ଗଛ ବିନା ଜୀବନ ପରିକଳ୍ପନା କରିବା ଅସମ୍ଭବ। ଗଛ ଛାଇ ଏବଂ ଫଳ ଦେବା ସହ ଲୋକଙ୍କ ଆବଶ୍ୟକତା ପୂରଣ କରିଥାଏ। ଗଛ ଯୋଗୁ ଆମେ ଅମ୍ଲଜାନ ମଧ୍ୟ ପାଇଥାଉ। ଏବେ ସୋସିଆଲ ମିଡିଆରେ ଏପରି ଏକ ଗଛ ଭାଇରାଲ ହୋଇଛି। ଯାହାକୁ କାଟିଲେ ଏଥିରୁ ପାଣି ବାହାରୁଛି। ଆବଶ୍ୟକସ୍ଥଳେ ଲୋକେ ଗଛରୁ ବାହାରୁଥିବା ପାଣି ପିଇ ଶୋଷ ମେଣ୍ଟାଉଛନ୍ତି। ଏହି ଗଛର ନାମ ଟରମିନାଲିଆ ଟୋମେଣ୍ଟୋସା। ଗଛର ଛାଲ କୁମ୍ଭୀର ଚମଡା ଭଳି ଦେଖାଯାଉଥିବାରୁ ଏହାକୁ କୁମ୍ଭୀର ପିଠି ଭଳି ଗଛ ମଧ୍ୟ କୁହାଯାଏ। ସୋସିଆଲ ମିଡିଆରେ ଏହି ଗଛର ଭିଡିଓକୁ ନିଜ ଟୁଇଟରରେ ପୂର୍ବତନ ଆଇଏଫ୍ଏସ୍ ଦିଗ୍ବିଜୟ ସିଂ ଖାତି ଶେୟାର କରିଛନ୍ତି। କ୍ୟାପସନ୍ରେ ଲେଖିଛନ୍ତି, ଏହି ଗଛ ଅସୁବିଧା ସମୟରେ ଶୋଷ ମେଣ୍ଟାଇଥାଏ। ଭିଡିଓରେ କିଛି ବ୍ୟକ୍ତି ଗଛକୁ ଟିକେ କାଟିବା କ୍ଷଣି ସେଥିରୁ ପାଣି ଧାର ଧାର ହୋଇ ବାହାରୁଛି। ଏହି ଗଛ ଦକ୍ଷିଣ ଭାରତରେ ଦେଖାଯାଏ। ତାମିଲନାଡୁ ଜଙ୍ଗଲରେ ଏହି ଗଛ ବହୁଳ ପରିମାଣରେ ଦେଖାଯାଏ। ଗଛରୁ ପାଣି କାହିଁକି ବାହାରୁଛି ତାର କାରଣ ଏପର୍ଯ୍ୟନ୍ତ ଜଣାପଡିନାହିଁ। ଏହି ଗଛକୁ ଥରେ କାଟିଲେ ୧ ଲିଟର ପର୍ଯ୍ୟନ୍ତ ପାଣି ବାହାରେ। ଏହି ପାଣି ପିଇ ସେଠାରେ ଥିବା କିଛି ଆଦିବାସୀଙ୍କ ଶୋଷ ମେଣ୍ଟିଥାଏ।
