ଲଣ୍ଡନ, ୮ା୬ (ପି.ଟି.)-କୋଭିଡ୍-୧୯ ମହାମାରୀ ଯୋଗୁ ଯଦି ଅନ୍ତର୍ଜାତୀୟ କ୍ରିକେଟ ଖାଲି ଷ୍ଟାଡିୟମରେ ଖେଳାଯାଏ ତେବେ ଏହା ବିଶ୍ୱକପ୍ ବିଜୟୀ ଅଲ୍ରାଉଣ୍ଡର ବେନ୍ ଷ୍ଟୋକ୍ସଙ୍କ ପ୍ରଦର୍ଶନ ଉପରେ ପ୍ରଭାବ ପକାଇପାରେ ବୋଲି କହିଛନ୍ତି ପୂର୍ବତନ ଇଂଲଣ୍ଡ ଫାଷ୍ଟ ବୋଲର ଡାରେନ ଗଫ୍। ଇଂଲଣ୍ଡ ଜୁଲାଇରେ ଓ୍ବେଷ୍ଟଇଣ୍ଡିଜ ବିପକ୍ଷ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ। ଏହା ଜୈବ-ସୁରକ୍ଷିତ ପରିବେଶ ମଧ୍ୟରେ ଅନୁଷ୍ଠିତ ହେବ। ଗୁରୁତ୍ୱପୂର୍ଣ୍ଣ ମ୍ୟାଚ ଗୁଡ଼ିକରେ ଷ୍ଟୋକ୍ସ ସବୁବେଳେ ଭଲ ପ୍ରଦର୍ଶନ କରି ଆସିଛନ୍ତି। କରୋନାଭାଇରସ ଯୋଗୁ ସମଗ୍ର ବିଶ୍ୱରେ ଏକ ଭିନ୍ନ ପରିବେଶ ସୃଷ୍ଟି ହୋଇଛି। ପୁଣି ବିନା ଦର୍ଶକରେ ଷ୍ଟୋକ୍ସଙ୍କ ଭଳି ବ୍ୟାଟ୍ସମ୍ୟାନଙ୍କ ପ୍ରଦର୍ଶନ କିପରି ରହୁଛି ତାହା ଲକ୍ଷ୍ୟ କରିବାର କଥା। କିନ୍ତୁ ମୁଁ ଭାବୁଛି ଏହା ତାଙ୍କ ପ୍ରଦର୍ଶନକୁ ସାମାନ୍ୟ ପ୍ରଭାବିତ କରିପାରେ। ଇଂଲଣ୍ଡ ତରଫରୁ ୫୮ ଟେଷ୍ଟ ଏବଂ ୧୫୯ ଅନ୍ତର୍ଜାତୀୟ ଦିନିକିଆ ଖେଳିଥିବା ଗଫ୍ କହିଛନ୍ତି ପଡ଼ିଆରେ ବିନା ଦର୍ଶକରେ ବିଭିନ୍ନ ଖେଳାଳିଙ୍କ ପ୍ରତିକ୍ରିୟା କ’ଣ ରହୁଛି ତାହା ଉପରେ ମଧ୍ୟ ସମସ୍ତଙ୍କ ନଜର ରହିବ। ବହୁ ଖେଳାଳି ଦର୍ଶକଭରା ଷ୍ଟାଡିୟମରେ ଅଧିକ ଭଲ ପ୍ରଦର୍ଶନ କରିବାକୁ ଚେଷ୍ଟା କରିଥାନ୍ତି। ଅଳ୍ପ କେତେଜଣ ଖେଳାଳି ଅଛନ୍ତି ସେମାନଙ୍କ ପାଇଁ ଦର୍ଶକ ଉପସ୍ଥିତି ଫରକ ପଡ଼େନି। ଯେକୌଣସି ପରିସ୍ଥିତିରେ ସେମାନଙ୍କ ପ୍ରଦର୍ଶନ ସ୍ବାଭାବିକ ରହିଥାଏ।
