ରସୁଲପୁର,୪ା୧(ଡି.ଏନ.ଏ): ଏକଦା ହିନ୍ଦୁ ସଂସ୍କୃତି ଓ ପରମ୍ପରାର ପ୍ରଚାର, ପ୍ରସାର ଦିଗରେ ପାଲା ଏକ ବଳିଷ୍ଠ ମାଧ୍ୟମ ଥିଲା। ସାଂସ୍କୃତିକ କାର୍ଯ୍ୟକ୍ରମରେ ପାଲା ପରିବେଷଣକୁ ଅଧିକ ଗୁରୁତ୍ୱ ଦିଆଯାଉଥିଲା। ଆଧୁନିକ ଚାକଚକ୍ୟ ଭିତରେ ପାଲା ଗୁରୁତ୍ୱହୀନ ହୋଇପଡିଛି। ଏବେ ବିଭିନ୍ନ ସ୍ଥାନରେ ସାଂସ୍କୃତିକ ମଞ୍ଚଗୁଡିକରେ ପାଲା ପରିବେଷଣ କ୍ୱଚିତ ଦେଖିବାକୁ ମିଳୁଛି। ଏଭଳି ସ୍ଥିତିରେ ପାଲା ପ୍ରେମରେ ବନ୍ଧା ପଡିଛନ୍ତି ବିଷ୍ଣୁଚରଣ ଜେନା। ବୟସ ୯୦ ଛୁଇଁଲାଣି, ହେଲେ ତାଙ୍କର ପାଲା ପ୍ରତି ଆକର୍ଷଣ ଏବେ ବି ଅତୁଟ ରହିଛି। ଜୀବନ କାଳରେ ସେ ସମଗ୍ର ରାଜ୍ୟ ବୁଲି ପାଲା ଦର୍ଶକ ସାଜିବାକୁ ଆଶା ବାନ୍ଧିଛନ୍ତି। ତେବେ ପାଲା ପ୍ରତି ବିଷ୍ଣୁଚରଣଙ୍କ ପ୍ରବଳ ଇଚ୍ଛା, ପାଲା ପରିବେଷଣ ସମୟରେ ଗାୟକ ଓ ବାହକଙ୍କ ଛାନ୍ଦ ଓ ଶ୍ଲୋକ ଅଂଶକୁ ଆବୃତ୍ତି କରି ସାଧାରଣରେ ପ୍ରଶଂସିତ ହୋଇପାରିଛି। ବୟସର ଅପରାହ୍ନରେ ବି ତାଙ୍କ ସ୍ମରଣ ଶକ୍ତି ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।
ରସୁଲପୁର ବ୍ଲକ ସୀମାବର୍ତ୍ତୀ ଅଞ୍ଚଳରେ ଅବସ୍ଥିତ ଯାଜପୁର ବ୍ଲକ ଅଧୀନ ବେରୁଦା ପଞ୍ଚାୟତରେ ବିଷ୍ଣୁଙ୍କ ଘର। ସେ ପେଶାରେ ଯାଜପୁର ଉପଜିଲାପାଳଙ୍କ କାର୍ଯ୍ୟାଳୟରେ ପିଅନ ଭାବେ କାମ କରୁଥିଲେ। ଛୋଟବେଳୁ ତାଙ୍କର ମନରେ ପାଲା ପ୍ରତି ଅତ୍ୟନ୍ତ ଦୁର୍ବଳତା ରହିଛି। ୨୦ବର୍ଷ ବୟସରୁ ସେ ପାଲା ଦେଖିବା ପାଇଁ ଜିଲା ବାହାରକୁ ଯାଇଛନ୍ତି। ସେବେଠାରୁ ସେ ବିଭିନ୍ନ ସ୍ଥାନକୁ ବୁଲି ପାଲା ଦେଖି ଆସୁଛନ୍ତି। ଏବେ ସୁଧା ଯାଜପୁର ଜିଲା ଛଡା କେନ୍ଦ୍ରାପଡା, ଜଗତସିଂହପୁର, ଖୋର୍ଦ୍ଦା, କଟକ, ଭଦ୍ରକ, କେନ୍ଦୁଝର, ପୁରୀ, ଢେଙ୍କାନାଳ ଭଳି ୧୩ଟି ଜିଲା ବୁଲି ପାଲା ଦେଖି ସାରିଲେଣି। ସେ ଦୈନିକ ଅଫିସ କାର୍ଯ୍ୟ ସାରିବା ପରେ ଯାଜପୁର ଓ ପଡୋଶୀ ଜିଲାର ଯେଉଁଠି ପାଲା ହେଉଥାଏ ସେଠାକୁ ଯାଇ ରାତିରେ ପାଲା ଦେଖି ଫେରି ଆସି ସକାଳେ ଅଫିସ କାର୍ଯ୍ୟରେ ଯୋଗ ଦେଇଥାନ୍ତି। ଏହା ଭିତରେ ସେ ୩୦ଜଣ ଗାହାଣଙ୍କ ପାଲା ପରିବେଷଣ ଦେଖି ସାରିଛନ୍ତି। ଅବସର ପରେ ତାଙ୍କୁ ପେନସନ୍ ବାବଦକୁ ମିଳୁଥିବା ଟଙ୍କାରୁ ଅଧା ଅର୍ଥ ସେ ଘରକୁ ଦେଉଛନ୍ତି। ବଳକା ଅର୍ଥକୁ ସେ ବିଭିନ୍ନ ସ୍ଥାନ ବୁଲି ପାଲା ଦେଖିବାରେ ବ୍ୟୟ କରୁଛନ୍ତି। ଏ ଦିଗରେ ତାଙ୍କର ପରିବାରର କୌଣସି ଆପତ୍ତି ନାହିଁ। ଆରମ୍ଭରୁ ସ୍ତ୍ରୀଙ୍କ ବାରଣ ରହୁଥିଲା, ମାତ୍ର ପରେ ସେ ଏ ଦିଗରେ ତାଙ୍କୁ ସହଯୋଗ କରିଆସୁଛନ୍ତି ବୋଲି ବିଷ୍ଣୁଚରଣ ଧରିତ୍ରୀକୁ କହିଛନ୍ତି। ତେବେ ପାଲା ପ୍ରତି ତାଙ୍କର ଅଜବ ନିଶା ଆଗରେ ସବୁ କିଛି ହାର ମାନିଛି ବୋଲି କୁହାଯାଉଛି।
