ନୂଆଦିଲ୍ଲୀ,୨୭।୯:ସୌଦି ଆରବର ରାଷ୍ଟ୍ରାୟତ୍ତ ତୈଳ କମ୍ପାନୀ ଆରାମ୍କୋର ଦୁଇଟି ତୈଳ କୂଅ ଉପରେ ଡ୍ରୋନ୍ ଆକ୍ରମଣ ପରେ ଭାରତକୁ ଏଲ୍ପିଜି ଯୋଗାଣ ହ୍ରାସ ପାଇବାକୁ ଯାଉଛି। ଏଲ୍ପିଜି ଯୋଗାଣ ବିଳମ୍ବିତ ହେବ ବୋଲି ସୌଦି ଆରବ କହିବା ପରେ ଦେଶର ୩ ତୈଳ କମ୍ପାନୀଙ୍କ ମୁଣ୍ଡବ୍ୟଥା ବଢ଼ିଯାଇଛି। ଆଗକୁ ଦଶହରା ସମେତ ଦୀପାବଳି ଆସୁଛି। ଏହି ସମୟରେ ଭାରତରେ ଏଲ୍ପିଜି ଚାହିଦା ବୃଦ୍ଧି ପାଇଥାଏ। ଏହାକୁ ଦୃଷ୍ଟିରେ ରଖି ଏବେ ଦେଶର ତୈଳ କମ୍ପାନୀମାନେ ଅନ୍ୟ ବଜାର ଉପରେ ନଜର ପକାଇବା ଆରମ୍ଭ କରିଛନ୍ତି।
ଇଣ୍ଡିଆନ ଅଏଲ କର୍ପୋରେଶନର ଅଧ୍ୟକ୍ଷ ସଞ୍ଜୀବ ସିଂ କହିଛନ୍ତି ଯେ, ଏସିଆ ବଜାରରେ ଚାହିଦା ବୃଦ୍ଧି ପାଇଥିବାରୁ ଏବେ ବର୍ଦ୍ଧିତ ଏଲ୍ପିଜି କେଉଁଠୁ ଆସିବ ସେ ନେଇ ଭାଳେଣି ପଡିଲାଣି। କାରଣ ଭାରତ ପେଟ୍ରୋଲିୟମ ପକ୍ଷରୁ ଏହାକୁ କିଣିବା ଲାଗି ଟେଣ୍ଡର ଜାରି କରାଯାଇଥିଲେ ସୁଦ୍ଧା କୌଣସି ଯୋଗାଣକାରୀ ରାଷ୍ଟ୍ର ଅଦ୍ୟାବଧି ଏଥିପ୍ରତି ଆଗ୍ରହ ଦେଖାଉନାହାନ୍ତି। ସେ କହିଛନ୍ତି ଯେ, ପାର୍ବଣ ଋତୁ ଆରମ୍ଭ ହୋଇଯାଇଥିବା ବେଳେ ସୌଦି ଆରବରୁ ଅକ୍ଟୋବର ପାଇଁ ଏଲ୍ପିଜି ଆସିବା ବିଳମ୍ବିତ ହେବ। ଆରାମ୍କୋ ସମେତ ଅନ୍ୟ ତୈଳ କମ୍ପାନୀମାନେ ଏ ସମ୍ପର୍କରେ ଭାରତକୁ ଜଣାଇ ଦେଇଛନ୍ତି। ଅନ୍ୟପକ୍ଷରେ ପାର୍ବଣ ଋତୁରେ ଏଲ୍ପିଜି ଚାହିଦା ନିଶ୍ଚିତ ଭାବେ ଅଧିକ ରହିବ ବୋଲି ଉଲ୍ଲେଖ କରି ସିଂ କହିଛନ୍ତି ଯେ, ଅଧିକ ଏଲ୍ପିଜି ଯୋଗାଡ କରିବା ଲାଗି ଯଥାସାଧ୍ୟ ପ୍ରୟାସ ଚାଲିଛି। ଦେଶ ପାଇଁ ଅକ୍ଟୋବର-ନଭେମ୍ବର ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଥିବାରୁ ସମସ୍ତ ତୈଳ କମ୍ପାନୀ ପକ୍ଷରୁ ଅଧିକ ଏଲ୍ପିଜି ଯୋଗାଡ ଲାଗି ଚେଷ୍ଟା ଚାଲିଛି। ସୂଚନାଥାଉ କି, ଏଲ୍ପିଜି ଆମଦାନୀ କ୍ଷେତ୍ରରେ ଭାରତ ବିଶ୍ୱରେ ଦ୍ୱିତୀୟ ସର୍ବବୃହତ ଦେଶ। ଏହା ନିଜର ଚାହିଦାର ଅର୍ଦ୍ଧାଧିକ ସୌଦି ଆରବ, କାତାର, ଓମାନ ଓ କୁଏତ୍ରୁ ହାସଲ କରିଥାଏ। ସେପ୍ଟେମ୍ବରରେ ମୌସୁମୀ ବର୍ଷା ବନ୍ଦ ହେବା ପରେ ଏଲ୍ପିଜି ଚାହିଦା ସାଧାରଣତଃ ବଢ଼ିଥାଏ ବୋଲି ସିଂ କହିଛନ୍ତି। ଏହାଛଡ଼ା ଉଜ୍ଜ୍ୱଳା ଯୋଜନା କାରଣରୁ ଦେଶରେ ଏବେ ଏଲ୍ପିଜି ଚାହିଦା ଯଥେଷ୍ଟ ବଢ଼ିଛି ବୋଲି ଉଲ୍ଲେଖ କରି ସେ କହିଛନ୍ତି ଯେ, ଚଳିତ ସପ୍ତାହରେ ଆରାମ୍କୋର ନିଅଣ୍ଟକୁ ଆବୁଧାବୀ ନ୍ୟାଶନାଲ ଅଏଲ୍ କୋ. ପୂରଣ କରିଥିଲା। ଦୁଇଟି ଜାହାଜ ଆସନ୍ତା ୨ ସପ୍ତାହ ମଧ୍ୟରେ ଭାରତ ପହଞ୍ଚତ୍ବ ବୋଲି ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଗତ ୨୪ରେ ଟୁଇଟ୍ କରିଥିଲେ। ତେବେ ସିଂ ଦେଶବାସୀଙ୍କୁ ଆଶ୍ୱସ୍ତ କରି କହିଛନ୍ତି ଯେ, ଦେଶରେ ଏଲ୍ପିଜିର ସଙ୍କଟ ନାହିଁ। ତେବେ ଆଗାମୀ ଦିନରେ ଅତିରିକ୍ତ ଚାହିଦା ମେଣ୍ଟାଇବା ଲାଗି ପୂର୍ବରୁ ପ୍ରସ୍ତୁତ ହେଉଛୁ। ସେ କହିଛନ୍ତି ଯେ, ସୌଦି ଆରବରୁ ପ୍ରାୟ ୬ ଲକ୍ଷ ଟନ ଏଲ୍ପିଜି ଆସିବା କମିବ। ବିପିସିଏଲ୍ ରିଫାଇନେରିଜ ନିର୍ଦ୍ଦେଶକ ଆର୍.ରାମଚନ୍ଦ୍ରନ କହିଛନ୍ତି ଯେ, ଆମ ନିକଟରେ ବିକଳ୍ପ ନାହିଁ। ବିଦେଶରୁ ସର୍ବଦା ଏଲ୍ପିଜି ଆମଦାନୀ କରିବାକୁ ହେବ ଏବଂ ସବୁଦିନ ବିଦେଶୀ ଜାହାଜ ଭାରତକୁ ଆସୁଥାଉ ବୋଲି ରାମଚନ୍ଦ୍ରନ କହିଛନ୍ତି।
