ବଇଣ୍ଡା, ୨୭ା୨(ଡି.ଏନ.ଏ.) – ଅନୁଗୋଳ ଜିଲା କିଶୋରନଗର ବ୍ଲକ ଠେଲକନାଳୀ ପଞ୍ଚାୟତ ଠେଲକନାଳୀ ଗ୍ରାମରେ ବିଭିନ୍ନ ସମସ୍ୟା ଲାଗିରହିଥିଲେ ହେଁ ଏଥିପ୍ରତି ଗୁରୁତ୍ୱ ଦିଆଯାଉନାହିଁ। ପଞ୍ଚାୟତ ଗଠନ ହୋଇଥିଲେ ମଧ୍ୟ ଗ୍ରାମର ବିକାଶ ହୋଇପାରୁନାହିଁ। ବିଶେଷକରି ସରକାରୀ ଯୋଜନାମାନ ଏଠାରେ ଠିକ୍ ଭାବେ କାର୍ଯ୍ୟକାରୀ ହୋଇପାରୁ ନ ଥିବା ଅଭିଯୋଗ କରିଛନ୍ତି ଗ୍ରାମବାସୀ। ଏ ନେଇ ଠେଲକନାଳୀବାସୀ ବୁଧବାର ଆଠମଲ୍ଲିକ ବିଧାୟକଙ୍କଠାରେ ଅଭିଯୋଗ କରିବା ସହ ଏକ ଦାବିପତ୍ର ପ୍ରଦାନ କରିଛନ୍ତି। ଏହାର ନକଲ ଅନୁଗୋଳ ଜିଲାପାଳ, କିଶୋରନଗର ବିଡିଓ, ତହସିଲଦାରଙ୍କୁ ପ୍ରଦାନ କରାଯାଇଛି।
ଗ୍ରାମବାସୀଙ୍କ ଅଭିଯୋଗ ମୁତାବକ, ଗ୍ରାମର ଜନସଂଖ୍ୟା ଅନ୍ୟଗ୍ରାମଠାରୁ ଅଧିକ ଥିବାବେଳେ ସେଠାରେ କଲ୍ୟାଣ ମଣ୍ଡପଟିଏ ନାହିଁ। ସରକାରୀ ଜମି ଖାତା ନଂ. ୧୩୦, ପ୍ଲଟ ନଂ. ୫୨୧(ପତିତ) ୧ ଏକର ୩୦ ଡିସିମିଲି, ପ୍ଲଟ ନଂ. ୯୯୯ ଜମିରେ କଲ୍ୟାଣ ମଣ୍ଡପ ନିର୍ମାଣ କରାଯିବାକୁ ତହସିଲ କାର୍ଯ୍ୟାଳୟର ଦୃଷ୍ଟି ଆକର୍ଷଣ କରାଯାଇଛି। ସେହିପରି ଗ୍ରାମରେ କଂକ୍ରିଟ ଖଳା, ମହିଳା ସ୍ବୟଂ ସହାୟକଙ୍କ ପାଇଁ ମିଶନ ଶକ୍ତି ଗୃହ, ରାଜୀବ ଗାନ୍ଧୀ ସେବାକେନ୍ଦ୍ର, ଫୁଲାଆମ୍ବା ଛକଠାରେ ମାର୍କେଟ କମ୍ପ୍ଲେକ୍ସ, ବିଶ୍ରାମାଗାର, କମ୍ୟୁନିଟି ସେଣ୍ଟର ସହ ଗ୍ରାମଛକଠାରୁ ବିଶିପାଲି ପର୍ଯ୍ୟନ୍ତ ପ୍ରଧାନମନ୍ତ୍ରୀ ଗ୍ରାମ ସଡ଼କ ଯୋଜନାରେ ପକ୍କା ରାସ୍ତା ନିର୍ମାଣ କରିବା ପାଇଁ ଦାବି ହୋଇଛି। ଏଥିସହ ଗ୍ରାମରେ ଥିବା ପ୍ରାଥମିକ ବିଦ୍ୟାଳୟରେ ପାଚେରି, ଫୁଲାଆମ୍ବା ସରକାରୀ ଉଚ୍ଚ ବିଦ୍ୟାଳୟରେ ସାଇକେଲ ଷ୍ଟାଣ୍ଡ ନିର୍ମାଣ, ଛାତ୍ରୀନିବାସ ଚତୁଃପାର୍ଶ୍ୱ ଆଲୋକୀକରଣ, ଗ୍ରାମକୁ ଜଳଯୋଗାଣ, ନଳକୂଅ ନିର୍ମାଣ ଆଦି ଦିଗରେ ରାଜ୍ୟ ସରକାର ଗୁରୁତ୍ୱ ଦେବାକୁ ଗ୍ରାମ ସଭାପତି କିଶୋରୀ ଚନ୍ଦ୍ର ସାହୁ, ବୈଷ୍ଣବ ସାହୁ, କରୁଣାକର ବେହେରା, ଟିକିନା ସାହୁ, ରମାକାନ୍ତ ସାହୁ, ପ୍ରାଣବନ୍ଧୁ ସାହୁ, ସମୀର ପ୍ରଧାନ, ଦିଲୀପ କୁମାର ସାହୁ, ବୀରବର ସାହୁ, ସୁବାସ ନାୟକ, ତିଳୋତ୍ତମା ଦେହୁରୀ, ପ୍ରଭାତୀ ସାହୁ, ଲକ୍ଷ୍ମୀ ପ୍ରଧାନ, କୁମୁଦିନୀ ସାହୁ ପ୍ରମୁଖ ଦାବି କରିଛନ୍ତି।
