ନୂଆଦିଲ୍ଲୀ,୨୫।୧୨: ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ୯୫ତମ ଜୟନ୍ତୀ ଅବସରରେ କେନ୍ଦ୍ର ସରକାରଙ୍କ ପକ୍ଷରୁ ଅଟଳ ଭୂଜଳ ଯୋଜନା ଆରମ୍ଭ କରାଯାଇଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏହି ଯୋଜନାର ଶୁଭାରମ୍ଭ କରିଛନ୍ତି। ଦିଲ୍ଲୀର ବିଜ୍ଞାନ ଭବନରେ ଏହି ଉପଲକ୍ଷେ ଆୟୋଜିତ ଏକ କାର୍ଯ୍ୟକ୍ରମରେ ଯୋଗଦେଇ ମୋଦି କହିଛନ୍ତି ଯେ, ଏହି ଯୋଜନା ଦ୍ୱାରା ଅଟଳ ବିହାରୀଙ୍କ ସ୍ବପ୍ନ ସତ୍ୟରେ ପରିଣତ ହୋଇଛି। ଏହି ଯୋଜନା ଅନ୍ତର୍ଗତ ଦେଶର ଉତ୍ତରପ୍ରଦେଶ, ମଧ୍ୟପ୍ରଦେଶ, ଗୁଜରାଟ, ହରିୟାଣା, ରାଜସ୍ଥାନ ଏବଂ ମହାରାଷ୍ଟ୍ର ଆଦି ୬ଟି ରାଜ୍ୟର ୮ ହଜାର ୩ ଶହ ୫୦ ଗାଁରେ ପିଇବା ପାଣି ପହଞ୍ଚି ପାରିବ। ଏହାଦ୍ୱାରା ହଜାର ହଜାର ଲୋକେ ଉପକୃତ ହୋଇପାରିବେ। ଏହି ଅବସରରେ ପ୍ରତିରକ୍ଷାମନ୍ତ୍ରୀ ରାଜନାଥ ସିଂ ଯୋଗଦେଇ କହିଛନ୍ତି ଯେ, ଦେଶର ଅର୍ଥବ୍ୟବସ୍ଥା ଭୂଜଳ ଉପରେ ନିର୍ଭର କରିଥାଏ। କେନ୍ଦ୍ର ସରକାର ଏହାର ସଂରକ୍ଷଣ ନେଇ ବିଭିନ୍ନ ଉଦ୍ୟମ ଅବ୍ୟାହତ ରଖିଥିବା ରାଜନାଥ କହିଛନ୍ତି। ଏହି ଯୋଜନାରେ ୬ ହଜାର କୋଟି ଟଙ୍କା ଖର୍ଚ୍ଚ ହେବ। ସେଥିମଧ୍ୟରୁ ୩ ହଜାର କୋଟି ଟଙ୍କା ବିଶ୍ୱବ୍ୟାଙ୍କ ଖର୍ଚ୍ଚ କରିବ। ସେହିପରି ଭାରତ ସରକାର ଅବଶିଷ୍ଟ ୩ ହଜାର କୋଟି ଟଙ୍କା ଖର୍ଚ୍ଚ କରିବେ।
