେବା ଆବଶ୍ୟକ ବୋଲି ସେ କହିଛନ୍ତି।
