ବଇଣ୍ଡା,୨୭।୫(ଡି.ଏନ.ଏ.)-କିଶୋରନଗର ବ୍ଲକ ବଇଣ୍ଡା ଛକଠାରେ ଭାରତୀୟ ଷ୍ଟେଟବ୍ୟାଙ୍କର ୨ଟି ଏଟିଏମ୍ ଦୀର୍ଘଦିନ ହେବ ଅଚଳ ହୋଇପଡ଼ିଛି। ଫଳରେ ଉପଭୋକ୍ତାଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ବଇଣ୍ଡା ଷ୍ଟେଟବ୍ୟାଙ୍କ ନିକଟରେ ଥିବା ଏଟିଏମ୍ଟିକୁ କିଛିଦିନ ତଳେ ଦୁର୍ବୃତ୍ତମାନେ ଭାଙ୍ଗି ଦେଇଥିଲେ। ହେଲେ ତାହା ବଦଳରେ ନୂତନ ଏଟିଏମ୍ ଲଗାଯାଉ ନାହିଁ।
ସେହିପରି ରେଳ ଷ୍ଟେଶନ ପରିସରରେ ଥିବା ଏଟିଏମଟି ଦୀର୍ଘ ୬ ମାସ ହେବ କାମ କରୁନାହିଁ। ଆଠମଲ୍ଲିକ ଉପଖଣ୍ଡର ମୁଖ୍ୟ ବ୍ୟବସାୟିକ କେନ୍ଦ୍ରସ୍ଥଳ ଭାବେ ବଇଣ୍ଡା ଅଞ୍ଚଳ ପରିଚିତ ଥିବାବେଳେ ପ୍ରତିଦିନ ବହୁ ଲୋକ ଟଙ୍କା ଉଠାଣ ପାଇଁ ନିର୍ଭର କରିଥାନ୍ତି। ସେହିପରି ଏଟିଏମରେ ଟଙ୍କା ନ ଥିବା ସହ ବାରମ୍ବାର ଅଚଳ ହୋଇପଡ଼ିଥିବା ଯୋଗୁ ସାଧାରଣ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏ ନେଇ ଜିଲା ପ୍ରଶାସନଠାରୁ ଆରମ୍ଭ କରି ବିଭାଗୀୟ ଅଧିକାରୀଙ୍କୁ ଅବଗତ କରାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ। ଏଥିପ୍ରତି ଦୃଷ୍ଟି ଦେବାକୁ ସାଧାରଣରେ ଦାବି ହୋଇଛି।
