ଢେଙ୍କିକୋଟ,୨୨।୭(ଡି.ଏନ୍.ଏ.)- କେନ୍ଦୁଝର ଜିଲା ଲାଇଫ ଲାଇନ୍ ଜାତୀୟ ରାଜପଥ ୨୦ ନଂ ପାଣି କୋଇଲିଠାରୁ ରାଜାମୁଣ୍ଡାକୁ ଢେଙ୍କିକୋଟ ବଜାର ମଧ୍ୟ ଦେଇ ଯାଇଛି। ଯାହାକି ଏହାର ନବୀକରଣ ୪ ଲେନ୍ ରାସ୍ତା ନିର୍ମାଣ ବେଳେ ଢେଙ୍କିକୋଟ ବଜାର ମଧ୍ୟରେ ଏକ ଓଭରବ୍ରିଜ୍ ନିର୍ମାଣ କରାଯାଇଛି। ଏହି ଓଭରବ୍ରିଜ ଦେଇ ଜାତୀୟ ରାଜପଥ ୨୦ ନଂ ରାଞ୍ଚି-ବିଜୟଓ୍ବାଡ଼ାକୁ ସଂଯୋଗ କରିଛି। ଓଭରବ୍ରିଜ ଉଭୟ ପାର୍ଶ୍ୱରେ ଚଲାପଥ ରହିଅଛି। ନବିକରଣବେଳେ ଠିକାସଂସ୍ଥା ଚଲାପଥଗୁଡ଼ିକୁ ନିର୍ମାଣ ନକରି ଅଧାପନ୍ତରିଆ କରି ଛାଡ଼ି ଛାଲିଯାଇଛି। ଯାହାଫଳରେ ଜନସାଧାରଣ ଯାତାୟାତରେ ବହୁ ଅସୁବିଧା ଭୋଗଛନ୍ତି। ଅନ୍ୟପକ୍ଷେ ଓଭରବ୍ରିଜ ତଳ ଦୁଇ ପାର୍ଶ୍ୱରେ ସ୍ଥାନୀୟ ପରିବା ବ୍ୟବସାୟୀମାନେ ସେମାନଙ୍କ ପରିବା ଦୋକାନ ଏବଂ ଫଳ ଦୋକାନଗୁଡ଼ିକ ଦୋକାନ ମେଲି ବସିଥିବାରୁ ଗ୍ରାହକମାନେ ସାଇକେଲ, ବାଇକ ଏବଂ ଚାରିଚକିଆ ଯାନ ରଖି ପରିବା ଫଳ କିଣିଲାବେଳେ ଓଭରବ୍ରିଜ ତଳ ରାସ୍ତା ଜାମ ହେଉଛି। ଏହି ବ୍ରିଜ ତଳ ଦେଇ ବହୁ ଲୁହାପଥର ବୋଝେଇ ୧୦ ଚକିଆ, ୧୨ଚକିଆ, ଏବଂ ୧୮ ଚକିଆ ଯାନ ପ୍ରତିଦିନ ଯାତାୟାତ କରୁଛି। ଫଳରେ ଲୋକଙ୍କୁ ବହୁ ଅସୁବିଧା ଭୋଗିବାପାଇଁ ପଡ଼ୁଛି। ଏଥିଲାଗି ଢେଙ୍କିକୋଟ ପୋଲିସକୁ ନାକେଦମ ହେବାକୁ ପଡ଼ୁଛି। ଭବିଷ୍ୟତରେ ଏଠାରେ ବଡ଼ ଧରଣର ଦୁର୍ଘଟଣା ହେବାର ଆଶଙ୍କାକୁ ଏଡ଼ାଯାଇ ନ ପାରେ। ତେଣୁ ଏନ୍ଏଚ୍ଏଆଇ ତରଫରୁ ତୁର ଢେଙ୍କିକୋଟ ବଜାର ଚଲାପଥ ସାଙ୍ଗକୁ ଉଭୟ ପାର୍ଶ୍ୱରେ ଅଧା ପନ୍ତରିଆ କରିୁ ଛାଡ଼ିଥିବା ଡ୍ରେନ କାର୍ଯ୍ୟ ଶେଷ କରିବା ପାଇଁ ସାଧାରଣରେ ଦାବି ହେଉଛି। ନଚେତ ଆଗାମୀ ଦିନରେ ଏହା ଏକ ଆନ୍ଦୋଳନର ରୂପ ନେବ ବୋଲି କୁହାଯାଇଛି। ତେବେ ଓଭରବ୍ରିଜ ତଳୁ ପରିବା ଏବଂ ଫଳ ଦୋକାନଗୁଡ଼ିକୁ ସ୍ଥାନାନ୍ତର କରି ଯାନବାହାନ ସାଙ୍ଗକୁ ସାଧାରଣ ଲୋକଙ୍କୁ ଚଳପ୍ରଚଳ କରିବା ପାଇଁ ଦିଆଯାଉ ବୋଲି ଅଞ୍ଚଳବାସୀ ଦାବି କରିଛନ୍ତି।
