ଭୁବନ,୨୧।୭(ଡି.ଏନ.ଏ.)-ଢେଙ୍କାନାଳ ଜିଲା ଭୁବନ ବ୍ଲକ ସଭାଗୃହରେ ରବିବାର ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ (ଏସ୍ବିଆଇ) ପକ୍ଷରୁ ସ୍ବୟଂ ସହାୟକ ଗୋଷ୍ଠୀ (ଏସ୍ଏଚ୍ଜି)କୁ ନେଇ ସମନ୍ବୟ ମେଳା ଅନୁଷ୍ଠିତ ହୋଇଯାଇଛି। ମୁଖ୍ୟଅତିଥି ଭାବେ ବିଡିଓ ରାମଚନ୍ଦ୍ର ସୋରେନ୍, ସମ୍ମାନିତ ଅତିଥି ପ୍ରଗତି ସହାୟକ ଲିଆକତ୍ ଅଲ୍ଲୀ ଖଁା, ଓଡ଼ିଶା ଜୀବିକା ମିଶନ ବ୍ଲକ ସଂଯୋଜକ ବିଦ୍ୟାଧର ମହାରଣା ଉପସ୍ଥିତ ରହି ବିଭିନ୍ନ ସରକାରୀ ଯୋଜନା, ଋଣ ଉଠାଣ, ପରିଶୋଧ ନିୟମାବଳୀ ସମ୍ପର୍କରେ ପୁଙ୍ଖାନୁପୁଙ୍ଖ ଆଲୋଚନା କରିଥିଲେ।
ଏସ୍ବିଆଇ ଶାଖା ପରିଚାଳକ ଦୀପକ କୁମାର ସେନାପତି କାର୍ଯ୍ୟକ୍ରମରେ ଅଧ୍ୟକ୍ଷତା କରି କହିଲେ, ଭୁବନ ବ୍ଲକ ଏବଂ ଏନ୍ଏସି ଅଧୀନ ୪୧ ଏସ୍ଏଚ୍ଜିକୁ ବିନା ସୁଧରେ ୧କୋଟି ଟଙ୍କା ପର୍ଯ୍ୟନ୍ତ ଋଣ ଯୋଗାଇ ଦିଆଯିବ। ପ୍ରତି ଗୋଷ୍ଠୀକୁ ଆବଶ୍ୟକତା ଅନୁଯାୟୀ ୧ ଲକ୍ଷରୁ ଆରମ୍ଭ କରି ୩ ଲକ୍ଷ ଟଙ୍କା ଯାଏ ଆର୍ଥିକ ସହାୟତା ପ୍ରଦାନ କରାଯିବ। ବ୍ୟବସାୟ ଆରମ୍ଭ ପରେ ନିର୍ଦ୍ଧିଷ୍ଟ ସମୟ ସୀମା ମଧ୍ୟରେ କିସ୍ତି ଅନୁଯାୟୀ ଏହାକୁ ସେମାନେ ସୁବିଧାରେ ଫେରସ୍ତ କରିପାରିବେ। ବ୍ୟାଙ୍କ ଋଣ ଟଙ୍କାକୁ ସୁଚିନ୍ତିତ ଭାବେ ବିନିଯୋଗ କରିପାରିଲେ ଗୋଷ୍ଠୀର ଆର୍ଥିକ କ୍ଷମତା ବୃଦ୍ଧି ପାଇବ। ଏହାର ଭରପୂର ଲାଭ ଉଠାଇବାକୁ ସେ ଗୋଷ୍ଠୀ ସଦସ୍ୟଙ୍କୁ ଆହ୍ବାନ ଦେଇଥିଲେ। କ୍ୟାଶ ଅଫିସର ପ୍ରଦୀପ ମୁଣ୍ଡା, ବିପ୍ଳବ ପାଣି, କ୍ଷେତ୍ରାଧିକାରୀ ଉମେଶ ଚନ୍ଦ୍ର ସାହୁ ପ୍ରମୁଖ ଏସ୍ଏଚ୍ଜିର ଦକ୍ଷତା ବୃଦ୍ଧି ସମ୍ପର୍କିତ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ଉପସ୍ଥାପନ କରିଥିଲେ। ଏହି ଅବସରରେ ଋଣ ପାଇଁ ମନୋନୀତ ହୋଇଥିବା ଏସ୍ଏଚ୍ଜିକୁ ମଞ୍ଜୁରୀ ପତ୍ର ପ୍ରଦାନ କରାଯାଇଛି। ବ୍ୟାଙ୍କରେ କାର୍ଯ୍ୟରତ ସମସ୍ତ କର୍ମଚାରୀ ସହଯୋଗ କରିଥିଲେ।
