ନୂଆଦିଲ୍ଲୀ,୩୦।୫: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଦ୍ୱିତୀୟ ପାଳିର ପ୍ରଥମ ବର୍ଷ ପୂରଣ ହୋଇଛି। ଏନେଇ କିଛି ଗଣମାଧ୍ୟମ ସଂସ୍ଥା ପକ୍ଷରୁ ସରକାରଙ୍କ ଗୋଟିଏ ବର୍ଷର ୬ଟି ସ୍ତମ୍ଭ ବିଶିଷ୍ଟ ରିପୋର୍ଟ ଜାରି କରାଯାଇଛି। ଏଥିରେ ଦର୍ଶାଯାଇଛି ଯେ, କ୍ଷମତାର ଗୋଟିଏ ବର୍ଷରେ ଶାସନ ଏବଂ ଅର୍ଥନୀତି ରେଡ୍ ଜୋନ୍ରେ ଥିବାବେଳେ ରାଜନୀତି ଅରେଞ୍ଜ୍ ଏବଂ ବିକାଶ ଗ୍ରୀନ୍ଜୋନ୍ରେ ରହିଛି। ୬ଟି ସ୍ତମ୍ଭ ମଧ୍ୟରେ ଶାସନ ବ୍ୟବସ୍ଥା, ରାଜନୀତି, ନିଷ୍ପତ୍ତି ଗ୍ରହଣ, ଅର୍ଥନୀତି, ବିକାଶ, କୂଟନୈତିକ ସ୍ଥିତିକୁ ସାମିଲ କରାଯାଇଛି। ଗୋଟିଏ ବର୍ଷ ମଧ୍ୟରେ ସରକାରଙ୍କ ଦ୍ୱିତୀୟ ପାଳିର ଶାସନ ବ୍ୟବସ୍ଥାରେ ଭାରତୀୟ ଗଣତନ୍ତ୍ରର ଚତୁର୍ଥସ୍ତମ୍ଭ ବୋଲାଉଥିବା ଗଣମାଧ୍ୟମର ସ୍ବାଧୀନତା ୨ ସ୍ଥାନ ତଳକୁ ଆସିଛି। ଏହା ୧୪୦ରୁ ଖସିଆସି ୧୪୨ରେ ରହିଛି। ସେହିପରି ସିଏଏ-ଏନ୍ଆର୍ସି ନେଇ ଦେଶରେ ହିଂସାକାଣ୍ଡ ଘଟିଛି। ଏହାକୁ ନେଇ ଆମେରିକାର ଅନ୍ତର୍ଜାତୀୟ ଧାର୍ମିକ ସ୍ବାଧୀନତା ଆୟୋଗ ଭାରତ ସରକାରଙ୍କ ଉପରେ ଅଭିଯୋଗ ମଧ୍ୟ ଆଣିଛି। ସେହିପରି ରାଜନୀତି କ୍ଷେତ୍ରରେ ଚଳିତ ବର୍ଷ ଭାଜପା ନେତୃତ୍ୱାଧୀନ କେନ୍ଦ୍ର ସରକାରଙ୍କ ସ୍ଥିତି ଅରେଞ୍ଜ୍ ଜୋନ୍ରେ ରହିଛି। ମହାରାଷ୍ଟ୍ର, ଝାଡ଼ଖଣ୍ଡ, ଦିଲ୍ଲୀ ଏବଂ ହରିୟାଣାର ନିର୍ବାଚନରେ କେବଳ ଭାଜପା ଗୋଟିଏ ରାଜ୍ୟରେ ସରକାର ଗଠନ କରିପାରିଛି। ମହାରାଷ୍ଟ୍ର, ଝାଡ଼ଖଣ୍ଡ ଓ ଦିଲ୍ଲୀରେ ଅଣ ଭାଜପା ସରକାର ଗଠନ ହୋଇଛି। ଗୋଟିଏ ବର୍ଷରେ ସରକାରଙ୍କ ପକ୍ଷରୁ ବହୁ ଐତିହାସିକ ନିଷ୍ପତ୍ତି ଗ୍ରହଣ କରାଯାଇଛି। ଏହା ରେଡ୍ଜୋନ୍ରେ ରହିଛି। ସେଥିରେ କରୋନା ମହାମାରୀ ସଂକ୍ରମଣ ରୋକିବା ପାଇଁ ୬୫ ଦନର ଲକ୍ଡାଉନ୍ ମଧ୍ୟ ଅଛି। ଲକ୍ଡାଉନ୍ ପରେ ବି ସଂକ୍ରମିତଙ୍କ ସଂଖ୍ୟା ୨୮୮ ଗୁଣା ବଢ଼ିଥିବାବେଳେ ମୃତକଙ୍କ ସଂଖ୍ୟା ୪୨୭ ଗୁଣା ବୃଦ୍ଧି ପାଇଥିବା ଏହି ରିପୋର୍ଟରେ ଉଲ୍ଲେଖ କରାଯାଇଛି। ଅର୍ଥନୀତି କ୍ଷେତ୍ରରେ ସରକାରଙ୍କ ଦ୍ୱିତୀୟ ପାଳିର ପ୍ରଥମ ବର୍ଷ ରେଡ୍ ଜୋନ୍ରେ ରହିଛି। ଜିଡ଼ିପି ଅଭିବୃଦ୍ଧି ହାର ୧୧ ବର୍ଷର ସର୍ବନିମ୍ନସ୍ତରରେ ପହଞ୍ଚିଛି। ରିପୋର୍ଟରେ ବିକାଶ ହାର ଗ୍ରୀନ୍ଜୋନ୍ରେ ରହିଛି। ପ୍ରତିଦିନ ୨୭.୧୯ କିଲୋମିଟର ସଡ଼କ ପଥ ନିର୍ମାଣ ହେଉଥିବାବେଳେ ଏକବର୍ଷ ମଧ୍ୟରେ ଏହା ୨୬.୬୨ କିଲୋମିଟର ରହିଛି। ସେହିପରି ଅନ୍ତର୍ଜାତୀୟ ଶ୍ରମ ସଂଗଠନ(ଆଇଏଲ୍ଓ) ଅନୁସାରେ କରୋନା ସଂକ୍ରମଣ ଯୋଗୁ ୪୦ କୋଟି ଭାରତୀୟ ଗରିବ ରେଖା ତଳକୁ ଖସିଆସିବେ। ସେହିପରି ଲକ୍ଡ଼ାଉନ୍ ଯୋଗୁ ଶିଳ୍ପ ଏବଂ ସେବା କ୍ଷେତ୍ରରେ ୧୨ କୋଟି ଲୋକ ଚାକିରି ହରାଇଛନ୍ତି। ବ୍ୟବସାୟିକ ସୁବିଧା କ୍ଷେତ୍ରରେ ଭାରତ ୧୪ ସ୍ଥାନ ଉପରକୁ ଆସିଛି। ସେହିପରି କୂଟନୈତିକ କ୍ଷେତ୍ର ଅରେଞ୍ଜ୍ ଜୋନ୍ରେ ରହିଛି। ନେପାଳ ସହିତ ଲିପୁଲେଖ, କାଲାପାଣି ଏବଂ ଧାରଚୁଲା ଆଦି ୩ଟି ସ୍ଥାନରେ ସୀମା ବିବାଦ ସୃଷ୍ଟି ହୋଇଥିବା ରିପୋର୍ଟରେ ପ୍ରକାଶ ପାଇଛି।
