ଭୁବନେଶ୍ୱର,୯ା୧୧(ବ୍ୟୁରୋ): ରାଜ୍ୟ ସରକାର ଚଳିତବର୍ଷ ୭ହଜାର ଆପ୍ରେଣ୍ଟିସ୍ଶିପ୍ ବା ଶିକ୍ଷାନବିସ୍୍ ପ୍ରଶିକ୍ଷଣ ନିମନ୍ତେ ଲକ୍ଷ୍ୟ ରଖିଛନ୍ତି। ରାଜ୍ୟରେ ବର୍ତ୍ତମାନ ସୁଦ୍ଧା ୨,୮୩୫ ଆପ୍ରେଣ୍ଟିସ୍ଶିପ୍ ସଂସ୍ଥା ପଞ୍ଜୀକୃତ ଅଛନ୍ତି। ଆଇଟିଆଇରେ ୩୩% ମହିଳାଙ୍କ ପାଇଁ ସ୍ଥାନ ସଂରକ୍ଷଣ କରାଯାଇଛି। ବୈଷୟିକ କ୍ଷେତ୍ରରେ ସେମାନଙ୍କୁ ଦକ୍ଷ କରିବାକୁ ରାଜ୍ୟ ସରକାର ଏଭଳି ପଦକ୍ଷେପ ନେଇଛନ୍ତି। ମହିଳାମାନେ ପାରମ୍ପରିକ ଦକ୍ଷତା ପ୍ରଶିକ୍ଷଣ ମଧ୍ୟରେ ସୀମିତ ନ ରହି କିଭଳି ପୁରୁଷଙ୍କ ଆଧିପତ୍ୟ ଥିବା କ୍ଷେତ୍ରରେ ଶ୍ରେଷ୍ଠତ୍ୱ ପ୍ରଦର୍ଶନ କରିବେ ସେଥିଲାଗି ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଥିବା ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀ ପ୍ରେମାନନ୍ଦ ନାୟକ କହିଛନ୍ତି।
ବୈଷୟିକ ଶିକ୍ଷା ଏବଂ ପ୍ରଶିକ୍ଷଣ ନିର୍ଦ୍ଦେଶାଳୟ(ଡିଟିଇଟି) ଏବଂ ରାଜ୍ୟ ଶିକ୍ଷାନବିସ୍ ପରାମର୍ଶଦାତାଙ୍କ ଦ୍ୱାରା ଶୁକ୍ରବାର ସ୍ଥାନୀୟ ଗୋପବନ୍ଧୁ ଏକାଡେମୀଠାରେ ଆପ୍ରେଣ୍ଟିସ୍ ଆକ୍ଟ-୧୯୬୧ ଉପରେ ଏକ ସମ୍ମିଳନୀ ଅନୁଷ୍ଠିତ ହୋଇଯାଇଛି। ଏଥିରେ ମୁଖ୍ୟଅତିଥି ଭାବେ ଯୋଗଦେଇ ମନ୍ତ୍ରୀ ନାୟକ ଯୋଗଦେଇଥିଲେ। ଶିଳ୍ପାନୁଷ୍ଠାନଗୁଡ଼ିକ ଗୁଣାତ୍ମକ ଶିକ୍ଷାନବିସ୍ ପ୍ରଶିକ୍ଷଣ ପ୍ରଦାନ କରିବାକୁ ଓଡ଼ିଶା ଦକ୍ଷତା ବିକାଶ ପ୍ରାଧିକରଣ ଅଧ୍ୟକ୍ଷ ସୁବ୍ରତ ବାଗ୍ଚୀ ଗୁରୁତ୍ୱାରୋପ କରିଥିଲେ। ଯୁବଗୋଷ୍ଠୀ ତଥା ଆଇଟିଆଇ ତାଲିମପ୍ରାପ୍ତ ଝିଅ ଓ ପୁଅମାନେ ଉକ୍ତ ଅଭିଜ୍ଞତାକୁ ନେଇ ବିଶ୍ୱସ୍ତରରେ ନିଯୁକ୍ତିଯୋଗ୍ୟ ହୋଇପାରିବେ ବୋଲି ସେ କହିଥିଲେ। କଟକ ଏମ୍ପି ତଥା ସଂସଦୀୟ ଶ୍ରମ ଷ୍ଟାଣ୍ଡିଂ କମିଟି ଅଧ୍ୟକ୍ଷ ଭର୍ତ୍ତୃହରି ମହତାବ କହିଥିଲେ, ଓଡ଼ିଶାର ଦକ୍ଷଶିଳ୍ପୀ ବିଶ୍ୱ ଦରବାରରେ ପ୍ରଶଂସିତ। ପାରମ୍ପରିକ ଦକ୍ଷତା ବ୍ୟତୀତ ବୈଷୟିକ ଜ୍ଞାନ ଓ ଦକ୍ଷତାପୂର୍ଣ୍ଣ ଯୁବଗୋଷ୍ଠୀଙ୍କୁ ଶିକ୍ଷାନବିସ୍ ପ୍ରଶିକ୍ଷଣ ଜରିଆରେ ଅଧିକ କୁଶଳୀ କାରିଗର ଭାବେ ଗଢ଼ି ତୋଳିବାକୁ ସେ ଉପସ୍ଥିତ ଶିଳ୍ପାନୁଷ୍ଠାନର ପ୍ରତିନିଧିମାନଙ୍କୁ ପରାମର୍ଶ ଦେଇଥିଲେ। ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ସଚିବ ସଞ୍ଜୟ କୁମାର ସିଂ ବିଭାଗ ପକ୍ଷରୁ ଗ୍ରହଣ କରାଯାଇଥିବା ବିଭିନ୍ନ କାର୍ଯ୍ୟକ୍ରମ ସମ୍ପର୍କରେ ସୂଚନା ଦେଇଥିଲେ। ଏହି ଅବସରରେ ନାଲ୍କୋ, ପିପିଏଲ୍, ହିଣ୍ଡାଲ୍କୋ ଓ ଉତ୍କଳ ଆଲୁମିନା ସହ ଆପ୍ରେଣ୍ଟିସ୍ଶିପ୍୍ ନିମନ୍ତେ ଥିବା ସମସ୍ୟା, ଆହ୍ବାନ ଏବଂ ରୋଡ୍ମ୍ୟାପ୍ ପ୍ରସ୍ତୁତି ନିମନ୍ତେ ଆଲୋଚନା ହୋଇଥିଲା। ଏଥିରେ ବୈଷୟିକ ଶିକ୍ଷା ଓ ପ୍ରଶିକ୍ଷଣ ନିର୍ଦ୍ଦେଶାଳୟ ନିର୍ଦ୍ଦେଶକ ରେଘୁ ଜି. ଅଧ୍ୟକ୍ଷତା କରିଥିବାବେଳେ ଉପନିର୍ଦ୍ଦେଶକ ଅଜୟ ପଣ୍ଡା ପରିଚାଳନା କରିଥିଲେ। ଶ୍ରମ କମିଶନର ନିରଞ୍ଜନ ସାହୁ, ନିୟୋଜନ ନିର୍ଦ୍ଦେଶାଳୟ ନିର୍ଦ୍ଦେଶିକା ରଶ୍ମିତା ପଣ୍ଡା ପ୍ରମୁଖ କାର୍ଯ୍ୟକ୍ରମରେ ଉପସ୍ଥିତ ଥିଲେ।
