ଶ୍ରୀନଗର,୨୫।୭: ଭାରତରେ ଜୁଲାଇ ୨୬ରେ କାରଗିଲ୍ ବଜୟ ଦିବସ ପାଳିତ ହେଉଛି। ଗତ ୨୦ ବର୍ଷ ଧରି ଏହା ପାଳିତ ହୋଇଆସୁଛି। ୧୯୯୯ ଜୁଲାଇ ୨୬ରେ ଭାରତ ଏହି ଯୁଦ୍ଧରେ ବିଜୟ ଲାଭ କରିଥିଲା। ସମୁଦ୍ର ପତ୍ତନଠାରୁ ୧୬ ହଜାର ୫ଶହ ଫୁଟ ଉଚ୍ଚତାରେ ହୋଇଥିବା ଏହି ଯୁଦ୍ଧରେ ପାକିସ୍ତାନ ନିଜର ଅମାନବିକତାର ପରିଚୟ ଦେଇଥିଲା। ଯୁଦ୍ଧରେ ମୃତ୍ୟୁ ଘଟିଥିବା ୫୩ ପାକିସ୍ତାନୀ ସୈନ୍ୟଙ୍କୁ ଚିହ୍ନିବାକୁ ପାକିସ୍ତାନ ସରକାର ମନା କରିଥିଲେ। ମୃତ ସୈନ୍ୟମାନେ ପାକିସ୍ତାନ ୧୨-ନର୍ଦନ ଲାଇଟ୍ ଇନଫେଣ୍ଟ୍ରି ବାଟାଲିୟନ୍ର ଥିଲେ। ପାକିସ୍ତାନ ସେମାନଙ୍କୁ ଆତଙ୍କବାଦୀ ସଂଗଠନ ମୁଜାହିଦ୍ଦିନ୍ର ସଦସ୍ୟ ଭାବେ ଚିହ୍ନଟ କରିଥିଲା। ସେହିପରି ଶହୀଦ୍ ହୋଇଥିବା ଭାରତୀୟ ଯବାନଙ୍କୁ ପାକିସ୍ତାନ ଠିକ୍ ଭାବେ ସଂସ୍କାର ମଧ୍ୟ କରି ନ ଥିଲା। ଏହାକୁ ନେଇ ଅନ୍ତର୍ଜାତୀୟସ୍ତରରେ ନାନା ଚର୍ଚ୍ଚା ହୋଇଥିଲା। ପାକିସ୍ତାନ ଅନ୍ତର୍ଜାତୀୟ ଯୁଦ୍ଧ ନୀତିର ଉଲ୍ଲଂଘନ କରିଥିବା କୁହାଯାଇଥିଲା। ଯୁଦ୍ଧରେ ୨୭ ଶହ ପାକିସ୍ତାନୀ ସୈନ୍ୟ ନିହତ ହୋଇଥିବା ରାଷ୍ଟ୍ରପତି ପରଭେଜ୍ ମୁଶାରଫ୍ଙ୍କ ପୁସ୍ତକ ଇନ୍ ଦି ଲାଇଟ୍ ଅଫ୍ ଫାୟାରରେ ପ୍ରକାଶ ପାଇଥିଲା। ପୁସ୍ତକରେ ପାକିସ୍ତାନ ସୈନ୍ୟ ବାହିନୀର ଏଭଳି କାର୍ଯ୍ୟକୁ ସମାଲୋଚନା କରାଯାଇଥିଲା।
