କଟକ ଅଫିସ,୨୨।୯: କେବଳ କଟକରେ ସୀମିତ ନାହିଁ। ଏବେ କଟକଚଣ୍ଡୀ ମନ୍ଦିରକୁ ନେଇ ଚର୍ଚ୍ଚା ବିଦେଶ ପର୍ଯ୍ୟନ୍ତ ପହଞ୍ଚିଲାଣି। ବିଭିନ୍ନ ଟୁଇଟ୍ରେ ମନ୍ଦିରର ସାଜସଜ୍ଜାକୁ ସ୍ଥାନ ମିଳିଛି। ଦଶହରା ପୂର୍ବରୁ କଟକ ଚଣ୍ଡୀ ମନ୍ଦିର ଫୁଲରେ ସଜେଇ ହୋଇ ଚମକୁ ଥିବାବେଳେ ଏହା ପଛରେ କେତେଜଣ ଯୁବଗୋଷ୍ଠୀଙ୍କର ମୁଖ୍ୟ ହାତ ରହିଛି। ପୂଜା କରିବାକୁ ଆସୁଥିବା କେତେଜଣ ସ୍ଥାନୀୟ ଯୁବକ ନିଜସ୍ବ ଖର୍ଚ୍ଚରେ ମନ୍ଦିରକୁ ସଜେଇଛନ୍ତି।
ଗତ ରଥଯାତ୍ରା ସମୟରେ ପୁରୀ ଶ୍ରୀଜଗନ୍ନାଥ ମନ୍ଦିରକୁ ଫୁଲରେ ସଜ୍ଜା ଯାଇଥିଲା। ଏହି ପ୍ରସଙ୍ଗରୁ ହିଁ କଟକ ଚଣ୍ଡୀମନ୍ଦିର ସଜାଇବା ପାଇଁ ଯୋଜନା କରିଥିଲେ ଯୁବଗୋଷ୍ଠୀ। ଏ ନେଇ ଗତ ମାସରେ ମନ୍ଦିର ପରିସରରେ ଯୁବକମାନେ ଏକାଠି ହୋଇଥିଲେ। ଦଶହରାରେ ଚଣ୍ଡୀମନ୍ଦିରକୁ ସଜେଇବା ପାଇଁ ନିଷ୍ପତ୍ତି ହୋଇଥିଲା। ପ୍ରାୟ ୨୫ଜଣ ଯୁବକ ଏଥିରେ ସହମତି ଜଣାଇଥିଲେ। ମୋଟ ଦେଢଲକ୍ଷ ଟଙ୍କା ଏହି ସାଜ୍ଜସଜ୍ଜାରେ ଖର୍ଚ୍ଚ ହୋଇଥିବାବେଳେ ଏଥିରେ କଲିକତାରୁ ୧୦ଜଣ ବ୍ୟକ୍ତି ନିୟୋଜିତ ହୋଇଥିଲେ। ଏବେ ପ୍ଲାଷ୍ଟିକ ଫୁଲ ଲାଗିଛି। ଦଶହରା ସମୟରେ ପ୍ରକୃତ ଫୁଲ ସହିତ ଫଳରେ ମନ୍ଦିରକୁ ସଜାଯିବ ବୋଲି ଯୁବକମାନେ କହିଛନ୍ତି। ଅନ୍ୟପକ୍ଷରେ ଶନିବାର ମା’ଙ୍କ ସୁନାବେଶ ସହସ୍ର କୁମ୍ଭାଭିଷେକ କାର୍ଯ୍ୟ ସରିଥିବାବେଳେ ରବିବାରଠାରୁ ଆରମ୍ଭ ହେବ ଷୋଡ଼ଶ ଉପଚାର। ଏଥିସହ ବିଭିନ୍ନ ଦିବସରେ ମା’ଙ୍କ ବେଶ ଅନୁଷ୍ଠିତ ହେବ।
ସଂକ୍ଷେପରେ
ମନ୍ଦିରର ଇତିହାସ
କନିକା ରାଜାଙ୍କ ପୁରୋହିତ ଥିଲେ ହଂସନାଥ ପଣ୍ଡା। ହଂସନାଥ ଦିନେ ଗାଈ ଚରାଉଥିବାବେଳେ ହାଲିଆ ହୋଇ ଏକ ମାଟିଗଦା ଉପରେ ବସି ପଡ଼ିଥିଲେ। ଫଳରେ ତାଙ୍କ ଦେହରେ ଅପୂର୍ବ ଶିହରଣ ଖେଳିଥିଲା। ଏଠାରେ କିଛି ଦୈବୀକୃପା ଅଛି ବୋଲି ସେ ଅନୁଭବ କରିଥିଲେ। ସେହିଦିନ ରାତିରେ ହଂସନାଥ ସ୍ବପ୍ନରେ ମା’ଙ୍କୁ ଦେଖିଥିଲେ। ଏ କଥା କନିକା ରାଜାଙ୍କୁ କହିବା ପରେ ଉକ୍ତ ସ୍ଥାନକୁ ଖୋଳାଯାଇଥିଲା। ବିଶ୍ୱାସ ରହିଛି ଯେ, ଖୋଳାଯିବା ସମୟରେ ୪୦ ଓଦର ସିନ୍ଦୂର ଓ ପରେ ମା’ଙ୍କ ମୂର୍ତ୍ତି ମିଳିଥିଲା। ଏକ ବଉଳଗଛ ମୂଳେ ପ୍ରଥମେ ମା’ଙ୍କ ମୂର୍ତ୍ତୀ ରଖାଯାଇ ପୂଜା ଆରମ୍ଭ ହୋଇଥିଲା। ଏଠାରେ ଏବେ ଗଢ଼ି ଉଠିଛି କଟକର ଆରାଧ୍ୟା କଟକଚଣ୍ଡୀଙ୍କ ମନ୍ଦିର।
