ଭୁବନେଶ୍ୱର,୧୧।୭(ବ୍ୟୁରୋ) : ରାଜ୍ୟରେ ଓ୍ବାଟର୍ ସ୍ପୋର୍ଟସ ତଥା ଲିଜର୍ ଓ ରିକ୍ରିଏଶନ୍ ଟୁରିଜିମ୍ର ବ୍ୟାପକତା ପାଇଁ ପଦକ୍ଷେପ ନେଇଛି ରାଜ୍ୟ ପର୍ଯ୍ୟଟନ ବିଭାଗ। ସ୍ପୋର୍ଟସ ଟୁରିଜିମ୍ ପରେ ଏବେ ଓଡ଼ିଶାରେ ଓ୍ବାଟର୍ ସ୍ପୋର୍ଟସ ଟୁରିଜିମ୍ର ପ୍ରଚାର ପ୍ରସାର ପାଇଁ ପ୍ରାରମ୍ଭିକ ପ୍ରସ୍ତୁତି ଆରମ୍ଭ ହୋଇଛି। ଏଥିପାଇଁ ରାଜ୍ୟ ବାହାରୁ ୧୮ଟି ଘରୋଇ ସଂସ୍ଥା ଆସି ଭିତରକନିକା ଓ ଚିଲିକା ହ୍ରଦ ପରିଦର୍ଶନ କରିଛନ୍ତି। ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ଆୟୋଜିତ ଏକ ୩ଦିନିଆ ଫ୍ୟାମ୍ ଟ୍ରିପ୍ରେ ଗୋଆ, କେରଳ, ମହାରାଷ୍ଟ୍ର, ତେଲେଙ୍ଗାନା, ପଶ୍ଚିମବଙ୍ଗ ଏବଂ ଓଡ଼ିଶାକୁ ମିଶାଇ ୬ଟି ରାଜ୍ୟର ୨୬ଜଣ ପ୍ରତିନିଧି ଯୋଗଦେଇଥିଲେ। କେରଳ ଢାଞ୍ଚାରେ ଭିତରକନିକା ଜାତୀୟ ଉଦ୍ୟାନରେ ପର୍ଯ୍ୟଟକଙ୍କ ପାଇଁ ଲକ୍ଜରୀ ହାଉସ୍ ବୋଟ୍ ବ୍ୟବସ୍ଥା, ଚିଲିକାରେ ବିଭିନ୍ନ ପ୍ରକାର ଓ୍ବାଟର ସ୍ପୋର୍ଟସ ବା ମନୋରଞ୍ଜନଧର୍ମୀ ଜଳକ୍ରୀଡା ଓ ରିକ୍ରିଏଶନ୍ ପ୍ରୋଜେକ୍ଟ ପାଇଁ ପୁଞ୍ଜି ବିନିଯୋଗ ଉଦ୍ଦେଶ୍ୟରେ ରାଜ୍ୟ ସରକାରଙ୍କ ପକ୍ଷରୁ ଏହି ଫ୍ୟାମ୍ ଟ୍ରିପ୍ର ଆୟୋଜନ କରାଯାଇଥିଲା। ୪୮୨ କିଲୋମିଟର ସୁଦୀର୍ଘ ବେଳାଭୂମି ସହ ଏକାଧିକ ହ୍ରଦ ଓ ନଦୀ ଓଡ଼ିଶାରେ ରହିଛି। ଏଠାରେ ଜଳକ୍ରୀଡାର ବିକାଶ କରାଯାଇ ପାରିଲେ ବହୁସଂଖ୍ୟାରେ ପର୍ଯ୍ୟଟକ ଓଡ଼ିଶାକୁ ଆସିବେ ବୋଲି ପର୍ଯ୍ୟଯନ ବିଭାଗ ସଚିବ ବିଶାଲ ଦେବ କହିଛନ୍ତି।
