ଶ୍ରୀନଗର,୧।୧୧: ଜମ୍ମୁ-କଶ୍ମୀର ପାଇଁ ଶୁକ୍ରବାର ଥିଲା ଏକ ନୂଆ ସକାଳ। କାରଣ ଏହା ରାଜ୍ୟ ନୁହେଁ ବରଂ କେନ୍ଦ୍ରଶାସିତ ପ୍ରଦେଶ ଭାବେ ଆରମ୍ଭ କରିଛି ଇତିହାସ। ଅକ୍ଟୋବର ୩୧ରୁ ଲାଗୁ ହୋଇଥିବା ନୂଆ ନିୟମ ଅନୁସାରେ ନଭେମ୍ବର ୧ର ପ୍ରଥମ ଶୁକ୍ରବାର ଜମ୍ମୁ-କଶ୍ମୀର ପାଇଁ ଏକ ସ୍ବତନ୍ତ୍ର ଶୁକ୍ରବାର ବୋଲି କୁହାଯାଇଛି। ମୁସଲମାନମାନଙ୍କ ପାଇଁ ଶୁକ୍ରବାରର ବିଶେଷ ମହତ୍ତ୍ୱ ଥିବା ବେଳେ ଜମ୍ମୁ-କଶ୍ମୀରର ବିଭିନ୍ନ ସ୍ଥାନରେ ଜୁମେର ନମାଜ ପାଇଁ ପ୍ରସ୍ତୃତି ହୋଇଛି। କିନ୍ତୁ ଶ୍ରୀନଗର ପ୍ରସିଦ୍ଧ ଜାମିଆ ମସ୍ଜିଦ୍ରେ ଆଜି ବି ନମାଜ ପାଠ ପଢ଼ିବା ପାଇଁ ଅନୁମତି ଦିଆଯାଇନାହିଁ। ଜମ୍ମୁ-କଶ୍ମୀରରେ ଅଗଷ୍ଟ ୫ରୁ ଅନୁଚ୍ଛେଦ ୩୭୦ ହଟାଯିବା ପରଠାରୁ ଏବେ ପର୍ଯ୍ୟନ୍ତ ପ୍ରାୟ ୧୨ ଶୁକ୍ରବାର ହେବ ଏଠାରେ ନମାଜ ପଢାଯାଇ ନ ଥିବା ଜଣାପଡ଼ିଛି। ଆଜି ପୁଣି ଏଠାରେ ଲୋକଙ୍କୁ ଏକତ୍ରିତ ହେବା ଉପରେ କଟକଣା ଲଗାଯାଇଛି। ଅନ୍ୟପଟେ କେନ୍ଦ୍ରଶାସିତ ଅଞ୍ଚଳ ଲାଗୁ ହେବା ପରେ ସହରରେ ସୁରକ୍ଷା ବ୍ୟବସ୍ଥାକୁ ଆହୁରି ବଢ଼ାଇ ଦିଆଯାଇଛି। ଏଥିସହ ଘାଟିର ବିଭିନ୍ନ ସ୍ଥାନରେ ସୁରକ୍ଷାକର୍ମୀଙ୍କୁ ମୁତୟନ କରାଯାଇଛି।
