ଲକ୍ଷ୍ନୌ,୧୧।୫: ଦେଶରେ କରୋନା ସଂକ୍ରମଣ ଦିନକୁ ଦିନ ବଢ଼ିବାରେ ଲାଗିଛି। କରୋନା ମୁକାବିଲା ପାଇଁ ବହୁ ଲୋକ ପ୍ରଧାନମନ୍ତ୍ରୀ କେୟାର୍ସ ଫଣ୍ଡକୁ ଦାନ ଜାରି ରଖିଛନ୍ତି। ଏହି ମର୍ମରେ ଉତ୍ତରପ୍ରଦେଶ ଗୋଣ୍ଡା ଅଞ୍ଚଳର ଦୁଇ ଶିଶୁ ମୁଖ୍ୟମନ୍ତ୍ରୀ ସହାୟତା ପାଣ୍ଠିକୁ ନିଜ ନିଜର ପିଗି ବ୍ୟାଙ୍କ ଦାନ କରିଛନ୍ତି। ସ୍ଥାନୀୟ ତରବଗଞ୍ଜ୍ରେ ବାସ କରୁଥିବା ରାଧାରମଣ ଏବଂ ମଦନ ମୋହନ ନାମକ ଏହି ଶିଶୁ ଦୁଇଜଣ ଏସ୍ଡିଏମ୍ ରାଜେଶ କୁମାରଙ୍କୁ ଭେଟି ନିଜର ପିଗି ବ୍ୟାଙ୍କ ଦାନ କରିଛନ୍ତି। ସେମାନଙ୍କ ପିଗି ବ୍ୟାଙ୍କରେ ମୋଟ ୨୧ ଶହ ଟଙ୍କା ରହିଥିବା ଏସ୍ଡିଏମ୍ ସୂଚନା ଦେଇଛନ୍ତି। ସେମାନେ କାହିଁକି ଏଭଳି କରିଛନ୍ତି ପ୍ରଶ୍ନ କରାଯିବାରୁ ଶିଶୁ ଦୁଇଜଣ କହିଥିଲେ ଯେ, କରୋନା ସହିତ ଲଢ଼େଇ ପାଇଁ ସଭିଏଁ ଦାନ ଦେଉଛନ୍ତି। ଏହା ସେମାନଙ୍କ ମନରେ ପ୍ରେରଣା ସୃଷ୍ଟି କରିଛି। ଶିଶୁ ଦୁଇଜଣ ଏସ୍ଡିଏମ୍ଙ୍କୁ ୧୦୦ ମାସ୍କ ମଧ୍ୟ ପ୍ରଦାନ କରିଛନ୍ତି। ଏହାର ଏକ ୩୬ ସେକେଣ୍ଡର ଭିଡ଼ିଓ ଏବେ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
