ବନ୍ତଳା,୨୬ା୧୨ – ଅନୁଗୋଳ ଜିଲା ସାତକୋଶିଆ ଅଭୟାରଣ୍ୟ ମଧ୍ୟରେ ଏପରି ଏକ ଗଁ। ଅଛି ଯେଉଁଠି ମୋବାଇଲ ଫୋନ ସେବା ପାଇବାକୁ ଅନେକ ହଇରାଣ ହେବାକୁ ପଡ଼ୁଛି ଲୋକଙ୍କୁ। ଦାମୀ ଆଣ୍ଡ୍ରଏଡ୍ ସେଟ୍ ରଖିଥିଲେ ବି ଗଁ।ରେ ଆସୁନି ନେଟଓ୍ବର୍କ। ତେଣୁ କାହା ସହ କଥା ହେବାକୁ ହେଲେ ସେମାନଙ୍କୁ ଗଁାଠାରୁ ୫ କିମି ଦୂରକୁ ଯିବାକୁ ପଡ଼ୁଛି। ଏପରି କ୍ଷେତ୍ରରେ ବିକଳ୍ପ ସାଜିଛି ଗ୍ରାମର ବସନ୍ତ ରାଉତଙ୍କ ଫିଚର ଫୋନ। ତାଙ୍କ ଦୋକାନ ସମ୍ମୁଖ ବଉଳ ଗଛ ନିକଟରେ ଏକ ଘରୋଇ କମ୍ପାନୀର ନେଟଓ୍ବର୍କ କେବଳ ସେହି ଫୋନରେ ଆସୁଛି। କିନ୍ତୁ ସେଥିପାଇଁ ତାଙ୍କୁ ମୋବାଇଲ ଫୋନକୁ ଗଛରେ ଝୁଲାଇବାକୁ ପଡ଼ୁଛି। କେବଳ ଗଁ। ଲୋକେ ନୁହନ୍ତି, ପ୍ରଶାସନ ନିକଟରେ ମଧ୍ୟ ଏହି ଖବର ରହିଛି। ଜରୁରୀ ସମୟରେ ପ୍ରଶାସନ ବସନ୍ତଙ୍କ ସେହି ଫୋନ ମାଧ୍ୟମରେ ଗଁ। ଲୋକଙ୍କ ନିକଟକୁ ବାର୍ତ୍ତା ପଠାଉଥିବା ବେଳେ ଗ୍ରାମବାସୀ ବି ଆବଶ୍ୟକସ୍ଥଳେ ଲାଉଡସ୍ପିକର ଦେଇ ଅନ୍ୟ ସହ କଥା ହୋଇପାରୁଛନ୍ତି।
ସାତକୋଶିଆ ଆଭୟରଣ୍ୟ ମଧ୍ୟରେ ଥିବା ଏହି ଗଁ। ହେଲା କୋଠଭୂଇଁ ପଞ୍ଚାୟତର ଦଣ୍ଡାବାହାଳି ଗ୍ରାମ। ଏଠାରେ ୭୨ ପରିବାର ରହୁଥିବା ବେଳେ ପ୍ରାୟ ଲୋକଙ୍କ ନିକଟରେ ମୋବାଇଲ ରହିଛି। ହେଲେ ନେଟ୍ଓ୍ବର୍କ ନ ଥିବା ଯୋଗୁ ସେସବୁ ବେକାର। ଗଁାଠାରୁ ଦୂରକୁ ଗଲେ କାହା ସହ କଥାବାର୍ତ୍ତା କରିବା ସମ୍ଭବ ହେଉଛି। କିନ୍ତୁ ଜରୁରୀ ପରିସ୍ଥିତିରେ ଆମ୍ବୁଲାନ୍ସ, ଦମକଳ, ଥାନାକୁ ଯୋଗାଯୋଗ କରିବାକୁ ହେଲେ ସେମାନଙ୍କୁ ବସନ୍ତଙ୍କ ସହଯୋଗ ନେବାକୁ ପଡ଼ୁଛି। ଗଛରେ ବସନ୍ତ ଓହଳାଇଥିବା ଉକ୍ତ ଫିଚର ଫୋନରେ ଲାଉଡସ୍ପିକର ଦେଇ କଥାକରି ହେଉଛି। ଏ ସମ୍ପର୍କରେ ବସନ୍ତ କହିଛନ୍ତି, ଗଁା ଲୋକଙ୍କ ସୁବିଧା ପାଇଁ ତାଙ୍କୁ ଭୋର ୪ଟାରୁ ରାତି ୯ଟା ପର୍ଯ୍ୟନ୍ତ ଗଛରେ ମୋବାଇଲ ଫୋନ ଝୁଲାଇ ରଖିବାକୁ ପଡ଼ୁଛି। ଗଁାର କାହା ପାଇଁ କିଛି ଖବର ଥିଲେ ବାହାର ଲୋକେ ତାଙ୍କ ମୋବାଇଲକୁ ହିଁ ଯୋଗାଯୋଗ କରୁଛନ୍ତି। ଏପରି କି ପ୍ରଶାସନ ପକ୍ଷରୁ କୌଣସି ସୂଚନା ଆସିଲେ ସେ ତାହା ଗଁା ଲୋକଙ୍କୁ ଜଣାଇ ଦେଉଛନ୍ତି। କେହି ଚାହିଁଲେ ତାଙ୍କ ଫୋନରୁ ଅନ୍ୟ କାହା ସହ କଥା ମଧ୍ୟ ହୋଇପାରୁଛନ୍ତି। ଏହି ସାହାଯ୍ୟ ସହଯୋଗ ପାଇଁ ସେ କେବେ ଅର୍ଥ ନେଇନାହାନ୍ତି କି ଦାବି ମଧ୍ୟ କରିନାହାନ୍ତି। କିନ୍ତୁ ଫୋନ କରିବା ବେଳେ ଟିକେ ହଲଚଲ ହୋଇଗଲେ ନେଟଓ୍ବର୍କ ଚାଲିଯିବାର ଭୟ ଥିବାରୁ ଲାଉଡସ୍ପିକର ଦେଇ କଥା ହେବାକୁ ପଡ଼ୁଥିବା ବସନ୍ତ ପ୍ରକାଶ କରିଛନ୍ତି। ଆଶାକର୍ମୀ ଉପାସୀ ଦେହୁରୀ କହିଛନ୍ତି, ଗର୍ଭବତୀ ମହିଳାଙ୍କ ସମ୍ପର୍କରେ ବସନ୍ତ ବାବୁଙ୍କ ନମ୍ବରରୁ ଖବର ପାଇବା ପରେ ତୁରନ୍ତ ୧୦୮ କି ୧୦୨ ଆମ୍ବୁଲାନ୍ସକୁ ଯୋଗାଯୋଗ କରିଥାଏ। ସମସ୍ତଙ୍କ ପାଇଁ ସେହି ଗୋଟିଏ ଫୋନ ହିଁ ଭରସା। ଗଁାର ପ୍ରକାଶ ଚନ୍ଦ୍ର ପ୍ରଧାନ, ବିଜୟ ପ୍ରଧାନ, ତ୍ରିଲୋଚନ ପ୍ରଧାନ, କୈଳାଶ ପ୍ରଧାନ, ସଙ୍ଗୀତା ଜେନା କହିଛନ୍ତି, ବନ୍ଧୁ ଘର ହେଉ କି ଝିଅର ଶାଶୁ ଘର ଯୋଗାଯୋଗ ପାଇଁ ସମସ୍ତଙ୍କୁ ବସନ୍ତଙ୍କ ନମ୍ବର ହିଁ ଦିଆଯାଇଛି। ଫୋନ ଆସିବା ମାତ୍ରେ ସେ ଖବର ପଠାନ୍ତି। କିଛି ସମୟ ପରେ ସେହି ନମ୍ବରକୁ ଫୋନ କରି କଥା ହୋଇଥାଉ। ଯେତେ ଥର ଫୋନ କଲେ କି ଆସିଲେ ବସନ୍ତ ଖରାପ ଭାବନ୍ତି ନାହିଁ। ଏଥିପାଇଁ ସେ ପ୍ରଶଂସାର ପାତ୍ର ବୋଲି ଦଣ୍ଡାବାହାଳିବାସୀ ପ୍ରକାଶ କରିଛନ୍ତି।
