ଭୁବନେଶ୍ୱର,୨୪।୧୨: ଖଣ୍ଡଗିରି ଥାନା ଅଧୀନ ବାହାଦଲପୁର ଅନିଲ ଜେନା ହତ୍ୟା ଘଟଣାରେ କମିଶନରେଟ ପୋଲିସକୁ ବଡ଼ ସଫଳତା ମିଳିଛି। ଏହି ହତ୍ୟାକାଣ୍ଡର ଦୁଇ ମୁଖ୍ୟ ଅଭିଯୁକ୍ତ କୁହାଯାଉଥିବା ଭରତ ସାହୁ ଓରଫ ବାପି ଓ ଦୁର୍ଗା ପ୍ରସାଦ ସାହୁ ଓରଫ ହାପିଙ୍କୁ ପୋଲିସ ଗିରଫ କରିଛି। ଉଭୟଙ୍କ ନିକଟରୁ ପୋଲିସ ଏକ ମାଉଜର ଏବଂ ବାଇକ୍କୁ ଜବତ କରିଛି। ସେମାନଙ୍କ ବିରୋଧରେ ଖଣ୍ଡଗିରି ପୋଲିସ କେସ୍ (ନଂ.୬୩୫/୧୯) ରୁଜୁ କରିଥିବା ବେଳେ ହତ୍ୟା ମାମଲାରେ ଉଭୟଙ୍କୁ କୋର୍ଟ ଚାଲାଣ କରାଯିବ ବୋଲି କହିଛି। ଏ ସମ୍ପର୍କରେ ମଙ୍ଗଳବାର କମିଶନରେଟ୍ ପୋଲିସ କାର୍ଯ୍ୟାଳୟରେ ଆୟୋଜିତ ଖବରଦାତା ସମ୍ମିଳନୀରେ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ ସୂଚନା ଦେଇଛନ୍ତି। ତେବେ ଜମିଦାରି ଘଟଣାକୁ ନେଇ ଅନିଲଙ୍କୁ ହତ୍ୟା କରାଯାଇଥିବା ସେ କହିଛନ୍ତି।
କମିଶନରଙ୍କ ସୂଚନାନୁଯାୟୀ, ଅଭିଯୁକ୍ତ ବାପିଙ୍କ ମା’ଙ୍କ ନାମରେ ଥିବା ସମ୍ପତ୍ତିକୁ ତାଙ୍କ ବାପା ଶସ୍ତାରେ ଗ୍ରାମର କିଛି ଲୋକଙ୍କୁ ବିକ୍ରି କରିଦେଇଥିଲେ। ପରେ ବାପି ପୁଣି ଉକ୍ତ ଜମିକୁ ଫେରି ପାଇବାକୁ ଚାହିଁଥିଲେ। ହେଲେ ଗ୍ରାମର କିଛି ଲୋକ ତାଙ୍କୁ ବିରୋଧ କରିଥିଲେ। ଏଥିରେ ଅନିଲ ଗ୍ରାମବାସୀଙ୍କୁ ସମର୍ଥନ କରୁଥିଲେ। ସେହିପରି ବାପିଙ୍କ ସହଯୋଗୀ ଆଲୋକ ଡ୍ରଗ୍ସ ବେପାର କରୁଥିବା ବେଳେ ତାଙ୍କୁ ମୃତ ଅନିଲ ବିରୋଧ କରୁଥିଲେ। ଏଣୁ ଅନିଲଙ୍କ ଉପରେ ବାପିଙ୍କ ରାଗ ବଢ଼ିବାରେ ଲାଗିଥିଲା। ତେବେ ହତ୍ୟାର ପୂର୍ବଦିନ ବାପି ଜନ୍ମଦିନ ପାଳିବାକୁ ପୁରୀ ଯାଇଥିଲେ। ସେଠାରୁ ଫେରିବା ସମୟରେ ଅନିଲ ଗାଁ ଲୋକଙ୍କ ସହ ମିଶି ତାଙ୍କ ନାମରେ ପୋଲିସରେ ଅଭିଯୋଗ କରିବାକୁ ଷଡ଼ଯନ୍ତ୍ର କରୁଥିବା ବାପିଙ୍କୁ ତାଙ୍କ ସହଯୋଗୀ କହିଥିଲେ। ଶେଷରେ ଅନିଲଙ୍କୁ ରାସ୍ତାରୁ ହଟାଇବାକୁ ଯୋଜନା କରି ବାପି ଗତ ସେପ୍ଟେମ୍ବର ୭ ତାରିଖରେ ଗୁଳିମାଡ଼ କରିଥିଲେ। ବାହାଦଲପୁର ହନୁମାନ ମନ୍ଦିର ସମ୍ମୁଖରେ ଅନିଲ ଓ ତାଙ୍କ ବାପା ଅଭିମନ୍ୟୁ ଜେନାଙ୍କୁ ବାପି, ଆଲୋକ ଓ ହାପି ମୁହଁରେ କପଡ଼ା ବାନ୍ଧି ଅଟକାଇଥିଲେ। ପରେ ସେମାନେ ଅନିଲଙ୍କ ଛାତିକୁ ଗୁଳି କରିଥିଲେ। ଏହାକୁ ତାଙ୍କ ବାପା ବିରୋଧ କରିବାରୁ ଅଭିମନ୍ୟୁଙ୍କ ଗୋଡ଼କୁ ଗୁଳି କରି ଅଭିଯୁକ୍ତମାନେ ଫେରାର ହୋଇଯାଇଥିଲେ। ସେମାନଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ହେଲେ ଡାକ୍ତରଖାନାରେ ଅନିଲଙ୍କ ମୃତ୍ୟୁ ଘଟିଥିଲା। ଅପରପକ୍ଷେ ଅଭିଯୁକ୍ତମାନେ ପ୍ରଥମେ ଖୋର୍ଦ୍ଧା ଓ ପରେ ରାୟଗଡ଼ାରେ ଲୁଚିଥିଲେ। ସେଠାରୁ ପୋଲିସ ଉଭୟଙ୍କୁ ଗିରଫ କରିଛି। ଏହି ମାମଲାରେ ଅନ୍ୟତମ ଅଭିଯୁକ୍ତ ରାଜା ଫେରାର ଅଛନ୍ତି। ତାଙ୍କୁ ଗିରଫ କରିବା ଲାଗି ପୋଲିସ ଚଢ଼ାଉ ଜାରି ରଖିଥିବା ଷଡ଼ଙ୍ଗୀ କହିଛନ୍ତି।
ପ୍ରକାଶଯୋଗ୍ୟ, ଅନିଲଙ୍କ ହତ୍ୟାକାଣ୍ଡରେ ସମ୍ପୃକ୍ତ ଅଭିଯୁକ୍ତଙ୍କୁ ଗିରଫ ଦାବି ନେଇ ବାହାଦଲପୁର ଅଞ୍ଚଳର ଶତାଧିକ ଲୋକେ ରାସ୍ତାରୋକୋ କରିଥିଲେ। ଅଭିଯୁକ୍ତମାନଙ୍କୁ ତୁରନ୍ତ ଗିରଫ କରାଯାଉ ବୋଲି ସେମାନେ ପୋଲିସକୁ କହିଥିଲେ।
