ମାଦ୍ରିଦ୍,୨୬।୨: ସାରା ବିଶ୍ବରେ କରୋନା ଭାଇରସ୍ ଏବେ କାୟା ବିସ୍ତାର କରି ଚାଲିଛି। ପ୍ରଥମେ ଚାଇନାର ଉହାନ ସହରରୁ ସୃଷ୍ଟ ଏହି ଭାଇରସ୍ ସଂକ୍ରମଣ ଏବେ ବିଭିନ୍ନ ଦେଶକୁ ବ୍ୟାପୁଛି। ସ୍ପେନରେ କରୋନା ଭାଇରସ୍ର ପ୍ରଥମ ରୋଗୀ ଚିହ୍ନଟ ହୋଇଛନ୍ତି। ଜଣେ ଇଟାଲିଆନ୍ ଡାକ୍ତରଙ୍କ ରକ୍ତ ନମୁନା ପଜିଟିଭ୍ ଆସିଥିବା ଜଣାପଡ଼ିଛି। ନମୁନା ରିପୋର୍ଟ ଆସିବା ପରେ କେନରୀ ଦ୍ୱୀପସ୍ଥିତ ଟେନେରିଫ୍ର ଏକ ହୋଟେଲରେ ତାଙ୍କୁ ଅଟକ ରଖାଯାଇଛି। ସ୍ଥାନୀୟ ଗଣମାଧ୍ୟମ ଅନୁସାରେ ଏଚ୍-୧୦ କୋଷ୍ଟା ଏଡିଜେ ପ୍ୟାଲେସ୍ ହୋଟେଲରେ ରହୁଥିବା ଶହ ଶହ ଲୋକଙ୍କୁ ସେମାନଙ୍କ ରୁମ୍ରେ ରହିବା ପାଇଁ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି। ପ୍ରଥମେ ସେମାନଙ୍କର ସ୍ବାସ୍ଥ୍ୟ ପରୀକ୍ଷା କରାଯିବ। ଏହାପରେ ଆଗକୁ କ’ଣ କରାଯିବ, ସେ ନେଇ ନିଷ୍ପତ୍ତି ନିଆଯିବ ବୋଲି ସ୍ବାସ୍ଥ୍ୟ ବିଭାଗ କହିଛି। ସୂଚନାଯୋଗ୍ୟ, ସମ୍ପୃକ୍ତ ସଂକ୍ରମିତ ଡାକ୍ତର ହେଉଛନ୍ତି ଲୋମବାର୍ଡି ଅଞ୍ଚଳର। ଯେଉଁଠାରେ ଇଟାଲିଆନ୍ ଅଧିକାରୀମାନେ ଉକ୍ତ ଭାଇରସ୍ ପ୍ରକୋପର ସାମ୍ନା କରୁଛନ୍ତି। ତେବେ ସ୍ପେନ୍ରେ ଏହି ଘଟଣା ପ୍ରଥମ ହୋଇଥିବା ବେଳେ ସଂକ୍ରମଣକୁ ରୋକିବା ପାଇଁ ସ୍ବାସ୍ଥ୍ୟ ବିଭାଗ ସହରର ପଞ୍ଚତାରକା ଥିବା ୪ଟି ହୋଟେଲରେ ରହୁଥିବା ଅତିଥିଙ୍କ ଉପରେ ତୀକ୍ଷ୍ଣ ନଜର ରଖିବାକୁ ନିର୍ଦ୍ଦେଶ ଦିଆଯାଇଛି।
