ଭବାନୀପାଟଣା/କଲମପୁର,୧୧।୬(ଡି.ଏନ.ଏ.): କଳାହାଣ୍ଡି ଜିଲା କଲମପୁର ମଣ୍ଡିରେ ଅବ୍ୟବସ୍ଥା ଦେଖାଦେଇଛି। ଚାଷୀମାନେ ମଣ୍ଡିକୁ ଧାନ ଆଣି ଯଗି ବସିଥିବା ରହିଥିବାବେଳେ ମିଲର୍ସମାନେ ମଣ୍ଡିକୁ ଅଖାବସ୍ତା ଓ ଟ୍ରକ ପର୍ଯ୍ୟାପ୍ତ ପରିମାଣରେ ପଠାଇ ପାରୁ ନ ଥିବାରୁ ଧାନ ଉଠାଣ ସେହି ଅନୁପାତରେ ହୋଇପାରୁ ନ ଥିଲା। ଏହାର ସମାଧାନ ଦାବିରେ ମଙ୍ଗଳବାର ସକାଳୁ ଚାଷୀମାନେ କଲମପୁର-ଜୁନାଗଡ ମୁଖ୍ୟ ରାସ୍ତା ଅବରୋଧ କରି ରାସ୍ତାରୋକୋ କରିଥିଲେ।
କଲମପୁରଠାରେ ଚାଷୀମାନେ ରାସ୍ତା ରୋକୋ କରିଥିବା ଖବର ପାଇ ଧର୍ମଗଡ ଉପଜିଲାପାଳ ପଦ୍ମନାଭ ବେହେରା, ସହକାରୀ ଯୋଗାଣ ନିରୀକ୍ଷକ ପ୍ରଫୁଲ ଦାସ, ମୁଖୀଗୁଡା ନିୟନ୍ତ୍ରିତ ବଜାର କମିଟି ସମ୍ପାଦକ ଅନିଲ କୁମାର ରାଉତ ଘଟଣାସ୍ଥଳରେ ପହଞ୍ଚତ୍ ଚାଷୀମାନଙ୍କୁ ବଝାଶୁଝା କରିଥିଲେ। ଉପଜିଳାପାଳ ବେହେରା ମିଲର୍ସଙ୍କ ସହିତ ଯୋଗାଯୋଗ କରି ତୁରନ୍ତ ଚାଷୀମାନଙ୍କୁ ଅଖା ବସ୍ତା ଓ ପରିବହନ ପାଇଁ ଟ୍ରକ ଯୋଗାଇ ଦେବାକୁ ତାଗିଦ କରିଥିଲେ। ଶୀଘ୍ର ଚାଷୀମାନଙ୍କ ଧାନକୁ ଉଠାଣ କରିବାକୁ ବିଭାଗୀୟ କର୍ମକର୍ତ୍ତାମାନଙ୍କୁ ନିର୍ଦ୍ଦେଷ ଦେଇଥିଲେ। ଏହା ପରେ ରାସ୍ତାରୋକୋ ହଟିଥିଲା। ବ୍ଲକର ବିଭିନ୍ନ ମଣ୍ଡିରେ ହଜାର ହଜରା ବସ୍ତା ଧାନ ପଡିରହିଥିବା ବେଳେ ଧାନ ଉଠାଣରେ ବିଳମ୍ବ ନେଇ ଚାଷୀଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଧର୍ମଗଡ ଉପଜିଲାପାଳ ବେହେରାଙ୍କ ସହିତ କଲମପୁର କୃଷି ସେବା ସମବାୟ ସମିତି ସଭାପତି ବ୍ରଜେନ୍ଦ୍ର ସାହୁ ଓ ବ୍ଲକ ଉପାଧ୍ୟକ୍ଷ ଦୁଖିରାମ ମାଝି ଆଲୋଚନା କରିଥିଲେ। ଧାନ ବିକ୍ରୟ ପାଇଁ ମଣ୍ଡିକୁ ଆସିଥିବା ଚାଷୀମାନଙ୍କ ମଧ୍ୟରେ ପ୍ରମୋଦ ନିମୁଲିଆ, ନିହାର ରଞ୍ଜନ ସାହୁ, ସୁରେଶ ପଣ୍ଡା, ରାଧେ ଶର୍ମା, ଚିତ୍ତରଞ୍ଜନ ମିଶ୍ର, ସୁଶିଲ ପତିଙ୍କ ସମେତ ବ୍ରଜେନ୍ଦ୍ର ସାହୁ, ବ୍ଲକ ଉପାଧ୍ୟକ୍ଷ ଦୁଃଖିରାମ ମାଝି ପ୍ରମୁଖ ସହ ଅଞ୍ଚଳର ବହୁ ଚାଷୀ ରାସ୍ତାରୋକୋରେ ସାମିଲଥିଲେ। ଦୀର୍ଘ ସମୟ ଧରୀ ରାସ୍ତାରୋକୋ ହେବା ଫଳରେ ଜାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା। ଫଳରେ ଯାତ୍ରୀମାନେ ନାହିଁ ନ ଥିବା ଅସୁବିଧାର ସମ୍ମୁଖିନ ହୋଇଥିଲେ। ରାସ୍ତା ଅବରୋଧ ହଟିବା ପରେ କଲମପୁର ପୋଲିସ ଭିଡକୁ ନିୟନ୍ତ୍ରଣ କରିଥିବା ବେଳେ ଯାନବାହନ ଚଳାଚଳ ସ୍ବାଭାବିକ ହୋଇଥିଲା।