ଲସ୍ ଏଞ୍ଜେଲ୍ସ,୧୦।୫ (ଏଏଫ୍ପି): କରୋନା ଭାଇରସ ସଂକ୍ରମଣ କାରଣରୁ ବର୍ଷର ଦ୍ୱିତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଫ୍ରେଞ୍ଚ୍ ଓପନ୍ ରୋଲାଣ୍ଡ ଗ୍ୟାରସ୍ରେ ଖାଲି ଷ୍ଟାଡିୟମରେ ଆୟୋଜନ ହେବାର ସମ୍ଭାବନା ସୃଷ୍ଟି ହୋଇଛି। ଫ୍ରେଞ୍ଚ୍ ଟେନିସ ମୁଖ୍ୟ ବର୍ନାଡ ଗୁଇଡିସେଲି ରବିବାର ଏ ନେଇ ସୂଚନା ଦେଇଛନ୍ତି। ପୂର୍ବରୁ କୋଭିଡ୍-୧୯ ମହମାରୀ କାରଣରୁ ଫ୍ରେଞ୍ଚ୍ ଓପନ୍କୁ ୪ ମାସ ଘୁଞ୍ଚାଯାଇଛି। ପ୍ରଥମେ ଫ୍ରେଞ୍ଚ୍ ଓପନ ମେ ୨୪ରୁ ଜୁନ୍ ୭ ତାରିଖ ମଧ୍ୟରେ ଆୟୋଜନ ହେବାର କାର୍ଯ୍ୟକ୍ରମ ରହିଥିଲା। ତେବେ ଏହାକୁ ପରେ ସେପ୍ଟେମ୍ବର ୨୦ରୁ ଅକ୍ଟୋବର ୪ ତାରିଖ ମଧ୍ୟରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲା। ଏହି ଟୁର୍ନାମେଣ୍ଟ ଆୟୋଜନ କରିବା ନେଇ ସବୁ ବିକଳ୍ପ ଖୋଲା ରହିଛି ବୋଲି ସେ କହିଛନ୍ତି।
ଷ୍ଟାଡିୟମରେ ଫ୍ରେଞ୍ଚ୍ ଓପନ୍ ଖେଳାଯାଇଥାଏ ଓ ଟିଭିରେ ମଧ୍ୟ ଏହାର ସିଧା ପ୍ରସାରଣ କରାଯାଇଥାଏ। ଏହି ଟୁର୍ନାମେଣ୍ଟକୁ ଦେଖିବା ପାଇଁ ଲକ୍ଷ ଲକ୍ଷ ସଂଖ୍ୟାରେ ଦର୍ଶନ ଅପେକ୍ଷା କରି ରହିଛନ୍ତି। କରୋନା ଭାଇରସ ସଂକ୍ରମଣକୁ ଦୃଷ୍ଟିକୋଣରୁ ବିଚାର କଲେ ଏହି ଟୁର୍ନାମେଣ୍ଟକୁ ଖାଲି ଷ୍ଟାଡିୟମରେ ଆୟୋଜନ କରାଯିବା ସହ ଟିଭିରେ ସିଧା ପ୍ରସାରଣ କରାଯାଇପାରିବ। ଟେଲିଭିଜନ ରାଇଟରୁ ଟୁର୍ନାମେଣ୍ଟର ଏକ ତୃତୀୟାଂଶ ଅର୍ଥ ସଂଗ୍ରହ କରାଯାଇଥାଏ। ତେଣୁ ଫାଙ୍କା ଷ୍ଟାଡିୟମରେ ପ୍ରେଞ୍ଚ୍ ଓପନ୍ ଆୟୋଜନର ବିକଳ୍ପକୁ ଅଣଦେଖା କରି ହେବନାହିଁ ବୋଲି ଗୁଇଡିସେଲ କହିଛନ୍ତି। ଏହି ମହାମାରୀ କାରଣରୁ ମାର୍ଚ୍ଚ ମଧ୍ୟଭାଗରୁ ସବୁ ଟେନିସ ଟୁର୍ନାମେଣ୍ଟକୁ ଜୁଲାଇ ୧୩ ତାରିଖ ପର୍ଯ୍ୟନ୍ତ ସ୍ଥଗିତ କିମ୍ବା ବାତିଲ କରାଯାଇଛି।
ତେବେ ବର୍ଷର ତୃତୀୟ ଗ୍ରାଣ୍ଡସ୍ଲାମ ଟୁର୍ନାମେଣ୍ଟ ଓ୍ବିମ୍ବେଲଡନକୁ ବାତିଲ କରାଯାଇଛି। ଦ୍ୱିତୀୟ ବିଶ୍ୱଯୁଦ୍ଧ ପରେ ପ୍ରଥମଥର ପାଇଁ ଏହି ମୋଗ ଟେନିସ ଇଭେଣ୍ଟକୁ ବାତିଲ କରିବାକୁ ନିଷ୍ପତ୍ତି ନିଆଯାଇଛି। ସେହିପରି ୟୁଏସ୍ ଓପନକୁ ମଧ୍ୟ ଘୁଞ୍ଚାଯାଇଛି। ଅଗଷ୍ଟ ୩୧ରୁ ସେପ୍ଟେମ୍ବର ୧୩ ମଧ୍ୟରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲେ ମଧ୍ୟ ୟୁଏସ୍ ଓପନ୍ ଆୟୋଜନ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି।
ପ୍ରତ୍ୟେକ ବର୍ଷ ରୋଲାଣ୍ଡ ଗ୍ୟାରସ୍ରେ ବହୁ ଦର୍ଶକ ଟେନିସ ଉପଭୋଗ କରିବାକୁ ଆସିଥାନ୍ତି। ଫ୍ରେଞ୍ଚ୍ ଓପନ୍କୁ ଆହୁରି ଗୋଟିଏ ସପ୍ତାହ ଘୁଞ୍ଚାଯାଇପାରେ ଓ ଏହା ସେପ୍ଟେମ୍ବର ୨୭ରେ ଆରମ୍ଭ ହୋଇପାରେ ବୋଲି ଗୁଇଡିସେଲି କହିଛନ୍ତି। ଏହା ହେଲେ ୟୁଏସ୍ ଓ ଫ୍ରେଞ୍ଚ୍ ଓପନ୍ ମଧ୍ୟରେ ଦୁଇ ସପ୍ତାହ ଦୂରତ୍ୱ ରହିବ। ଟୁର୍ନାମେଣ୍ଟ ଆୟୋଜନ ନେଇ ଏଟିପି, ଡବ୍ଲ୍ୟୁଟିଏ ଓ ଆଇଟିଏଫ୍ ମୁଖ୍ୟଙ୍କ ସହ ନିୟମିତ ଆଲୋଚନା କରୁଛି ବୋଲି ସେ କହିଛନ୍ତି।
