ମୁମ୍ବାଇ,୨୬। ୩: ଲକ୍ଡାଉନ ଘୋଷଣା ଲାଗି ଦେଶର ପ୍ରମୁଖ ଇ-କମର୍ସ କମ୍ପାନୀଗୁଡିକ ସେମାନଙ୍କ ସେବାକୁ ବନ୍ଦ ଘୋଷଣା କରିଛନ୍ତି। ଏହି ସମୟରେ ପ୍ରମୁଖ ସୁପରମାର୍କେଟ ଚେନ୍ ବିଗ ବଜାର ପକ୍ଷରୁ ଘରେ ଘରେ ସାମଗ୍ରୀ ଡେଲିଭରି କରିବା ସୁବିଧା ହାତକୁ ନେଇଛି। କମ୍ପାନୀର ଏହି ସୁବିଧା ଭୁବନେଶ୍ୱର ସହ ନୂଆଦିଲ୍ଲୀ, ମୁମ୍ବାଇ, ବାଙ୍ଗାଲୋର ତଥା ଗୁରୁଗ୍ରାମ ଭଳି ସହରରେ ଉପଲବ୍ଧ ହେବ। ବୁଧବାର ଏ ନେଇ କମ୍ପାନୀ ପକ୍ଷରୁ ଏକ ବୟାନ ଜାରି କରାଯିବା ସହ ଗ୍ରାହକଙ୍କୁ ଏସ୍ଏମ୍ଏସ୍ ଦ୍ୱାରା ଅବଗତ କରାଯିବା ସହ ମୋବାଇଲ ନମ୍ବରରେ ସମ୍ପର୍କ କରିବାକୁ କୁହାଯାଇଛି। କଟକଣା ଯୋଗୁ ହୋମ ଡେଲିଭରି କିଛି ସମୟ ଅଧିକ ଲାଗିପାରେ ମାତ୍ର ଗ୍ରାହକଙ୍କ ଆବଶ୍ୟକତା ଆଧାରରେ ତ୍ୱରିତ ପଦକ୍ଷେପ ନେବାକୁ ସବୁ ସୁବିଧା କରାଯାଇଛି ବୋଲି ବିଗ୍ ବଜାର ପକ୍ଷରୁ ସୂଚନା ରହିଛି। କିଶୋର ବିୟାନୀଙ୍କ ନେତୃତ୍ୱାଧିନ ଫ୍ୟୁଚର ଗ୍ରୁପ ରାଞ୍ଚି, ଉତ୍ତରାଖଣ୍ଡ, ନଏଡା, ଗାଜିଆବାଦ, ମଧ୍ୟପ୍ରଦେଶ, ହିମାଞ୍ଚଳ ପ୍ରଦେଶ, ଜମ୍ମୁ, ପଞ୍ଜାବ, ହରିୟାଣା, ଫରିଦାବାଦ, ଗୁଜରାଟ ଏବଂ ରାଜସ୍ଥାନ ଭଳି ସହରରେ ଏହି ସେବା ଆରମ୍ଭ କରିଛି। ଇ-କମର୍ସ ଗ୍ରୋସରୀ ଆପ୍ ଗ୍ରୋଫର୍ସ, ବିଗ୍ ବାସ୍କେଟ, ଦୁଧଓ୍ବାଲେ ଡଟ୍କମ୍ରୁ ଏବେ ସେବା ଉପଲବ୍ଧ ହୋଇପାରୁନାହିଁ। ସାମଗ୍ରୀ ଯୋଗାଣ ବିଳମ୍ବ ହେବା ନେଇ ଗ୍ରୋଫର୍ସ ଆମାଜନ ଗ୍ରାହକଙ୍କୁ ଅବଗତ କରାଇ ଦେଇଛନ୍ତି। ଏବେ ବିଗ୍ ବାସ୍କେଟ କେବଳ କ୍ଷୀର ଯୋଗାଣ କରୁଛି।
