ନୂଆଦିଲ୍ଲୀ,୨୨।୭: କଂଗ୍ରେସରେ ଅଧ୍ୟକ୍ଷ ପଦ ନେଇ ସଙ୍କଟ ଜାରି ରହିଛି। ଏନେଇ ବରିଷ୍ଠ କଂଗ୍ରେସ ନେତା ନଟଓ୍ବର ସିଂ କହିଛନ୍ତି ଯେ, ଗାନ୍ଧୀ ପରିବାର ସଦସ୍ୟ ଦଳର ଅଧ୍ୟକ୍ଷ ନ ହେଲେ ୨୪ଘଣ୍ଟା ମଧ୍ୟରେ କଂଗ୍ରେସ ଦଳ ଭାଙ୍ଗିଯିବ। ରାହୁଲ ଗାନ୍ଧୀ ଅଧ୍ୟକ୍ଷ ପଦ ନେବାକୁ ଚାହୁଁ ନ ଥିବାରୁ ତାଙ୍କ ସ୍ଥାନରେ କଂଗ୍ରେସ ରାଷ୍ଟ୍ରୀୟ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରାଙ୍କୁ ଏହି ପଦବୀ ଦେବାର ଆବଶ୍ୟକତା ରହିଛି। ଦଳରେ ପ୍ରିୟଙ୍କାର ମଧ୍ୟ ବିଶେଷ ଲୋକପ୍ରିୟତା ରହିଛି ବୋଲି ସେ କହିଛନ୍ତି। ଗାନ୍ଧୀ ପରିବାର ସଦସ୍ୟଙ୍କ ବଦଳରେ ଅନ୍ୟ କେହି ଦଳର ଅଧ୍ୟକ୍ଷ ହେଲେ ଦଳ ଭାଗ ଭାଗ ହେବାର ଆଶଙ୍କା ଥିବା ନଟଓ୍ବର କହିଛନ୍ତି। ନଟଓ୍ବରଙ୍କ ମନ୍ତବ୍ୟ ନେଇ ଏବେ ଚର୍ଚ୍ଚା ଆରମ୍ଭ ହୋଇଛି।
