ନୂଆଦିଲ୍ଲୀ,୩୦। ୩: ଲକ୍ଡାଉନ ସମୟରେ ସବୁ ରାଷ୍ଟ୍ରାୟତ୍ତ ବ୍ୟାଙ୍କଗୁଡିକର ଶାଖା ଖୋଲାରହିବ। ବ୍ୟାଙ୍କିଙ୍ଗ ସେବାରେ ଲୋକମାନଙ୍କୁ ଯେଭଳି କୌଣସି ଅସୁବିଧା ନ ଆସେ ସେ ଦିଗରେ ସରକାର ପଦକ୍ଷେପ ଗ୍ରହଣ କରିଛନ୍ତି। ଅର୍ଥମନ୍ତ୍ରୀ ନିର୍ମଳା ସୀତାରାମନ ବ୍ୟାଙ୍କିଙ୍ଗ ସଂକ୍ରାନ୍ତ ବିଭିନ୍ନ ପ୍ରସଙ୍ଗ ଉପରେ ସମସ୍ତ ବ୍ୟାଙ୍କ ଏମ୍ଡି ତଥା ସିଇଓଙ୍କ ସହ ଶନିବାର ଆଲୋଚନା କରିଛନ୍ତି। ବର୍ତ୍ତମାନର କଠିନ ସମୟରେ ବ୍ୟାଙ୍କଗୁଡିକର ଯୋଗଦାନକୁ ସୀତାରାମନ ଶନିବାର ଟୁଇଟ ଯୋଗେ ପ୍ରଶଂସା କରିଥିଲେ। ଅର୍ଥମନ୍ତ୍ରୀଙ୍କ ସହ ଭର୍ଚୁଆଲ ବୈଠକରେ ଆର୍ଥତ୍କ ସେବା ସଚିବ ଦେବାଶିଷ ପଣ୍ଡା, ଯୁଗ୍ମ ସଚିବ ମଦନେସ କୁମାର ମିଶ୍ର ଏବଂ ଆର୍ଥତ୍କ ସେବା ବିଭାଗର ସୁଚୀନ୍ଦ୍ର ମିଶ୍ର ପ୍ରମୁଖ ଉପସ୍ଥିତ ଥିଲେ।
ବ୍ୟାଙ୍କଗୁଡିକର ସମସ୍ତ ଶାଖା ଏବଂ ଏଟିଏମ୍ ଖୋଲା ରଖିବାକୁ ସୀତାରାମନ ବ୍ୟାଙ୍କ ମୁଖ୍ୟଙ୍କୁ ପରାମର୍ଶ ଦେଇଛନ୍ତି। ବ୍ୟାଙ୍କ ଅଧିକାରୀ ଏବଂ କର୍ମଚାରୀମାନେ ଲକ୍ଡାଉନ ସମୟରେ ଯେଭଳି କୌଣସି ସାମ୍ନା ନ କରନ୍ତି ସେ ନେଇ ସ୍ଥାନୀୟ କର୍ତ୍ତୃପକ୍ଷଙ୍କ ସହ ଆଲୋଚନା କରି ସମସ୍ତ ବ୍ୟବସ୍ଥା କରାଇନେବାକୁ କୁହାଯାଇଛି। ଶୁକ୍ରବାର ସାରା ଦେଶରେ ୧.୦୫ ଲକ୍ଷ ବ୍ୟାଙ୍କ ଶାଖା ଖୋଲା ରହିଥିଲା। ଶନିବାର ଏବଂ ରବିବାର ବ୍ୟାଙ୍କ ବନ୍ଦ ରହିଛି। ଲୋକମାନେ ନେଟବ୍ୟାଙ୍କିଙ୍ଗ, ଡିଜିଟାଲ ବ୍ୟାଙ୍କିଙ୍ଗ ଭଳି ଡିଜିଟାଲ ନେଣଦେଣକୁ ଗ୍ରହଣ କରିବା, ଆବଶ୍ୟକ ନ ହେଲେ ଶାଖାକୁ ନ ଆସିବାକୁ ଅର୍ଥମନ୍ତ୍ରୀ ଲୋକମାନଙ୍କୁ ନିବେଦନ କରିଛନ୍ତି।
ଶଖାଗୁଡିକ ଉପରେ ଚାପ କମାଇବା ଲାଗି କେତେକ ବ୍ୟାଙ୍କ ମୋବାଇଲ ଏଟିଏମ୍ ନିୟୋଜିତ କରିବାକୁ ଯୋଜନା ରଖିଛନ୍ତି। ଲୋକମାନେ ଟଙ୍କା ଉଠାଣ ଲାଗି ଯେଭଳି କୌଣସି ଅସୁବିଧା ସାମ୍ନା ନ କରନ୍ତି ସେ ଦିଗକୁ ବ୍ୟାଙ୍କଗୁଡିକ ଗୁରୁତ୍ୱର ସହ ବିଚାର କରୁଛନ୍ତି। ଏଭଳି ପଦକ୍ଷେପ ତ୍ୱରିତ ଭାବେ ଗ୍ରହଣ କରାଯିବ ବୋଲି ଇଣ୍ଡିଆନ ବ୍ୟାଙ୍କ ପକ୍ଷରୁ ସୂଚନା ରହିଛି। କିଛି ନିର୍ଦ୍ଧାରିତ ସହରଗୁଡିକରେ ଏହି ମୋବାଇଲ ଏଟିଏମ୍ ଭ୍ୟାନ ପରିଚାଳିତ ହେବା ସହ କିଛି କିଛି ସ୍ଥାନରେ ନିର୍ଦ୍ଦିଷ୍ଟ ସମୟ ପର୍ଯ୍ୟନ୍ତ ଛିଡା ହେବ। ଏହା ଦ୍ୱାରା ଲୋକମାନେ ନିଜ ଘର ପାଖରେ ଟଙ୍କା ଉଠାଣର ସୁବିଧା ପାଇପାରିବେ। ଏହାବାଦ ସାମାଜିକ ଦୂରତ୍ୱ ବଜାୟ ରଖିବା ଲାଗି ଇଣ୍ଡିଆନ ବ୍ୟାଙ୍କ ଆସୋସିଏଶନ(ଆଇବିଏ) ଗ୍ରାହକଙ୍କୁ ନିବେଦନ କରିଛି। ଅତି ଆବଶ୍ୟକ ନ ହେଲେ ଶାଖାକୁ ନ ଆସିବାକୁ ଏହା ପରାମର୍ଶ ଦେଇଛି।
