ସାରା ବିଶ୍ୱରେ କରୋନା ଭାଇରସ୍ କାୟା ବିସ୍ତାର କରିଛି। ଏବେ ଏହି ଭୂତାଣୁ ଯୋଗୁ ୪ ଲକ୍ଷରୁ ଊର୍ଦ୍ଧ୍ୱ ଲୋକଙ୍କ ଜୀବନ ଗଲାଣି। କରୋନାର ମୂଳପୋଚ୍ଛ ପାଇଁ ବିଭିନ୍ନ ଦେଶ ଟୀକା ପ୍ରସ୍ତୁତ ପାଇଁ ଲାଗିପଡିଛନ୍ତି। କିନ୍ତୁ ଏପର୍ଯ୍ୟନ୍ତ କୌଣସି ଟୀକା ପ୍ରସ୍ତୁତ ହୋଇପାରି ନାହିଁ। ବେଲଜିୟମର ଜଣେ ୧୦୩ ବର୍ଷୀୟ ଡାକ୍ତର କରୋନା ଭାଇରସ ଉପରେ ରିସର୍ଚ୍ଚ ଲାଗି ଅର୍ଥ ସଂଗ୍ରହ କରିବା ପାଇଁ ୪୨.୨ କିମି ଚାଲିବା ଆରମ୍ଭ କରିଛନ୍ତି। ଅବସରପ୍ରାପ୍ତ ଡାକ୍ତର ଆଲଫୋନ୍ସ ଲିମପୋଲ୍ସ ଜୁନ ୪ରେ ବ୍ରୁସେଲ୍ସର ଉତ୍ତର-ପୂର୍ବର ରୋଟେସେଲାର ମ୍ୟୁନିସିପାଲିଟିରୁ ଯାତ୍ରା ଆରମ୍ଭ କରିଥିଲେ। ଏହାକୁ ଜୁନ ୩୦ରେ ଶେଷ କରିବାକୁ ଯୋଜନା କରିଛନ୍ତି ସେ। ପ୍ରତିଦିନ ସେ ୧୪୫ ମିଟର ଚାଲୁଛନ୍ତି। ଆଲଫୋନ୍ସ କହିଛନ୍ତି ଯେ, ଦ୍ୱିତୀୟ ବିଶ୍ୱଯୁଦ୍ଧର ଭେଟେରାନ ୧୦୦ ବର୍ଷୀୟ ଟମ ମୋର୍ ବ୍ରିଟେନରେ ଥିବା ନିଜ ବଗିଚାରେ ବୁଲି ଦେଶର ସ୍ବାସ୍ଥ୍ୟ ସେବା ପାଇଁ ୪୦ ମିଲିୟନ ଡଲାରରୁ ଅଧିକ ଅର୍ଥ ସଂଗ୍ରହ କରିଥଲେ। ସେତେବେଳେ ଏହି ଧାରଣା ତାଙ୍କ ନିକଟକୁ ଆସିଥିଲା। ଏପର୍ଯ୍ୟନ୍ତ ସେ ୬, ୦୦୦ ୟୁରୋ ସଂଗ୍ରହ କରିଛନ୍ତି। ନିକଟସ୍ଥ ଲିଉଭେନ ବିଶ୍ୱବିଦ୍ୟାଳୟ ସହ ସଂଲଗ୍ନ ହସ୍ପିଟାଲ ପାଇଁ ପାଣ୍ଠି ସଂଗ୍ରହ କରିବାକୁ ଆଶା ରଖିଛନ୍ତି ଆଲଫୋନ୍ସ। ଏହି ହସ୍ପିଟାଲର ଗବେଷକମାନେ କୋଭିଡ୍-୧୯ର ଟୀକା ପ୍ରସ୍ତୁତ ପାଇଁ ରିସର୍ଚ୍ଚ ଚଳାଇଛନ୍ତି।
