ଗାଁକୁ ନାହିଁ ରାସ୍ତା: ପୁଣି ଖଟିଆରେ ବୁହାହେଲେ ଗର୍ଭବତୀ
6:38 pmJanuary 9, 2020 / 06

ସୁନ୍ଦରଗଡ଼,୯।୧(ଡି.ଏନ୍‌.ଏ.): ପୁଣି ଖଟିଆରେ ବୁହାହେଲେ ଗର୍ଭବତୀ। ସୁନ୍ଦରଗଡ଼ ଜିଲା ଲେଫ୍ରିପଡା ବ୍ଲକ ସରଫଗଡ଼ ପଞ୍ଚାୟତ ହାତୀଟୁକୁ ଗାଁର ଜଣେ ମହିଳାଙ୍କୁ ଖଟିଆ ବୋହି ୨ କିମି ଆଣିବା ପରେ ଆମ୍ବୁଲାନ୍ସ ଯୋଗେ ମେଡିକାଲ ଅଣାଯାଇଛି। ମହିଳାଜଣକ ହେଲେ ଏମ୍ବ୍ରିତା ଆଇନ୍ଦ। ସେ ଏବେ ଛଅ ମାସର ଗର୍ଭବତୀ। ଏମ୍ବ୍ରିତା ସକାଳେ ରୋଷେଇ କରୁଥିବା ବେଳେ ଡିବିରିରୁ ତାଙ୍କ କାନିରେ ନିଆଁ ଲାଗିଯାଇଥିଲା। ଏଥିରେ ତାଙ୍କ ଗୋଡ଼ ପୋଡ଼ିଯିବା ପରେ ପରିବାର ଲୋକେ ତାଙ୍କୁ ମେଡିକାଲ ନେବାପାଇଁ ଆମ୍ବୁଲାନ୍ସକୁ ଖବର ଦେଇଥିଲେ। ଗ୍ରାମକୁ ଯିବା ଲାଗି ରାସ୍ତା ନ ଥିବା ଏବଂ ଯିବା ରାସ୍ତାରେ ଏକ ନାଳ ଥିବା ଯୋଗୁ ଆମ୍ବୁଲାନ୍ସଟି ସେଠାକୁ ଯାଇପାରି ନ ଥିଲା। ଫଳରେ ପରିବାର ଲୋକେ ଏବଂ ସେଠାକାର ସମିତି ସଭ୍ୟ ଅମୀର ନାଏକ ଗର୍ଭବତୀ ମହିଳାଙ୍କୁ ଦୁଇ କିଲୋମିଟର ରାସ୍ତା ଖଟିଆରେ ବୋହି ଆମ୍ବୁଲାନ୍ସ ପର୍ଯ୍ୟନ୍ତ ଆଣିଥିଲେ । ପରେ ତାଙ୍କୁ ମେଡିକାଲ ନିଆଯାଇଛି। ଘଟଣାଟି ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଲେଫ୍ରିପଡା ବ୍ଲକର ସରଫଗଡ଼ ପଞ୍ଚାୟତ ଉପାନ୍ତ ଅଞ୍ଚଳ ହୋଇଥିବା ବେଳେ ଏମିତି ଅନେକ ଗାଁ କୁ ଆଜି ବି ରାସ୍ତାଟିଏ ନ ଥିବା ଅଭିଯୋଗ ହୋଇଛି। ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ଦାବି ହୋଇଛି।