ଖଣ୍ଡପଡ଼ା,୨୩ା୫(ସ୍ବ.ପ୍ର.)- ଖଣ୍ଡପଡ଼ା ରଥଗଡା ସାହିର କର୍କଟ ରୋଗାକ୍ରାନ୍ତ ଭିନ୍ନକ୍ଷମ ଛାତ୍ର ମାଟ୍ରିକ ପରୀକ୍ଷାରେ ସଫଳତା ଅର୍ଜନ କରିଥିବାରୁ ସାଧାରଣରେ ଆନନ୍ଦ ପ୍ରକାଶ ପାଇଛି ା ଖଣ୍ଡପଡ଼ାର ବରିଷ୍ଠ ଆଇନଜୀବୀ ସଂଗ୍ରାମ କେଶରୀ ମିଶ୍ରଙ୍କ ପୁତ୍ର ସ୍ବସ୍ତିକ ମିଶ୍ର(୧୫) ସ୍ଥାନୀୟ ରାମଚନ୍ଦ୍ର ନୋଡାଲ ଉଚ୍ଚ ବିଦ୍ୟାଳୟର ଛାତ୍ର। ସ୍ବସ୍ତିକ ଦୀର୍ଘବର୍ଷ ଧରି କର୍କଟ ରୋଗରେ ଆକ୍ରାନ୍ତ ହୋଇ ନିଜର ଦୃଷ୍ଟିଶକ୍ତି ହରାଇ ବସିଛନ୍ତି। ଚଳିତବର୍ଷ ସେ ନିକଟସ୍ଥ ଶିଖରପୁର କେନ୍ଦ୍ରରେ ମାଟ୍ରିକ ପରୀକ୍ଷା ଦେଇଥିଲେ। ଶତପ୍ରତିଶତ ଦୃଷ୍ଟିଶକ୍ତି ହରାଇଥିବାରୁ ବୋର୍ଡ କର୍ତ୍ତୃପକ୍ଷଙ୍କ ଅନୁମତି କ୍ରମେ ଜଣେ ନବମ ଶ୍ରେଣୀର ଛାତ୍ରୀ ତାଙ୍କ ପାଇଁ ରାଇଟର ଭାବେ ନିଯୁକ୍ତ ହୋଇଥିଲେ ା ଫଳ ପ୍ରକାଶ ପରେ ସେ ୭୪ ପ୍ରତିଶତ ନମ୍ବର ରଖିଥିବା ଜଣାପଡିଛି। ୪୪୨ ନମ୍ବର ରଖି ବି ୧ ଗ୍ରେଡରେ ଉତ୍ତୀର୍ଣ୍ଣ ହୋଇଛନ୍ତି। ଦୃଷ୍ଟିଶକ୍ତି ବିହୀନ ତଥା ଚାଲିପାରୁ ନ ଥିବା ସ୍ବସ୍ତିକଙ୍କ ସ୍ମରଣଶକ୍ତି ଅତି ପ୍ରଖର। ଜେଜେବାପା ଆଇନଜୀବୀ ମାଧବ ପ୍ରସାଦ ମିଶ୍ର ଓ ଜେଜେ ମା’ ଆଡଭୋକେଟ ବିନୋଦିନୀ ମିଶ୍ର ପ୍ରାତଃ ସମୟରେ ପାଠ କରୁଥିବା ସଂସ୍କୃତ ଶ୍ଳୋକଗୁଡିକ ଶୁଣି ସେ ନିର୍ଭୁଲ ଭାବେ ଗାଇ ପାରନ୍ତି। କଲେଜରେ ସଂସ୍କୃତ ନେଇ ଅଧ୍ୟୟନ କରିବା ସହ ଭବିଷ୍ୟତରେ ଭାରତୀୟ ସଂସ୍କୃତିର ପୁନରୁଦ୍ଧାର ତଥା ପ୍ରସାରପ୍ରଚାର ଦିଗରେ ପ୍ରୟାସ ଜାରି ରଖିବେ ବୋଲି ସ୍ବସ୍ତିକ ଆଶା ରଖିଥିବା ପ୍ରକାଶ କରିଛନ୍ତି। ସୂଚନାଯୋଗ୍ୟ ସ୍ବସ୍ତିକ ତାଙ୍କ ସ୍ବାସ୍ଥ୍ୟ ପରୀକ୍ଷା ପାଇଁ ବୁଧବାର ଭୁବନେଶ୍ୱରର ଏକ ଘରୋଇ ଚିକିତ୍ସାଳୟକୁ ଯାଇଛନ୍ତି। ସେଠାରେ ସେ ୧୮ଦିନ ପର୍ଯ୍ୟନ୍ତ ଚିକିତ୍ସିତ ହେବେ ା ଜନ୍ମରୁ ତାଙ୍କ ବ୍ରେନରେ ଟ୍ୟୁମର ହୋଇଥିବାରୁ ଅପରେଶନ କରାଯାଇଥିଲା। ସେତେବେଳେ ତାଙ୍କୁ କ୍ୟାନସର ହୋଇଥିବା ଜଣାପଡିଥିଲା। ସେ ସମୟରୁ ତା’ର ଦୃଷ୍ଟିଶକ୍ତି ନଷ୍ଟ ହୋଇଯାଇଥିବା ତାଙ୍କ ଜେଜେବାପା ସୂଚନା ଦେଇଛନ୍ତି ା
