ବରଗଡ଼ ଅଫିସ,୨୪।୯: ବରଗଡ଼ ସହରର ଏକ ହୋଟେଲ ସମ୍ମିଳନୀ କକ୍ଷରେ ମଙ୍ଗଳବାର ପ୍ରାକୃତିକ ବିପର୍ଯ୍ୟୟ ପରିଚାଳନା ଉପରେ ଏକ ପ୍ରଶିକ୍ଷଣ ଶିବିର ଉଦ୍ଘାଟିତ ହୋଇଯାଇଛି। ଜିଲାପାଳ ଜ୍ୟୋତିରଞ୍ଜନ ପ୍ରଧାନଙ୍କ ଦ୍ବାରା ଉଦ୍ଘାଟିତ ଏହି ଶିବିରରେ ସ୍ବତନ୍ତ୍ର ରିଲିଫ କମିଶନର ଅଫିସରୁ ଆସିଥିବା ଅଧିକାରୀ କିଶୋର ସାହୁ ବିପର୍ଯ୍ୟୟ ପରିଚାଳନା ଉପରେ ପ୍ରଶିକ୍ଷଣ ଦେଇଥିଲେ। ବିପର୍ଯ୍ୟୟର ପରିଚାଳନାକୁ ତ୍ୱରାନ୍ବିତ କରିବା ପାଇଁ ଏଣିକି ସେ ସମ୍ପର୍କିତ ତଥ୍ୟ କିମ୍ବା ଫୋନ, ଇ-ମେଲ ବଦଳରେ ଏଥି ସକାଶେ ରହିଥିବା ୱେବସାଇଟରେ ଅପଲୋଡ କରିବାକୁ ସାହୁ ପରାମର୍ଶ ଦେଇଥିଲେ। ସେହିପରି ସେସବୁ ତଥ୍ୟ କିଭଳି ଅପଲୋଡ କରାଯିବ, ସେନେଇ ସେ ପ୍ରଶିକ୍ଷଣ ଦେଇଥିଲେ। ଏଥିରେ ପ୍ରାକୃତିକ ବିପର୍ଯ୍ୟୟ ପରିଚାଳନାର ଜିଲା ପ୍ରୋଜେକ୍ଟ ମ୍ୟାନେଜର ରାକେଶ କୁମାର ନାୟକ କାର୍ଯ୍ୟକ୍ରମ ସଂଯୋଜନା କରିଥିଲାବେଳେ ଶିବିରରେ ସମସ୍ତ ବିଡିଓ, ତହସିଲଦାରଙ୍କ ସମେତ ବିଭାଗୀୟ ଅଧିକାରୀ ଓ କର୍ମଚାରୀ ଉପସ୍ଥିତ ଥିଲେ।
