ନ୍ଦୁଝର,୯।୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ମୁଖ୍ୟ ଡାକ୍ତରଖାନାର ଟିକେଟ କାଉଣ୍ଟର ଖୋଲୁ ଖୋଲୁ ସରି ଯାଉଛି। ଫଳରେ ଦୂର ଦୂରାନ୍ତରୁ ଆସୁଥିବା ଏବଂ ଲାଇନରେ ଦୀର୍ଘ ସମୟ ଧରି ଠିଆ ହେଉଥିବା ରୋଗୀଙ୍କୁ ଟିକେଟ ମିଳୁ ନ ଥିବାରୁ ନିରାଶ ହୋଇ ଫେରୁଛନ୍ତି। ଏଥିପାଇଁ ସେମାନଙ୍କୁ ପୁଣି ଆର ସପ୍ତାହକୁ ଅପେକ୍ଷା କରିବାକୁ ପଡୁଛି। ଏନେଇ ଅସନ୍ତୋଷ ବୃଦ୍ଧି ପାଇବାରେ ଲାଗିଛି। ସେହିପରି ବ୍ଲାକରେ ଟିକେଟ ବିକ୍ରି କରାଯାଉଥିବା ସନ୍ଦେହ କରି ଏହାର ତଦନ୍ତ ଦାବି ହେଉଛି। ଭୟରେ ରୋଗୀ ଓ ସେମାନଙ୍କ ସମ୍ପର୍କୀୟମାନେ ମୁହଁ ଖୋଲି ଅଭିଯୋଗ କରି ପାରୁନାହାନ୍ତି। ଏନେଇ ତୁରନ୍ତ ପଦକ୍ଷେପ ଗ୍ରହଣ କରିବାକୁ ଦିଲ୍ଲୀପ ସାହୁ , ସାମାଜିକ କର୍ମୀ ଦାବି କରିଛନ୍ତି। ବିଶେଷ କରି ବାହାରୁ ଆସୁଥିବା ସୁପର ସ୍ପେଶାଲିଷ୍ଟମାନଙ୍କ କ୍ଷେତ୍ରରେ ଏଭଳି ଅବ୍ୟବସ୍ଥା ଅଭିଯୋଗ ହେଉଛି।
ସୂଚନାଥାଉ କି, ୨ୟ ଓ ୪ର୍ଥ ମଙ୍ଗଳବାରରେ ଜିଲା ଖଣିଜ ପ୍ରତିଷ୍ଠାନ ପାଣ୍ଠି ଅର୍ଥରେ ନିଯୁକ୍ତ ନ୍ୟୁରୋଲୋଜି ସୁପର ସ୍ପେଶାଲିଷ୍ଟ ରୋଗୀ ଦେଖିବାକୁ ଆସିଥାନ୍ତି। ପ୍ରତ୍ୟେକ ଥର ୬୦ ରୋଗୀ ଦେଖନ୍ତି କିନ୍ତୁ ଶହ ଶହ ରୋଗୀ ଫେରନ୍ତି। ୬୦ ଟିକେଟ ଆବଣ୍ଟନ ହୋଇଗଲେ ଆଉ ଟିକେଟ ଦିଆଯାଏ ନାହିଁ। ଜରୁରୀ ହେଲେ ବା ସମୟ ଥିଲେ ଟିକେଟ ନେଇ ଶେଷରେ ଦେଖାଇଥାନ୍ତି। ଏହି ସ୍ନାୟୁଗତ ରୋଗୀଙ୍କ ସଂଖ୍ୟା ବୃଦ୍ଧି ପାଉଥିବାରୁ ଜିଲା ଓ ବାହାର ଜିଲା ରାଜ୍ୟରୁ ମଧ୍ୟ ରୋଗୀ ଆସି ରାତି ଅଧାରୁ ଲାଇନରେ ଅପେକ୍ଷା କରିଥାନ୍ତି। ମଙ୍ଗଳବାର ସକାଳ ୮ଟା ପରେ ରୋଗୀ ପଞ୍ଜିକରଣ କାଉଣ୍ଟର ଖୋଲିବାବେଳେ ଅଳ୍ପ ଲୋକ ଥିଲେ ତେବେ ସଙ୍ଗେ ସଙ୍ଗେ ଲମ୍ବା ଲାଇନ ଲାଗିଲା ବେଳେ ୨/୩ ଜଣଙ୍କ ପଞ୍ଜିକରଣ କରିବା ପରେ ୬୦ ରୋଗୀ ପଞ୍ଜିକରଣ ହୋଇଗଲା ବୋଲି କୁହାଗଲା । ଫଳରେ ଅନେକ ଲାଇନ ରେ ଠିଆ ହୋଇଥିବା ରୋଗୀ ନିରାଶ ହୋଇ ଫେରିଗଲେ ବୋଲି ଶ୍ରୀ ସାହୁ କହିଛନ୍ତି। ଜଣେ ଯୁବକ କହିଲେ ସେ ଆରମ୍ଭ ବେଳେ ୩ନମ୍ବରରେ ଥିଲେ ହେଲେ କୁହାଗଲା ତୁମର ୫୫। ନମ୍ବର ସିରିଏଲ ଶେଷରେ ସିକ୍ୟୁରିଟି, ଏଥର ତୁମର ହେବ ନାହିଁ ଆର ଥର ଆସ କହି ଫେରାଇ ଦେଇଥିଲେ ବୋଲି ସେ କହିଛନ୍ତି। ଏହାକୁ ନେଇ ସେଠାରେ ଉତ୍ତେଜନା ପରିସ୍ଥିତି ଉପୁଜିଥିଲା। ଏଣୁ ଜିଲାପାଳଙ୍କୁ ଏହାର ପ୍ରତିକାର କରିବାକୁ ଦାବି କରାଯାଇଛି। ଆଗୁଆ ରୋଗୀଙ୍କ ଠାରୁ ଦଲାଲମାନେ ପାଉଣା ନେଇ ଟିକେଟ କାଟି ରଖିଥିବା ଏବଂ ସରିଗଲା ବୋଲି ପ୍ରଚାର କରୁଥିବା ଅଭିଯୋଗ ହେଉଛି। ଏ ନେଇ ସେ ନିର୍ଦ୍ଦିଷ୍ଟ ଅଭିଯୋଗ ପାଇଲେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସିଡ଼ିଏମ ଓ ଡାକ୍ତର କେ. ସି. ପୃଷ୍ଟି କହିଛନ୍ତି। ଏଭଳି ଅବ୍ୟବସ୍ଥାର ପ୍ରତିକାର କରି ଉପଯୁକ୍ତ ପଦକ୍ଷେପ ନେଇ ସାଧାରଣ ରୋଗୀଙ୍କୁ ନ୍ୟାୟ ନ ମିଳିଲେ ଆନ୍ଦୋଳନ କରିବାକୁ ବାଧ୍ୟ ହେବୁ ବୋଲି ସୁନେଶ ଧିର, ଜିଲା ଯୁବ କଂଗ୍ରେସ ସଭାପତି କହିଛନ୍ତି।
