ନୂଆଦିଲ୍ଲୀ,୧୩-୬: ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ)ର ବଳକା ଅର୍ଥ ପ୍ରଦାନକୁ ନେଇ ଗାଇଡଲାଇନ ପ୍ରସ୍ତୁତ କରିବାକୁ ଗଠିତ ୬ ଜଣିଆ ବିମଳ ଜଲାନ କମିଟିରେ ସହମତି ପ୍ରକାଶ ପାଇପାରୁନାହିଁ। ଏହି କାରଣରୁ ରିପୋର୍ଟ ପ୍ରଦାନରେ ବିଳମ୍ବ ହେଉଛି। ଜଣେ ଅଧିକାରୀ କହିଛନ୍ତି ଯେ, ଚଳିତ ମାସ ଶେଷରେ ରିପୋର୍ଟ ପ୍ରଦାନ ପୂର୍ବରୁ କମିଟି ଆଉ ଥରେ ବୈଠକରେ ବସିବ। ଉଲ୍ଲେଖଥାଉ କି, ଗତବର୍ଷ ଡିସେମ୍ବର ୨୬ରେ ଆର୍ବିଆଇ ପୂର୍ବତନ ଗଭର୍ନର ବିମଳ ଜଲାନଙ୍କ ଅଧ୍ୟକ୍ଷତାରେ ୬ ସଦସ୍ୟବିଶିଷ୍ଟ କମିଟି ଗଠନ କରାଯାଇଥିଲା। ଆର୍ବିଆଇ ନିକଟରେ ବଳକା ଥିବା ଅର୍ଥ ମଧ୍ୟରୁ ଅଧିକାଂଶ କେନ୍ଦ୍ର ସରକାରଙ୍କୁ ପ୍ରଦାନ କରିବା ଲାଗି ଅର୍ଥ ମନ୍ତ୍ରଣାଳୟ ପକ୍ଷରୁ ଯୁକ୍ତି ଦର୍ଶାଯାଇଛି। ଅନ୍ୟପକ୍ଷରେ ଲାଭାଂଶ ବ୍ୟତୀତ ଅଧିକ ଅର୍ଥ ଦେବାକୁ କେନ୍ଦ୍ରୀୟ ବ୍ୟାଙ୍କ ରାଜି ନୁହେଁ। ଉଭୟଙ୍କ ମଧ୍ୟରେ ମତପାର୍ଥକ୍ୟ ଦେଖାଦେବା ପରେ ଆର୍ବିଆଇର ପୁଞ୍ଜି ଢାଞ୍ଚା ସମୀକ୍ଷା ଲାଗି ଉକ୍ତ କମିଟି ଗଠନ କରାଯାଇଛି। ବର୍ତ୍ତମାନ ଆର୍ବିଆଇ ନିକଟରେ ୯.୬ ଲକ୍ଷ କୋଟି ଟଙ୍କାରୁ ଅଧିକ ପୁଞ୍ଜି ରହିଛି। ଏହି କମିଟିରେ ଜଲାନଙ୍କ ବ୍ୟତିତ ଆର୍ବିଆଇର ପୂର୍ବତନ ଡେପୁଟି ଗଭର୍ନର ରାକେଶ ମୋହନ, ଅର୍ଥ ସଚିବ ସୁଭାଷ ଚନ୍ଦ୍ର ଗର୍ଗ, ଆର୍ବିଆଇର ବର୍ତ୍ତମାନ ଡେପୁଟି ଗଭର୍ନର ଏନ୍.ଏସ୍.ବିଶ୍ୱନାଥନ ଏବଂ କେନ୍ଦ୍ରୀୟ ବ୍ୟାଙ୍କ ନିର୍ଦ୍ଦେଶକ ମଣ୍ଡଳର ଦୁଇ ଜଣ ସଦସ୍ୟ ଭାରତ ଦୋଷୀ ଏବଂ ସୁଧୀର ମଙ୍କଡ ସାମିଲ ହୋଇଛନ୍ତି।
