ଚଣ୍ଡିଗଡ଼,୭ା୧୧(ପି.ଟି.): ଆସୋସିଏଟେଡ୍ ଜର୍ନାଲ୍ସ ଲିମିଟେଡ୍ (ଏଜେଏଲ୍)କୁ ଜମି ଆବଣ୍ଟନ ମାମଲାରେ ପଞ୍ଚକୁଲାର ସ୍ବତନ୍ତ୍ର ଇଡି କୋର୍ଟ ହରିୟାଣାର ପୂର୍ବତନ ମୁଖ୍ୟମନ୍ତ୍ରୀ ଭୂପିନ୍ଦର ସିଂ ହୁଡା ଏବଂ ବରିଷ୍ଠ କଂଗ୍ରେସ ନେତା ମୋତିଲାଲ ଭୋରାଙ୍କୁ ନିୟମିତ ଜାମିନ ପ୍ରଦାନ କରିଛନ୍ତି। ମାମଲାର ପରବର୍ତ୍ତୀ ଶୁଣାଣି ଡିସେମ୍ବର ୧୦କୁ ଧାର୍ଯ୍ୟ କରାଯାଇଛି। ବୁଧବାର ଶୁଣାଣି ବେଳେ କୋର୍ଟରେ ଦୁଇ କଂଗ୍ରେସ ନେତା ଉପସ୍ଥିତ ଥିଲେ। ଗତ ୩୦ରେ ସ୍ବତନ୍ତ୍ର ଅଦାଲତ ଦୁଇ ନେତାଙ୍କୁ ନଭେମ୍ବର ୬ ପର୍ଯ୍ୟନ୍ତ ଅନ୍ତରୀଣ ଜାମିନ ପ୍ରଦାନ କରିଥିଲେ। ଏଜେଆଇକୁ ଜମି ଆବଣ୍ଟନରେ ଅନିୟମିତତା ନେଇ ଗତ ଅଗଷ୍ଟ ମାସରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଭୋରା ଓ ହୁଡାଙ୍କ ବିରୋଧରେ ଚାର୍ଜଶିଟ୍ ଦାଖଲ କରିଥିଲା। ୨୦୦୫ରୁ ୨୦୧୪ ହୁଡା ମୁଖ୍ୟମନ୍ତ୍ରୀ ଥିଲାବେଳେ ଏଜେଏଲ୍କୁ ବେଆଇନ ଭାବେ ପଞ୍ଚକୁଲାରେ ମୂଲ୍ୟବାନ ଜମି ପ୍ରଦାନ କରାଯାଇଥିଲା। ଏହି ଦୁର୍ନୀତିରେ ହୁଡା ଓ ଭୋରା ସିଧାସଳଖ ସମ୍ପୃକ୍ତ ଥିବା ଇଡି ଚାର୍ଜଶିଟ୍ରେ ଉଲ୍ଲେଖ କରିଥିଲା। ମନିଲଣ୍ଡରିଂ ପ୍ରତିକାର ଆଇନର ବ୍ୟବସ୍ଥା ଅନୁଯାୟୀ ଇଡି ୬୪.୯୩ କୋଟି ଟଙ୍କାର ସମ୍ପତ୍ତି ଜବତ କରିଛି।
