ଟୋକିଓ,୧୮।୩ (ଏଏଫ୍ପି)- କରୋନା ଭାଇରସ୍ ଦ୍ୱାରା ଜାପାନ ଅଲିମ୍ପିକ କମିଟି ଉପମୁଖ୍ୟ କୋଜୋ ତାସିମା ସଂକ୍ରମିତ ହୋଇଛନ୍ତି। ସେ ନିଜେ ଏ ନେଇ ସ୍ବୀକାର କରିଛନ୍ତି। ଫଳରେ ଏବେ ଟୋକିଓ ଅଲିମ୍ପିକ୍ସ ନିରାପଦରେ ଆୟୋଜନ ହେବା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ମଙ୍ଗଳବାର ମୋର ପରୀକ୍ଷା କରାଯାଇଥିଲା। ମୋଠାରେ ଭାଇରସ ଥିବା ଜଣାପଡିଛି ବୋଲି ତାସିମା କହିଛନ୍ତି। ଜାପାନ ଫୁଟବଲ ଆସୋସିଏଶନ ମାଧ୍ୟମରେ ସେ ଏହି କଥା ଜଣାଇଛନ୍ତି। ତାସିମା ମଧ୍ୟ ଜାପାନ ଫୁଟବଲ ଆସୋସିଏଶନ ମୁଖ୍ୟ ଭାବେ କାର୍ଯ୍ୟ କରୁଛନ୍ତି।
ମୋତେ ସାମାନ୍ୟ ଜ୍ୱର ହୋଇଥିଲା। ପ୍ରଥମେ ନିମୁନିଆର ଲକ୍ଷଣ ଥିବା ଆଶଙ୍କା କରୁଥିଲୁ। ତେବେ ମଙ୍ଗଳବାର ତାଙ୍କଠାରେ କରୋନା ଭାଇରସ ଥିବା ଜଣାପଡିଥିଲା। ଏହି ଭାଇରସକୁ ନିୟନ୍ତ୍ରଣ କରିବା ପାଇଁ ଇତିମଧ୍ୟରେ ଅଲିମ୍ପିକ୍ସ ସଂକ୍ରାନ୍ତରେ ସବୁ ଉତ୍ସବକୁ ସୀମିତ କରାଯିବ ବୋଲି ଟୋକିଓ ୨୦୨୦ ଆୟୋଜକ କମିଟି ନିଷ୍ପତ୍ତି ନେଇଛି। ଗ୍ରୀସ୍ରେ ଅଲିମ୍ପିକ୍ ମଶାଲ ପ୍ରଜ୍ୱଳିତ ହୋଇଛି ଓ ଏହା ଶୁକ୍ରବାର ଉତ୍ତର ଜାପାନରେ ଆସି ପହଞ୍ଚିବ। ଫୁକୁସିମାରେ ଆସନ୍ତା ୨୬ ତାରିଖରେ ମଶାଲ ରାଲି ଆରମ୍ଭ ହେବା କାର୍ଯ୍ୟକ୍ରମ ରହିଛି। ତେବେ ବର୍ତ୍ତମାନ ସବୁକିଛି ଅନିଶ୍ଚିତତା ଆଡକୁ ଚାଲିଯାଇଛି।
