ଖପ୍ରାଖୋଲ,୧୧ା୪(ଡି.ଏନ.ଏ.): ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଅଞ୍ଚଳରେ ହାତୀ ଉପଦ୍ରବ ଦେଖାଦେଇଛି। ବ୍ଲକ ଅନ୍ତର୍ଗତ ହନୁପାଲି ଗାଁରେ ଶୁକ୍ରବାର ବିଳମ୍ବିତ ରାତିରେ ହାତୀ ଆକ୍ରମଣରେ ଜଣେ ବୃଦ୍ଧାଙ୍କ ଜୀବନ ଯାଇଛି। ମୃତା ହେଲେ ବେଲମତୀ ବରିହା(୯୦)। ହାତୀ ଆକ୍ରମଣରୁ ତାଙ୍କ ପୁଅ ବର୍ତ୍ତି ଯାଇଛନ୍ତି। ସୂଚନା ଅନୁସାରେ ବିଳମ୍ବିତ ରାତିରେ ହାତୀ ବେଲମତୀଙ୍କ ଘର ଭାଙ୍ଗି ଥିଲା। ଏହି ସମୟରେ ସେ ଘରେ ଶୋଇଥିବାବେଳେ ତାଙ୍କୁ ଦଳି ଦେଇଥିଲା ହାତୀ। କାନ୍ଥ ଭାଙ୍ଗି ପଡିବା ଶଦ୍ଦ ଶୁଣି ଘରେ ଶୋଇଥିବା ତାଙ୍କ ପୁଅ ଦୌଡି ପ୍ରାଣ ବିକଳରେ ପଳାଇଥିଲେ। ପରେ ହାତୀ ଘରେ ଥିବା ଧାନ, ଚାଉଳ ଖାଇ ସେଠାରୁ ପଳାଇ ଯାଇଥିଲା। ଖବର ପାଇ ସ୍ଥାନୀୟ ଲୋକେ ଏବଂ ବନ ବିଭାଗ କର୍ମଚାରୀ ବୃଦ୍ଧାଙ୍କୁ ଉଦ୍ଧାର କରି ପ୍ରଥମେ ଖପ୍ରାଖୋଲ ଡାକ୍ତରଖାନା ଏବଂ ପରେ ପାଟଣାଗଡ ଉପଖଣ୍ଡ ଡାକ୍ତରଖାନାକୁ ନେଇଥିଲେ। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ା କିଛି ଦିନ ତଳେ ଖପ୍ରାଖୋଲ ସୀମାନ୍ତ ପଦ୍ମପୁର ଅଞ୍ଚଳରେ ହାତୀପଲ ୪ଜଣଙ୍କୁ ଦଳି ମାରିଥିବାବେଳେ ଏବେ ଗନ୍ଧମାର୍ଦ୍ଦନ ପାହାଡ ତଳି ଅଞ୍ଚଳରେ ଆତଙ୍କ ଖେଳାଇଛନ୍ତି। ଏ ନେଇ ହରିଶଙ୍କର ରେଞ୍ଜ ଅଧିକାରୀ ଶ୍ରୀବତ୍ସ କୁମୁରାଙ୍କୁ ପଚାରିବାରୁ ଶୁକ୍ରବାର ଭାନପୁର ଅଞ୍ଚଳରେ ହାତୀ ଥିବା ଜାଣି ପାଟ୍ରୋଲିଂ କରିଥିଲୁ। ରାତିରେ ହନୁପାଲିରେ ହାତୀ ଆକ୍ରମଣ ଜାଣି ସେଠାକୁ ଯିବା ସହ ଗୁରୁତର ବୃଦ୍ଧାଙ୍କୁ ଚିକତ୍ସା ପାଇଁ ନେଇଥିଲୁ ା ହାତୀପଲଙ୍କ ଗତିବିଧି ଉପରେ ଲକ୍ଷ୍ୟ ରଖାଯାଇଛି। ମୃତକଙ୍କ ନିକଟ ସମ୍ପର୍କୀୟଙ୍କୁ ବନ ବିଭାଗ ପକ୍ଷରୁ ୪ଲକ୍ଷ ଟଙ୍କାର କ୍ଷତିପୂରଣ ଦିଆଯିବ ବୋଲି ସେ କହିଛନ୍ତି।
