ନୂଆଦିଲ୍ଲୀ,୧-୫: ଭାରତୀୟ ଷ୍ଟେଟ ବ୍ୟାଙ୍କ(ଏସ୍ବିଆଇ) ମେ ପହିଲାରୁ ସଞ୍ଚୟ ଆକାଉଣ୍ଟ ଏବଂ ସ୍ବଳ୍ପମିଆଦି ଋଣ ଲାଗି ନୂଆ ନିୟମ ଲାଗୁ କରିଛି। ବ୍ୟାଙ୍କ ସୁଧ ହାର ଧାର୍ଯ୍ୟ କରିବାର ଆଧାର ବଦଳାଇବାକୁ ଯାଉଛି। ୧ ଲକ୍ଷରୁ ଅଧିକ ବାଲାନ୍ସ ଥିବା ସଞ୍ଚୟ ଆକାଉଣ୍ଟ ଏବଂ ସ୍ବଳ୍ପମିଆଦି ଋଣ ଲାଗି ସୁଧ ହାରକୁ ଭାରତୀୟ ରିଜର୍ଭ ବ୍ୟାଙ୍କ(ଆର୍ବିଆଇ)ର ରେପୋ ରେଟ ସହ ଯୋଡି ଦିଆଯାଇଛି। ଏହି ନୂଆ ନିୟମ ଯୋଗୁ ସଞ୍ଚୟ ଆକାଉଣ୍ଟଧାରୀଙ୍କୁ ଝଟ୍କା ଲାଗିବାକୁ ଯାଉଥିବା ବେଳେ ସ୍ବଳ୍ପମିଆଦି ଋଣ ଶସ୍ତା ହୋଇଯିବ। ନୂଆ ବ୍ୟବସ୍ଥା ଅନୁଯାୟୀ ଆର୍ବିଆଇ ରେପୋ ରେଟରେ ପରିବର୍ତ୍ତନ କରିବା ମାତ୍ରେ ସଞ୍ଚୟ ଖାତା ଏବଂ ସ୍ବଳ୍ପମିଆଦି ଋଣ ସୁଧ ହାର ଆପେ ଆପେ ବଦଳିଯିବ। ବର୍ତ୍ତମାନ ବ୍ୟାଙ୍କ ଦ୍ୱାରା ପ୍ରତିମାସରେ ଘୋଷିତ ଋଣ ସୁଧ ହାର (ଏମ୍ସିଏଲ୍ଆର୍) ଆଧାରିତ ଇଣ୍ଡରନାଲ ବେଞ୍ଚମାର୍କ ମାର୍ଜିନାଲ କଷ୍ଟ ଅଫ୍ ଫଣ୍ଡସ୍ ଜରିଆରେ ସମସ୍ତ ପ୍ରକାର ଋଣ ପ୍ରଦର୍ଶିତ ହୋଇଥାଏ। ନୂଆ ବ୍ୟବସ୍ଥା ଅନୁଯାୟୀ ୧ କୋଟି ଟଙ୍କା ପର୍ଯ୍ୟନ୍ତ ସଞ୍ଚୟ ଉପରେ ସୁଧ ହାର ୩.୫% ରହିଛି। ସେହିପରି ୧ କୋଟିରୁ ଅଧିକ ସଞ୍ଚୟ ଉପରେ ସୁଧ ହାର ୪% ମିଳୁଛି। ଏହି ହିସାବରେ ୧ ଲକ୍ଷରୁ ଅଧିକ ଏବଂ ୧ କୋଟିରୁ ଅଧିକ ଟଙ୍କାର ଜମା ଉପରେ ସୁଧ ହାର୦.୨୫% ହ୍ରାସ ପାଇବ। ଫଳରେ ଗ୍ରାହକଙ୍କୁ ଏବେ ୩.୨୫% ସୁଧ ମିଳିବ। ତେବେ ଖାତାରେ ୧ ଲକ୍ଷରୁ କମ୍ ଜମା ରହିଥିଲେ ସୁଧ ହାର ୩.୫% ରହିବ। ସେହିପରି ଏସ୍ବିଆଇ ପକ୍ଷରୁ ୩୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ଉପରେ ସୁଧ ହାର ୦.୧% କମ୍ ରହିବ। ଏବେ ଏହି ପରିମାଣ ଋଣ ଉପରେ ସୁଧ ହାର ୮.୬୦ରୁ ୮.୯୦% ରହିଛି।
