ନୂଆଦିଲ୍ଲୀ,୩ା୯(ପି.ଟି.): ଚୂଡ଼ାନ୍ତ ଜାତୀୟ ନାଗରିକ ପଞ୍ଜିକା (ଏନ୍ଆର୍ସି)ରୁ ବାଦ୍ ପଡ଼ିଥିବା ଲୋକଙ୍କୁ ଅଟକ ରଖାଯିବନି ବୋଲି କେନ୍ଦ୍ର ସରକାର ସୋମବାର ସ୍ପଷ୍ଟ କରିଛନ୍ତି। ସେମାନଙ୍କର ସମସ୍ତ ଆଇନଗତ ପଦକ୍ଷେପ ନ ସରିବା ପର୍ଯ୍ୟନ୍ତ ଅଟକ ରଖାଯିବନି। ଆସାମ ସରକାର ଗରିବଙ୍କ ପାଇଁ ଆବଶ୍ୟକ ଆଇନଗତ ସହାୟତା ଜିଲା ଆଇନ ସେବା କର୍ତ୍ତୃପକ୍ଷଙ୍କ ଜରିଆରେ ଯୋଗାଇବେ ବୋଲି ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଏକ ବିବୃତିରେ କୁହାଯାଇଛି। ଫରେନର୍ସ ଟ୍ରିବ୍ୟୁନାଲରେ ଆବେଦନ ପାଇଁ ୧୨୦ ଦିନ ସମୟ ଦିଆଯାଇଛି। ଏଥିପାଇଁ ବର୍ତ୍ତମାନ ୧୦୦ ଟ୍ରିବ୍ୟୁନାଲ ଥିବାବେଳେ ୨୦୦ ନୂଆ ଖୋଲାଯିବ। ଆଇନଗତ ପଦକ୍ଷେପ ଶେଷ ହେବା ପର୍ଯ୍ୟନ୍ତ ବାଦ୍ ପଡିଥିବା ବ୍ୟକ୍ତି ପୂର୍ବଭଳି ନାଗରିକର ସମସ୍ତ ଅଧିକାର ଉପଭୋଗ କରିପାରିବେ ବୋଲି ଉକ୍ତ ବିବୃତିରେ କୁହାଯାଇଛି।
